Home Hudicial Cuatro Chines y nan ‘banco ilegal’ na Aruba tabata yuda narcotraficantenan

Cuatro Chines y nan ‘banco ilegal’ na Aruba tabata yuda narcotraficantenan

3641
0
SHARE
— E anochi cu autoridad a tene razzia na un Supermarket.
- Advertisement -

ORANJESTAD (AAN): Tabata na November 2015 cu Autoridad Hudicial como tambe Autoridad di Impuesto a tene razzia na dos supermarket di comerciantenan Asiatico.  Uno den Caya Ritmo y e otro na Santa Helenastraat.

Esey tabata djis e comienzo di un investigacion grandi cu a start, simplemente danki na un otro investigacion andando encuanto traficacion di droga.

A bin descubri, cu aparte di e caso di droga aki, tin un caso di labamento di placa y hasta un ‘banco ilegal’ trahando scondi y cobrando su porcentahe tambe.

Ministerio Publico a revela, cu e siman aki porfin e caso aki a yega dilanti Huez:

Corte den prome instancia di Aruba a trata riba Dialuna y Diamars 22 y 23 di januari un caso penal contra cuatro persona, cu ta worde sospecha di actividadnan bancario ilicito (ondergronds bankieren) y labamento di placa.

Den e caso aki, cu yama “Hamburg”, cuatro persona di descendencia Chines a worde persigui, pa motibo cu nan tabata manda sumanan di placa desde Aruba pa China (principalmente) y di Aruba pa Sint Maarten y Anguilla riba gran escala.

Tin di e sumanan aki cu tabata relativamente chikito, pero frecuentemente tabata trata di sumanan hopi grandi mes.

Un di e personanan ta worde alavez sospecha di tabata coordina transferencianan grandi di placa pa China y Aruba pa hende na Suriname, Colombia y Venezuela.

Alavez tabata cambia sumanan di placa riba gran escala. Segun Ministerio Publico, comisionnan ilegal tabata worde gana cu e transfercianan y e cambiamento di cent. Dos di e sospechosonan tabata inverti e ganashinan aki den (entre otro) inmobilario.

Ley ta stipula cu actividadnan bankero, transferencia di placa y cambio di placa por solamente worde haci pa instancianan cu permiso of autorizacion di Banco Central di Aruba.

Esey ta pa ta crea un sistema di supervision riba trafico financiero, cu na esun banda ta garantiza proteccion di e consumidor contra instancianan financiero grandi, y na e otro banda ta boga pa garantiza integridad di e sistema financiero.

Di e manera aki ta evita cu e sistema financiero di Aruba por worde malusa pa personanan criminal, cu ta dispone di placa di procedencia sospechoso of dudoso y ta busca pa laba placa.

E caso en cuestion di actividadnan bancario ilicito a sali na cla den un investigacion anterior di droga, den cual investigadornan a wak con e sospechosonan den e investigacion ey, tabata haci uso di servicionan di un di e sospechosonan den e caso Hamburg.

E sospechoso aki tabata cambia placa pa e sospechosonan den e investigacion di droga of tabata manda cent afo pa nan.

Tambe a keda constata cu placa cash tabata worde manda pa exterior, sin cu tabata haci denuncia na Aduana manera ley ta prescribi.

E ora a cuminza un investigacion contra e sospechoso aki. RST tabata encarga, bao guia di Ministerio Publico. E investigacion a dura un aña y mey.

E investigacion Hamburg a mustra cu dos di e sospechosonan tabata hiba actividadnan bancario ilicito extenso y transnacional.

Casi tur siman y pa periodo largo tabata manda sumanan di entre 500 Dollar y 100.000 Dollar pa exterior.

Tabata cobra comisionnan di 5%, pero tin biaha te 8%.  Debi na esey (asina autoridad ta sospecha) tabata genera entredanan ilegal den cash hopi grandi.

Den cuadro di e investigacion a tuma sumanan den cash grandi den beslag durante razzianan na cas.

Cu e entradanan aki tabata cumpra y paga (entre otro) activonan fiho.

Ora tabata paga terceronan, tabata paga e terceronan aki parcialmente den cash, y despues e terceronan tabata pone e placa aki back riba cuentanan bancario di e sospechoso.

Siguientemente e activonan fiho tabata worde paga desde e cuentanan bancario ey.

Asina tabata aparenta cu e cent tabata worde presta di e terceronan, mientras cu en realidad, e cent tabata di e sospechosonan mes.

Segun Ministerio Publico, ta pa e razon aki cu, banda di e sospecho di actividadnan bancario ilicito, a bin tambe e sospecho di labamento di placa.

A exigi castigonan di prison y multanan grandi contra tur e sospechosonan. Huez lo dicta sentencia riba 6 di maart 2018.

Ademas Ministerio Publico tin planea pa traha un informe pa gobierno, den cual e problematica di actividadnan bancario ilicito lo worde describi y lo bin cu cuadronan dentro di cual e problematica aki por worde combati structuralmente

- Advertisement -

DUNA COMENTARIO

Please enter your comment!
Please enter your name here