Home Gobierno Den reunion cu Odinsa ta trata di purba evita mas tanto problema...

Den reunion cu Odinsa ta trata di purba evita mas tanto problema posibel pa pais Aruba

184
0
SHARE
- Advertisement -

Minister Otmar Oduber:

ORANJESTAD (AAN): E halto ehecutivonan di Odinsa ta na Aruba y prome reunion cu negociadornan di Pais Aruba a tuma lugar.

Durante di e conferencia di Prensa di Gobierno Minister di Infrastructura Otmar Oduber  a elabora y a duna un update riba e situacion di Green Corridor. Odinsa su Alto ehecutivonan a yega Aruba y e prome reunionnan a cuminsa tuma lugar.

Situacion

Manera ta conoci, den cuminsamento di aña a worde sorpresa cu e informacion cu tin e proyecto di Green Corridor cu cierto momento desde aña pasa, a drenta den un estado di ta un risico pa bira un proyecto cu tabata den crisis.

Consecuentemente a yama un reunion den Parlamento pa por aclarea/ splica Parlamento di Aruba di e situacion y alavez pidi apoderacion pa por yuda den e proceso cu tin andando (recovery mode), pa recobra parti y salba parti di e proyecto.

Durante di e encuentro den Parlamento a trece diferente carta dilanti pa evita e discusion di cu kisas ta hunga politica cu un proyecto di un magnitud grandi. Tambe a presenta diferente carta cual a pone disponibel pa miembronan di prensa mira. Den un di e cartanan aki ta mira cu e compania cu ta representa Odinsa na Aruba, esta Caribbean Infrastructure Company (CIC) a dirigi un carta pa Pais Aruba (DOW, kende ta guia e proyecto), pa mustra cu nan financiadornan ta dunanan un ‘deadline’ pa un reunion tuma lugar.

Tambe den e carta ta indica cu si cos no bay bon, nan ta saca nan mes for di e proyecto aki, a base di e acuerdo di credito cu nan tin cu e proyecto aki. Minister Oduber a splica cu e informacion aki a worde treci na su conocemento na cuminsamento di e aña aki. Si esaki sosode Odinsa/CIC lo exihi pago for di Pais Aruba pa e producto infrastructural cu nan tin aki na Aruba.

E contract tabata uno di servicio y nunca tabata e intencion cu nos lo paga pa ricibi un proyecto/ producto, sino un servicio di mantencion pa 18 aña. Sinembargo pa motibo di e fayonan cu tin di parti Odinsa/CIC y nan financiadornan, e proyecto a drenta den un crisis, pa cual a pidi Pais Aruba pa por yega na un posibel solucion pa evita esaki.

‘Por a scoge pa no haci nada cual ta significa cu automaticamente ta yega na e punto ariba menciona cu Gobierno lo mester paga locual cu tin poni como producto, pa motibo cu nan no por coy e brug of caminda bay cu ne. Cu tur e riesgo cu esaki ta bin cu ne, como cu no sa kico exactamente ta hayando como producto.

Esaki ta haci cu Pais Aruba ta keda responsabel tambe pa e mantencion pa e proximo 17 añanan tambe. E otro opcion tabata pa drenta den ‘recovery mode’ cual ta e fase cu a drenta actualmente  unda cu ta sinta na mesa cu Odinsa. Esaki ta e recomendacion cu a bin for di tur e institutonan.

Pues no ta Pais Aruba ta dicidi cu e proyecto ta den crisis sino, Independent Entity Engineering cu a worde busca for di tempo cu a cera e contract tambe a recomenda esaki. Hunto cu PwC cu tabata e expertonan di afo cu a worde busca desde augustus 2016, a recomenda pa bay e caminda aki. Pa haci e daño na Pais Aruba, menos cu ta posibel.’

E reunionnan aki a cuminsa, alto ehecutivonan di Odinsa ta na Aruba y e prome reunion a tuma lugar cu e team negociador di Pais Aruba cu ta worde representa pa DOW y su team. E financiadornan hunto cu AIB ta reuniendo cu e dos partidonan pa mira si tin intencion pa por yega na un solucion.

Si e reunion inicial aki bay bon, ta duna te cu 14 di februari un indicacion di Aruba y Odinsa si nan ta mira cu por yega na un entendimiento. Si esaki no tuma lugar, inmediatamente e financiadornan lo ‘pull the plug’. Si esaki tuma lugar, esaki ta hiba Pais Aruba back na e prome opcion menciona.

Si nan keda satisfecho cu e prome luna di negociacion, nan lo duna te cu augustus, pa por yega na un conclusion definitivo. Pasobra si na e momento ey nan no yega na un conclusion definitivo, esaki ta significa cu e financiadornan lo no pone Odinsa responsabel mas, sino Pais Aruba tambe ta worde poni responsabel conforme e carta cu tin riba mesa na e momentonan aki y segun e contract cu tin, Minister Oduber a splica ampliamente.

Concluyendo Minister Oduber a enfatisa cu aki ta trata di purba evita mas tanto problema cu ta posibel pa Pais Aruba. ‘Ta yuda Odinsa pa yuda nos mes, pasobra si no yuda Odinsa esaki lo perhudica Pais Aruba kisas dobel den henter e proceso aki. A scoge un caminda serio, buscando profesionalnan adicional pa por medio di e proceso, por evita cu e perdida pa Pais Aruba ta di un significacion mas grandi di loke ta pensa na e momentonan aki.

 

- Advertisement -

DUNA COMENTARIO

Please enter your comment!
Please enter your name here