Home Comentario Te awor un GRITO cu tabata tey caba ta hayando oido

Te awor un GRITO cu tabata tey caba ta hayando oido

31
0
SHARE
- Advertisement -

Comentario:

Pa Mercedes Monge

E siman cu a pasa Aldrich Croes tabata tin un entrevista hopi interesante cu e Terapista di Pareha y Famia, e Trahador di Departamento di Asunto Social sra. Enid de Kort.

Mi a pone hopi atencion na e entrevista aki, conociendo sra. de Kort como un experto cu trayectoria largo y cu hopi sensibilidad; y cu a pone hopi atencion na alerta nos comunidad tocante e sintomanan cu ya caba tabata den desaroyo, di un deterioro social ya cronico, den nos comunidad.

Hopi biaha mi mes persona a entrevista sra. de Kort den mi transcurso di 25 aña den DIARIO. Incluso prome cu eleccion, nos a bolbe topa y toca e tema. Pa di tres biaha den entrevista cu mi, el a elabora riba su proyecto pa DAS bin cu un Seccion di Famia unda lo por acapara e diferente situacionnan cu ta presenta, bao un solo dak, y traha conhuntamente cu e demas partnernan concerni, pa tur bay den e mesun linea di informacion, terapia y ayudo.

Na DAS e preocupacion pa e problemanan cu tin den hopi famia na Aruba ta comparti pa nan tur. Ademas di sra. de Kort mi a yega di entrevista dos di su coleganan y tambe esaki a bin dilanti den DIARIO, mustrando cu e voz di alerta tabata tey caba.

Den un serie di entrevista cu mi a realiza cu Reclassering varios luna pasa, tambe hopi informacion a bin dilanti, cu por a mustra e preocupacion di su director y otro trahadornan social encarga cu diferente proyecto, cu tambe ta haci tur loke nan por cu masha poco recurso y cu un bashi di personal, mescos cu DAS.

Y asina mi por corda mas aña atras cu mi tabata acerca Fundacion Respeta Mi, tambe den entrevistanan tabata wordo mustra cu maltrato di mucha ta sosode na Aruba mas cu nos por kere y no di awo, di tempo bieu caba.

Mi ta puntra mi mes di con awor cu algo asina espantoso mester a sosode cu dos criatura inocente, cu a perde nan bida na un forma asina cruel, accion lo wordo tuma, si e GRITO tabata tey caba for di hopi tempo pasa?

Mi ta sigur cu hopi ciudadano a scucha e entrevista radial cu sra. de Kort y cu por a asimila con serio e problemanan social na Aruba ta, y e necesidad cu tin di berdad pa e departamentonan concerni por haya mas recurso y mas personal pa sikiera abarca un porcentahe mas halto di e problemanan y cu nan por haya e hermentnan necesario pa actua.

Pero tambe mi ta spera cu nos, como ciudadanonan, bira mas conciente cu ora tin algo cu mester denuncia, tin cu haci esaki. Mi ta keda asombra di yamadanan cu ta drenta na nos redaccion, di cual mi a tuma algun por cierto, di cuanto cos aworaki ta bin dilanti cu personanan biba na San Nicolas tabata sa di e caso. Pero no ta mucho laat caba pa bin conta? Mi ta bolbe bisa cu e tarea pa trece cambio no ta di gobierno y su instancianan concerni so, sino principalmente den cada hogar unda e base familiar ta wordo sinta pa lanta yiunan feliz of infeliz, y den e observacion di nos mes como comunidad cu ta scucha, hole, mira, intui y cu awor mester cuminza papia!

- Advertisement -

DUNA COMENTARIO

Please enter your comment!
Please enter your name here