Home Economia Tayer di trabao “Exportando Creatividad” 2017 hopi exitoso

Tayer di trabao “Exportando Creatividad” 2017 hopi exitoso

11
0
SHARE
- Advertisement -

Exprodesk ta gradici un y tur cu a duna aporte:

ORANJESTAD (AAN) – Durante e conferencia di prensa di Exprodesk, sra. Sharon Meijer a sigui splica cu e musiconan a comparti cu nan e inkietudnan cu nan tin relaciona cu nan produccion. Esaki tabata e base pa organiza e tayernan di trabao aki. E prome tayer di trabao tabata general, y den esaki nan a sinta scucha kico tabata e problema cu nos musiconan tin.

Por ehemplo, nan tabata hopi entusiasma cu exporta nan musica, pero e preguntanan cu nan tabata tin ta si nan ta exporta y distribui nan musica via CD baby con nan ta haya proteccion intelectual. Riba e tema aki a tene un tayer di trabao.

Con pa haya metodo di pago online, un tema riba cual tambe a haci tayer di trabao; con pa haya financiamento pa produci y riba esaki nan a haya un tayer tocante micro-financiamento. Y asina nan ta adapta e situacionnan cu ta bin dilanti y tene tayer di trabao riba e temanan pa e industria specifico ey.

Seguidamente sra. Zulema Dabian-Erasmus a hiba palabra. El a subraya cu mester corda cu aworaki e Departamento di Asuntonan Economico tin dos Unidad cu ta yuda e empresario, cu kier cuminza su negoshi, hopi di cerca y despues, ora cu e por para firme riba su pia. Y tambe tin e Unidad di Exprodesk cu ta yuda e empresario cu kier mira pafo di Aruba, na momento cu e kier exporta su servicio of producto.

Exprodesk a inicia na September 2017 y su prome servicio cu tabata e tayer di trabao “Industria Creativo” pa asina e artista Arubiano por exporta su creatividad.

Loke nan a haci Diahuebs ta entrega e resultado di tur loke a tuma lugar, y e cinco artistanan cu a participa ta haya nan plan di exportacion, cu tin stapnan concreto cu nan por tuma pa asina exporta nan creacion. Tambe lo ofrece e stakeholders cu sin nan cooperacion lo no tabata por a haci e trayecto aki exitoso.

Nan a wordo ofreci un “Aruba Music Industry Profile” den cual ta analiza con e industria creativo ta actualmente na Aruba, y a tuma como ehemplo un pais exitoso cu ta exporta su creacion musical pa asina compara y duna recomendacionnan con na Aruba nos por sigui promove e industria creativo pa asina nan por sigui exporte.

E dama a subraya tambe cu Exprodesk no ta traha su so, pero hunto cu otro instancianan gubernamental y priva y esey ta e intencion pa 2018 tambe.

 

 

 

 

- Advertisement -

DUNA COMENTARIO

Please enter your comment!
Please enter your name here