Home Social Voogdijraad su tarea ta pa proteha e mucha unda mayornan no por...

Voogdijraad su tarea ta pa proteha e mucha unda mayornan no por zorg pa esaki

107
0
SHARE
- Advertisement -

Director sra. Aisca Barkmeyer:

ORANJESTAD (AAN) — Voogdijraad ta un punto di critica basta grandi y nan ta consciente cu nan ta un di e actornan importante pa trece e solucionnan den diferente problema cu ta envolve mucha y famia.

Sra. Aisca Barkmeyer, directora di Voogdijraad ta elabora tocante e tema, den entrevista cu Matutino DIARIO.

“ Nos ta consciente cu nos ta un di e actornan importante pa trece solucionnan. Nos tin e tarea di proteha e menornan, caminda cu e mayornan no por brinda esaki. No ta secreto tampoco, cu tin algun punto cu Voogdijraad ta haya nan enfrenta cune, ora nos ta haya casonan di abuso sexual, maltrato y negligencia. Tin un lista di espera pa por ubica menornan di 12 aña bay ariba. Por drenta den un caso, pero si bo no por saca un menor for di e situacion, e ta keda dificil” sra. Barkmeyer a indica.

Tin algun tools y nan a trece e puntonan aki dilanti. E no ta un cambio cu por bin den un, dos tres, ya cu e ta un problema di hopi aña.

“Otro problema ta cu Voogdijraad a traha cu tiki personal y tin kehonan cu durante añanan a keda acumula y nos ta purbando pa yega na haal in e partinan aki. Pero e no ta facil, pa bo soluciona of interveni den un situacion di un menor, si realmente bo no por soluciona esaki”, segun Sra. Barkmeyer.

“E cambionan principal cu ta bay sinta ta interdisciplinario, di manera cu ora un caso pega, conhuntamente cu otro instancianan, por sinta hunto y wak den un combinacion di nos tur, por yega na un solucion pa e famia. Den otro casonan, no tin un quick fix cu awo tur cos ta wordo soluciona. Ta purba na pasa, principalmente, den cada un caso cu ta wordo denuncia cerca nos” el a agrega.

Cada un mucha cu ta pasa door di un situacion penoso, ta uno di mas. “E mester ta duidelijk cu tur ta para pa e mesun meta cu abuso den cualkier forma, ta inaceptable”, e dama a subraya.

Mester pensa riba con ta brinda e ayudo necesario, den caso  cu e mama ta cana full su caminda pa busca ayudo.

“No tin lugar pa ubica e menornan den OC por ehemplo. Esey ta impedi caba hopi manera cu por traha den dje. Den Voogdijraad, cu e mama ta cana su caminda, esey nifica cu e ta un caso pa nos. Mester compronde kico ta e rol di Voogdijraad. Nos ta haci en todo caso, investigacion, si e ayudo ta den un cuadro boluntario, si e mayornan a cana caminda of no a cana caminda di busca ayudo y e no a soluciona e problema di e mucha. E ora nos mester haci investigacion pa wak, si por saca un medida di proteccion, caminda e mayornan ta wordo obliga pa sigui un trayecto di ayudo.

Nos, como Voogdijraad, no ta duna e ayudo ey na e personanan; nos ta zorg pa saca e medida di proteccion pa e menor haya e seguridad cu su mayornan, obligatoriamente, ta bay sigui e trayectoria di ayudo. Pasobra, na final di dia, e realidad ta cu cada mucha ta desea y tin e derecho di lanta den su hogar. Nos ta purba pa crea atravez di e medida di proteccion, un caminda, un trayectoria cu al final e mucha por desaroya su mes den su seno familiar. Esey ta nos obhetivo”, sra. Barkmeyer a subraya.

Tin un lista di espera di casonan di añanan anterior y si kier yuda cada un di e muchanan aki, pa un temporada sigur di un pa dos aña Voogdijraad mester di mas personal pa atende esaki. Fundacion “Sostenemi ta bay wordo ancra den ley, y tur e meldingnan cu nos tin actualmente, nan ta bay traha riba nan. Voogdijraad y Departamento di Asunto Social ta bay haya un presion hopi grandi pasobra ta bay bira duidelijk ki caminda y trayecto mester traha.

Pa soluciona e problema den un manera structural, den e proximo dos pa tres añanan, tur e departamentonan mester ta ekipa cu personal. E luga pa pone e mucha mester t’ey. Famianan di crianza, cu si no tin e posibilidad pa pone e mucha den internado, un famia por cuida di e muchanan.

Famianan cu no solamente ta meld pero tin ora mayornan pa un tempo defini no por handle nan situacion. “E lo ta bon si den famia lo por vang op e muchanan, si nan como mayor por traha riba na situacion, pa duna e mucha e oportunidad pa lanta den un famia sigur”, director di Voogdijraad, sra. Barkmeyer a conclui.

 

 

- Advertisement -

DUNA COMENTARIO

Please enter your comment!
Please enter your name here