Home Salud Traspaso di PAAZ Afdeling na Instituto Psikiatrico: Un stap dilanti den cuido

Traspaso di PAAZ Afdeling na Instituto Psikiatrico: Un stap dilanti den cuido

16
0
SHARE
- Advertisement -

Director HOH sr. Ezzard Cilie:

ORANJESTAD (AAN) – Diaranzon mainta a tuma lugar e firmamento di e traspaso di e PAAZ Afdeling for di Hospital dr. Horacio Oduber, na Fundacion Respaldo, Instituto Pskiatrico, cual ta un entidad nobo. E hecho aki ta un momento historico pa cuido psikiatrico na Aruba, segun palabranan di e director di HOH sr. Ezzard Cilie.

Tabata presente durante e ceremonia di traspaso aki dr. Hendricus van Gaalen, Psikiatra y Director Medico di Fundacion Respaldo di e instituto nobo.

Drs. L. de Jong,  Director Administrativo di Fundacion Respaldo. Ademas tabata presente Minister di Salud Publico sr. Dangui Oduber y Jerianne Tiel, Office Manager/ Management Assistent.

Director di HOH, a menciona cu esaki ta un momento historico pasobra no menos cu 15 aña pasa, e mesun docter cu a sinta banda di dje durante e acto aki, awe director di e Instituto Psikiatrico a cera cabes pa bay papia cu e Minister di Salud e tempo ey, sr. Booshi Wever.

For di e tempo ey ya caba e cuido psikiatrico necesario no tabata yega na unda cu tin mester. Tabata tin masha cos pa haci y no ta desconoci pa ningun hende cu mester haci algo, Cilie a expresa.

Señor Cilie a referi na un caso masha tristo cu a sosode binti aña pasa den cual un hoben cu problema psikiatrico a mata su mayornan y su ruman.

“Locual a dal duro ora cu e persona aki a bay dilanti Corte, Huez a bisa cu e no por pone e responsabilidad completamente riba dje, pasobra e comunidad Arubiano tambe ta co-responsable pa e situacion cu nos tin na Aruba”, director di HOH a trece dilanti.

Cu otro palabra, segun sr. Cilie, cu nos na Aruba no tin un instituto adecua pa trata hende asina. El a expresa cu ta berdad cu e persona aki a comete un crimen, pero no mester lubida cu e persona aki tabata mentalmente malo y cu no tabata tin e cuido adecua pa dune.

“Bisando esey mi ta realiza con importante, y con contento nos como dirigentenan ta, cu esaki ta un paso grandi cu nos ta tuma pa e fututo, y nos tin e confianza cu esey ta bay bira mihor. Esey ta un parti cu nos no a duna atencion den pasado, y aworaki nos ta bay den e rumbo aki”, sr. Ezzard Cilie a señala.

El a agrega cu e organizacion aki ta hopi nobo, pero e ta bay crece hopi lihe y ta bay adapta su mes na e necesidadnan di e categoria di pacientnan aki.

Aruba ta tuma un stap mas dilanti den cuido medico aunke no tur cos ta cla, ta falta mas pa bin, director di HOH a expresa. Seguidamente dr. Van Gaalen, director di Fundacion Respaldo, Instituto Psikiatrico a hiba palabra.

 

 

 

- Advertisement -

DUNA COMENTARIO

Please enter your comment!
Please enter your name here