Home General Savanetero gara cu cargamento miyonario di droga pa Canada

Savanetero gara cu cargamento miyonario di droga pa Canada

969
0
SHARE
- Advertisement -

ORANJESTAD(AAN): E conocido landado procedente di Savaneta, M.G.A, naci dia 28 di juli 1971, tin algun dia caba encarcela na Merca, sospecha di purba importa un cargamento multimiyonario di droga via un boto di bela pa Canada.

E tabata abordo di e boto di bela “Sea Ya II” cu a sali for di Santo Domingo, a pasa Sint Maarten y a sigui pa Quebec na Canada, pero no a yega. US Coast Guard a para e boto den Ocean Atlantico, cerca di costa Oost di Merca, na altura di Maine, dia 19 di december ultimo. E tabata hunto cu un Canades abordo y ambos ta den man di husticia Mericano, acusa di ta den poder di mas cu 750 kilo di cocaina.

Si el a pasa, e lo a “hit the jackpot”
Di acuerdo cu Prensa Canades, e droga aki, esta alrededor di 750 kilo di cocaina, tin un balor di riba 37 miyon dollar! Ta saca e cifra aki saliendo for di e punto di bista cu na Canada un kilo di cocaina bal alrededor di 50 mil dollar, siendo cu na Aruba y den region Caribense cocaina bal mas o menos 5000 florin pa kilo.

E boto di bela
E boto mes, Sea Ya II ta traha na 1994 y tabata pertenece na Sagres Sailing Inc. di Fort Worth, Texas y su waf registra ta na Delaware. E prome doño a bende e boto na 2007 pa 240 mil dollar. E ultimo biaha cu a tende di e zeilboot aki tabata na December 2016, ora el a mara na Fort Lauderdale, Florida.

Polis Canades tabata warda riba nan
Mester menciona cu na luna di september ultimo a yega un yate for di St. Maarten y den dje a descubri 273 kilo di cocaina. Eyden a detene dos Canades di 59 aña di edad. Claro cu di eynan a cuminsa paga mas atencion pa botonan for di St. Maarten.
E boto di bela ta midi mas di 20 meter di largura. A par’e pasobra for di algun luna pasa caba tin un investigacion andando door di Merca y Canada, specificamente Royal Canadian Mounted Police Division di Nova Scotia y tambe e US Department of Homeland Security.

Ruta straño cu mesora ta hala atencion
No ta normal pa nabega cu un boto di bela den luna di December den e area ey cu ta haci hopi frieu, pues e presencia di e boto, e ruta tuma y su destino ta sospechoso caba. Kisas a pensa cu den dianan di Pasco autoridadnan lo ta menos stringente cu controlnan y aki a comete un eror di pensamento.

Por tin rabo na Aruba?
E sospechoso M.G.A. a sali for di Aruba for di masha dia caba, mustrando cu esaki ta un proyecto grandi. Di acuerdo cu fuentenan den husticia, el a sali for di Aruba dia 22 di october 2017 riba un buelo di PAWA pa Santo Domingo y no a bolbe mas. Remarcabel ta cu riba e mesun vuelo a sali 1 hende muhe y 4 hende homber mas, mayoria Hulandes/Europeo, cu tampoco no a bolbe nos isla mas. Polis Mericano ta bisa cu pa yega na 700 kilo mester ta mas cu un cartel tras di e cargamento aki, pues tin mas hende envolvi na Aruba, na St. Maarten, Santo Domingo y na Canada mes. Por spera na cualkier momento cu detencionnan lo cuminsa cay na Aruba tambe!

Aruba no ta na altura ainda
Te ainda no tin mucho informacion riba e caso aki, pasobra debi cu ta den dianan di fiesta, e canalnan hudicial y diplomatico ta cana mas lento. Famianan a confirma cu e homber ta cera na Merca pero mucho informacion nan tampoco no tin. Riba dje, siendo un ciudadano Hulandes, cu US State Department ta raporta prome na Embahada di Hulanda na Washington y despues e notificacion ta bay pa e respectivo Consul den e estado unda e ta encarcela, pa despues e notificacion yega na Departamento di Relacionnan Exterior di Aruba.

E Savanetero tin historia
E sospechoso M.G.A. no ta un desconoci di husticia. Na juni 2005, el a hunga un rol activo den e atraco arma riba Aruba Bank na Noord, den cual atracadornan a mata un empleada tras di balie. E tempo ey a encarcel’e pa hopi aña, cumpliendo cu un sentencia di Corte, cu a haye culpabel di facilita e arma cu a uza pa tira e empleada indefenso.

Despues di a sinta su castigo, M.G.A. a bay traha den Medio Oriente unda el a duik pa Sheiknan masha poderoso financieramente. Algun aña pasa el a bolbe nos isla.
E ta casa y tin 4 yiu muhe. E tabata casa cu un miembro di Parlamento actual di MEP.

 

- Advertisement -

DUNA COMENTARIO

Please enter your comment!
Please enter your name here