Home Hudicial Sospechoso di posesion di un arma di candela declara liber

Sospechoso di posesion di un arma di candela declara liber

45
0
SHARE
- Advertisement -

Hues tin duda kende ta e doño real di e arma

ORANJESTAD  (AAN) – Ayera mainta e hombernan J.T. y A.A., a presenta dilanti pa tratamento di nan caso. E duo aki ta wordo acusa di posesion di arma y balanan riba 13 Juli 2017. A.A. tabatin un revolver Cal. .357 y J.T. tabatin balanan 357 Magnum. Ni Fiscal y tampoco Hues tabata convenci cu A.A. tabatin e arma den su posesion mientras cu J.T. si a wordo haya culpable di e paki balanan.

ARMA

Hues a bisa cu Polis a bay veld di bala na Bushiri caminda segun informacion, un persona lo tin un arma den un tas blauw. Polis a bay na e veld y a mira e tas y un persona a cana bay den direccion di e tas. J.T. a bisa cu e tas ta di dje. Polis a puntra kico tin den e cas. A haya un paki di bala Magnum 357. Central a bisa e patruya cu e arma tey. E agentenan a sigui busca y a haya un tas lora den un flanel berde. Ora a habri e tas … bingo. E flanel ta di A.A.

Segun J.T., el a caba di yega e veld y a haya e caha di bala banda di matanan den mondi. Hues a puntr’e pakico el a coy e balanan. Segun J.T. el a pensa cu porta e por bende nan pa cria su yiunan. Hues a puntre si e sa di e arma. Segun J.T., e no sa mes cu tabatin arma. El a bisa Hues cu el a mira dos patruya a pasa y despues a bin un batayon. El a bisa cu e no conoce A.A. El a mir’e ta hunga futbol riba e veld. J.T. ta un hungador di futbol cu cada biaha ta practica riba e veld.

Hues a mustra cu J.T. a bisa Polis cu el a mira A.A., kita su t-shirt berde y lora esaki rond di e tas y despues a bay skop bala.

Hues a puntra A.A., con e arma a bin bou di su t-shirt. Segun A.A. e arma no ta di dje. E arma ta di un conoci di dje, A.R., kende a bin cu e tas y a mustr’e e arma. Despues el a bay hunga futbol y ora Polis a yega el a mira cu su t-shirt tabata ariba e tas. El a desmenti cu el a lora e t-shirt over di e tas. Hues a mustra cu den tur dos tas a haya marihuana pero nan no ta wordo persigui pa esaki.

Hues a bisa cu A.R. a wordo interoga y el a bisa cu el a bay veld pa hunga bala y no tabatin arma cun’e. El a bisa cu e tas tabata di A.A.  A.A. a bisa Hues cu no ta berdad. El a bisa cu e tin 4 luna sera por nada.

EXIGENCIA DI FISCAL

Fiscal a bisa cu e pregunta ta si tin suficiente prueba contra A.A. Polis a bay na e veld y a haya un tas. Esey tabata e tas di J.T. den cual tabatin marihuana y 25 bala Cal .357. Despues a haya un otro tas cu flanel di A.A. ta tapa esaki. Den e tas tabatin un arma.

Na opinion di Fiscal, e hecho cu J.T. a coy e caha di bala ta haci cu e ta culpable di posesion di balanan. E tabata 106 dia sera y despues a lag’e liber ora di e caso a bin dilanti pro forma. Fiscal a bisa cu e ta exigi castigo igual na loke J.T. a sinta caba y 3 siman di prison extra pero condicional cu un tempo di prueba di 2 aña. El a bisa cu J.T. mester keda leu di balanan.

Pa loke ta A.A., Fiscal ta haya cu un hende cu tabata na e veld a splica Polis cu tin un arma den un tas. A bin haya e pistol Magnum .357. A.A. ta bisa cu e tas ta di A.R. mientras cu A.R. ta bisa cu e tas no ta di dje. Fiscal ta haya importante cu e arma y balanan a wordo saca for di circulacion. Na opinion di Fiscal, no por saca afor kende realmente ta e doño di e arma. No tin otro testigo cu por trece claridad den esaki. No tin suficiente prueba cu e arma ta di A.A. El a pidi Hues pa declara A.A. liber.

ABOGADO

Mr. Arendsz Marchena a bisa Hues pa tene cuenta cu circumstancianan personal di J.T. El a coopera cu e investigacion. E ta un hopi bon hungador di futbol y ta lamenta cu algo asina ta pasa cune. E tabata na Hulanda caba pa mira si e por cay den futbol professional.

Pa loke ta A.A., e abogado ta haya cu no por prueba cu e tabatin e arma den su poder. Na opinion di e abogado, A.A. a desmenti cu e tas tabata di dje. E tas tabata ariba e flanel. A.A. ta bisa cu e tas ta di A.R. y A.R. ta bisa cu no. Mescos cu Fiscal, e abogado ta di opinion cu no tin suficiente prueba cu A.A. tabata den posesion di arma. El a splica Hues tambe cu doño di trabou ta dispuesto warda mira kico e decision di Corte ta, pa asina A.A. por haya su trabou bek.

SENTENCIA

Hues a sera tratamento di e caso y a dicta sentencia di biaha. Hues a bisa cu e ta haya J.T. culpable di tabatin balanan cun’e. Hues a bisa cu e ta tene cuenta cu e cantidad di balanan. El a confirma exigencia di Fiscal y a condena J.T. na castigo di prison igual na loke el a sinta caba y 3 siman di prison extra pero condicional cu un tempo di prueba di 2 aña. Hues a duna orden pa destrui e balanan.

Pa loke ta A.A., Hues ta haya cu tin duda kende realmente ta doño di e arma. El a mustra cu ora a confronta A.A. y A.R. caminda A.A. a bisa cu ta di A.R. e tas ta, A.R. a baha su cabez y no a bisa nada. Hues ta haya cu esaki ta indicacion cu A.R. ta sconde algo. Awor cu Hues tin duda, e no por haci nada otro cu declara A.A. liber y pa destrui e arma.

 

- Advertisement -

DUNA COMENTARIO

Please enter your comment!
Please enter your name here