Home Gobierno “Cumpli cu bo capricho politico no kiermeen pone e ser humano central”

“Cumpli cu bo capricho politico no kiermeen pone e ser humano central”

107
0
SHARE
- Advertisement -

GOBIERNO DI ARUBA:

Prome Minister Evelyn Wever-Croes na Mike Eman:

ORANJESTAD(AAN)– Prome Minister Sra. Evelyn Wever-Croes ta lamenta cu Gobierno actual ta wordo tilda di hopi cos den e periodo cortico cu tin ta goberna nos pais.

Especialmente pa e ex mandatario Mike Eman cu den su declaracionnan a tilda e Gobierno aki di no ta pone e ser humano central.

Aki ta unda cu Prome Minister a pone e declaracion aki di Mike Eman den contexto bisando cu si pa Mike Eman complace cu su capricho politico ta pone e ser humano central y laga esnan mas vulnerabel den nos comunidad sigui sufri, e ta bastante ekiboca ora e ta bisa cu p’e ser humano ta central.

Ademas Prome Minister ta bisa cu e ta kere cu Sr Mike Eman den su declaracion a bay un paso demasiado leu na momento cu el a bay ataca hefe di departamento bisando:

“Mi kier bisa na Sr. Eman esaki: e politico ta “ami”, e politico ta “abo”. Si bo tin algo di bisa, mi ta reta bo, ban papia di dje. No core manera bo a core pa debatenan politico. Ban debati nos dos. Laga e hefenan di departamentonan kendenan ta profesionalnan afo. No baha bo mes na e nivel pa ataca hendenan cu bo sa cu no por contesta bo bek. Para den bo sapato y acepta mi reto y ban debati riba e tema aki.

Bin Bestuurskantoor y nos lo papia con bo decisionnan descabeya pa privilegia cierto hendenan a hinca e pais aki unda e ta. Cu nos a paga e prijs carisimo cu dos mucha a wordo mata cruelmente. Esaki ta loke bo persona, Mike Eman a haci cu e pais aki”.

Prome Minister ta enfatisa cu Gabinete Wever-Croes a bay p’e cambio y lo percura pa e cambio bin y wordo sinti tur caminda. Y si e cambio kiermeen cu tin pa pone ordo den e desorden aki, esta cumpli cu maneho, cumpli cu regla y cu palabracionnan di CAFT, nos lo haci’e. Y cu Mike Eman kier of no kier, e menasa of no menasa nos. Nos tin un mision. Pone e ser humano central di henter Aruba y no sigui paga e mal maneho di Gabinete Mike Eman.

E mandatario a agrega cu esnan envolvi cu a haya un carta, a splica nan exactamente kico a pasa. E hefenan di departamentonan a haya un carta cu ta splica nan kico ta e situacion na unda nan a wordo bisa tambe cu si nan ta kere cu e decision aki ta basa riba un ekibocacion of si ta hendenan cu nan tin mester den nan organisacion y cu a pasa e procedura di solicitud normal, tin un vacatura pa e puesto y si el a wordo yena pa e persona corecto cu sa di e trabou, Gobierno di Aruba lo reconsidera e decision pasobra nos intencion ta pa percura pa den e cuerpo di ambtenaar tin hendenan cu ta traha cu por cu e trabou.

Esaki ta conta pa tur hefe di departamento y ya caba a haya peticion di algun di nan. Tur te ainda ta admiti e eror door di Gobierno di Mike Eman cu no a regla e asunto di e hendenan aki na tempo y cu esaki a causa un problema pa e hendenan aki. Y toch ta e mesun Mike Eman a crea un ambiente politico cu esaki.

Prome Minister Evelyn Wever-Croes a haci un apelacion riba esnan concerni pa no permiti di wordo lastra den e lodo cu nan ta lastra nan mes. Semper tin caminda pa cana. Y Gobierno di Aruba semper tey pa yuda, locual a wordo poni den e carta tambe. Pasobra pa e Gobierno aki, e ser humano ta central.

Na Mike Eman, Prome Minister Evelyn Wever-Croes a bisa:

“Si di berdad bo tin e pais aki na pecho, si di berdad bo tin e personanan aki na pecho, drenta Parlamento y defende y representa bo votadornan. Para un banda y grita y sapatea, no ta opcion. Ora di yega e momento di berdad, bo ta core, esaki no ta yuda ningun hende”.

Prome Minister a termina bisando: “Nos pais tin retonan hopi grandi. Esaki ta algo cu ta ni compara cu e retonan nos dilanti ainda. Ora cu e dos criaturanan a perde nan bida asina cruel, ta nos sistema a faya di detecta esaki. Nos tur por a sinti cu por a haci algo pa evita esaki, pero e no a wordo haci. Esaki a cambia henter e perspectiva. Awo aki, tur hende ta wak dilanti cu e miras pa e cambio cu lo trece progreso y bienestar bek pa nos pais”.

 

 

- Advertisement -

DUNA COMENTARIO

Please enter your comment!
Please enter your name here