Home Parlamento Veldnan deportivo mester haya ayudo

Veldnan deportivo mester haya ayudo

36
0
SHARE
- Advertisement -

Endy Croes : 

Entre otro veldnan di Kudawecha, Sportclub United y Sabana Grandi

ORANJESTAD(AAN)— Durante Conferencia di Prensa diaranson mainta na CEDE di MEP Parlamentario Endy Croes a elabora tambe riba algun planes pa 2018. Despues di a critica gobierno anterior al respecto e maneho financiero desastroso cu nan a hiba, Parlamentario Croes a splica cu lo ta bon pa trece tambe cosnan positivo.

“No obstante ta “prohibi pa lubida” locual e gobierno anterior a haci cu e noble pueblo. Den aña 2018 aunke e posicion financiero limita lo mester percura pa Deporte haya su fair share y cuminsa poco poco pa inverti bek den infrastuctura pero alaves den nos atletanan y “coaching staff” pa asina por eleva calidad di nos deporte.

Riba infrastructura un veld cu lo mester haya un atencion inmediato ta veld di Kudawecha. Desde Maart 2017 nan a baha nan lusnan pa mantencion door cu esakinan tabata den un situacion peligroso y a actua preventivo pa evita cualkier accidente.

Sin mas a aserca gobierno anterior pa un ayudo di alrededor Afl.30.000 pa asina reemplasa tur e lusnan pero no a haya oido e tempo aya. Kudawecha ta un di e veldnan mas tanto uza den Noord pa locual ta trata deporte di Softball y Baseball Little league.

Otro cancha den Noord cu ta rogando pa iluminacion ta Sportclub United cu ta dedica masha hopi na muchanan desde edad chikito categorianan 5-7, 8-9 aña, Sub 11, Sub 13, Sub 15, Sub 17 y 18 aña bay ariba y tambe damas. Un total di  alrededor  200 atleta. Pues aki tambe mester un ayudo.

Veld na Sabana Grandi tambe mester di iluminacion y lo percura pa pone e wiel cuminsa draai pa cu e proyectonan aki. Claro tin hopi veld cu necesidad. Lo prepara pa reuni cu directiva di tur veldnan y asina scucha nan necesidad y traha esaki den un plan structural. Pista di Palo Marga tambe mester iluminacion y retoca e pista mes pa asina esnan cu ta practica deporte por continua cu un deporte hopi gusta y cu hopi fanatic”.

Parlamentario Endy Croes a sigura cu Fraccion di MEP den Parlamento lo percura pa Gobierno y Lotto pone esaki como prioridad den lista di veldnan of facilidadnan deportivo cu mester atencion.

“Lo yena nos cu orguyo pa por inverti di tal forma cu nos lo kita muchanan for di caya brindando nan e oportunidad pa practica deporte y aporta di e manera aki positivamente na comunidad di Aruba”. E Parlamentario a bisa.

 

- Advertisement -

DUNA COMENTARIO

Please enter your comment!
Please enter your name here