Home Hudicial Siete aña di prison pa homber haya culpable di violencia publico y...

Siete aña di prison pa homber haya culpable di violencia publico y tira riba motociclista

51
0
SHARE
- Advertisement -

Mientras cu un a haya castigo igual na loke el a sinta caba

ORANJESTAD (AAN): Diabierna mainta sentencia a cay den e caso penal cu Ministerio Publico a cuminsa contra e hombernan B.A. y C.K. Tratamento di e caso a sosode dia 24 di November 2017 caminda Fiscal a baha pisa. Fiscal a exigi 8 aña di prison pa B.A. y 12 aña di prison pa C.K.

Diabierna mainta Hues a haya B.A. culpable pa dos acusacion esta e caso di violencia publico dia 30 April 2016 na Entertainment Center y un caso di tiramento dia 14 Februari 2017. Hues a condena B.A. na 8 aña di prison. Pa loke ta C.K., Hues a hay’e culpable tambe pa e caso di dia 30 di April 2016 esta violencia publico. Hues no ta haya C.K. culpable di diferente intento di mata caminda e a tira. Hues a condena C.K. na castigo igual na loke el a sinta caba y a ordena pa e worde laga liber.

TIRA HOMBER 4 BIAHA:

Durante tratamento di e caso dia 24 November 2017, Fiscal a mustra cu den e caso di Entertainment Center, 30 April 2016, e homber G. a haci denuncia contra B.A. El a bisa cu el a sufri un sla y perde conocemento pero no sa kende a dal’e. El a haya un bati formal. Tin diferente testigo cu a mira con e maltrato formal aki a sosode.

E rumannan V. a bay para e pelea y B.A. a menaza V. di lo tir’e dos biaha. Despues di e pelea, V. a worde tira y V. reconoce C.K. Fiscal a bisa Hues cu e ta bay tras di declaracion di testigo independiente o sea personanan cu no tin nada di haci cu e caso. Testigonan a reconoce C.K. como esun cu a bringa tambe cu G. y tambe cu C.K. a tira. Fiscal ta haya nan culpable di maltrato di e homber G. Un agente Polis a notifica di a scucha 4 tiro. G.K. ta bisa cu e no tabata cu B.A. pero testigonan independiente ta bisa cu nan tabata hunto. Polis a haya 3 huls y dos bala Cal. 32. Polis a conclui cu riba distancia cortico a tira riba V. y minimo 3 biaha.

Tin testigo cu a reconoce C.K. como esun cu a bay busca arma y tira V.

E victima V. a duna descripcion di esun cu a tir’e cu ta mustra riba C.K. El a sufri tiro na pols y mester a haci operacion di biaha. E tabatin 4 herida di tiro cu ta cuadra cu loke Polis a bisa cu a scucha 4 tiro. Ta asina cu V. a reconoce B.A. como esun cu a menace di lo tir’e pero ta C.K. a tir’e. Fiscal ta haya C.K. culpable di intento di mata.

TIRA MOTOCICLISTA:

Fiscal a mustra cu riba 14 Februari 2017, B.A. a tira riba e homber H. cu tabata riba un brommer. Ta asina cu tabatin un accidente entre un brommer y un auto. Fiscal a mustra cu e chofer di e brommer a los algun tiro y a laga e brommer atras y core bay na pia. Tin testigo a mira esaki. Riba cas di B.A. a worde tira.

Fiscal a mustra cu NFI (Instituto Forense Hulandes) a conclui cu e balanan 9 mm cu a haya na e accidentte ta di e mesun arma. H. cu tabatin herida di tiro no kier a haci denuncia.

E homber F. a bisa cu ta C.K. y B.A. a tira riba H. Nan a sigui su tras den auto y ora e brommer a dal, nan tir’e. Parce cu un rato promer H. a tira riba nan y a core bay y a accidenta. El a sufri 3 tiro. Fiscal a conclui cu ta B.A. a tira riba H. E ta haya B.A. culpable di intento di mata.

CASTIGO EXIGI:

Fiscal a bisa cu e ta haya B.A. culpable di e violencia publico riba 30 di April 2016. Dia 14 di Februari 2017 el a core tras di un brommer y tira diferente biaha y herida e homber H.

Fiscal a mustra cu B.A. no ta desconoci. Na 2015 caba el a worde condena pa posecion di arma na 12 luna di prison di cual 4 luna ta condicional cu un tempo di prueba di 2 aña. Apesar di esaki B.A. ta bay atrobe usa arma durante tempo di prueba. Fiscal a exigi 8 aña di prison pa B.A. kitando e tempo cu e ta sera den KIA.

Pa loke ta C.K., Fiscal ta hay’e culpable di a tira riba 30 April 2016, e homber V. 4 biaha. Fiscal ta haya C.K. culpable di dos intento di mata caminda e tabatin arma. A tira V. kende a bay para un pelea caminda nan tabata bati formal un homber. Despues C.K. ta tira 11 bala riba un auto den cual tabatin tres persona cu ta forma parti di e otro gang di Madiki. Fiscal a mustra cu C.K. tambe a worde condena pa posecion di arma na 18 luna di prison di cual 6 luna ta condicional cu 3 aña di prueba. Apesar di esaki C.K. ta bolbe tira den tempo di prueba. Fiscal ta tuma C.K. na malo y a exigi 12 aña di prison.

SENTENCIA

Ayera mainta Hues a bisa cu e ta haya legalmente proba cu B.A. ta culpable di violencia publico riba 30 April 2016 y cu 14 Februari 2017 el a tira riba e motociclesta. Esaki ta worde considera un intento mata. Hues a bisa cu e ta declara B.A. liber pa otro acusacionnan. El a condena B.A. na 7 aña di prison kitando e tempo cu e ta sera den KIA. E demanda di daño di e homber V. a worde declara no admisibel.

Pa loke ta C.K., Hues a bisa cu e ta haya legalmente proba cu C.K. a haci violencia publico riba 30 April 2016. Pa e otro acusacionnan di tiramento cu ta worde considera intento di mata, Hues a declara C.K. liber pasobra e no ta haya cu esakinan a keda legalmente proba.

Hues a condena C.K. na 299 dia di prison cu ta loke el a sinta caba y a duna orden pa lag’e liber.

Tempo lo mustra cu Fiscal lo bay apela e sentencia di C.K. caminda el a exigi 12 aña di prison y awor Hues a declara C.K. liber di tur e acusacionnan di intento di mata.

 

- Advertisement -

DUNA COMENTARIO

Please enter your comment!
Please enter your name here