Home Comentario E beneficiarionan di SVb Curacao biba na Aruba tambe por defende nan...

E beneficiarionan di SVb Curacao biba na Aruba tambe por defende nan propiedad!

29
0
SHARE
- Advertisement -

Comentario:

Pa Mercedes Monge

Na nos redaccion a drenta algun comentario di beneficiarionan di AOV cu ta ricibi un parti di nan pension for di SVb Curacao, y mi tin entendi cu cerca director di SVb tambe, a drenta varios reaccion di pensionadonan concerni, cu a lesa su entrevista cu Matutino DIARIO unda Ir. Jacobs ta splica kico ta para den e ley, cu ta basa riba e Tratado Europeo di Derechonan Humano (EVRM).

Den corto, articulo 1 cu ta bisa cu e pension di behez ta un propiedad ora e persona no ta asegurado mas pero ta bira beneficiario. Articulo 14 ta bisa bon cla cu no mag discrimina cu e pension.

Ta obvio cu SVb Curacao ta discrimina for di momento cu a elimina e bonus di e pension, for di December 2016 y a baha 10% di e suma di pension entrante Januari 2017, y atrobe e aña aki e mesun porcentahe, solamente pa e grupo di beneficiarionan cu ta bibando den exterior.

Segun informacion cu nos a ricibi, e grupo cu a emigra of a bay biba bek na Bonaire, a lanta un caso contra SVb Curacao aña pasa y nan a gana esaki. Corte a dicta na nan fabor. Si SVb a devolve nan loke a kita for di nan ta un informacion cu mi no a haya.

Aparentemente, tambe e beneficiarionan concerni biba na Hulanda a lanta un Caso cu tambe nan a gana. Pero esaki ta informacion cu a yega na nos mesa di redaccion door di yamada.

Tin indicacion cu tanto na Bonaire como na Hulanda, e beneficiarionan di SVb Curacao a uni. Union ta haci forza sin duda algun. Pero na Aruba, na unda tin como 500 beneficiario di SVb Curacao, e grupo a guli manda abao, pasobra un par a purba di wak e posibilidad di bay Corte pero e costo ta demasiado halto y a give up.

Un frase bunita cu mi a scucha for di director di SVb ta “e poder di cabey blanco”. Ohala e grupo aki di e poder di cabey blanco na Aruba, esta e beneficiarionan afecta pa SVb Curacao uni den un solo voz y no importa con largo e caminda ta, busca un abogado (mester tin uno cu no ta asina materialista pero cu tin un quote di humanidad), cu por yuda pa nan haya e forza pa bringa pa nan derecho, of cana e ruta di Crowd Funding, si tin e posibilidad na Aruba.

Via Corte so por dicidi si SVb Curacao a atene su mes na e articulonan 1 y 14 di EVRM, esta cu pension ta un propiedad di e beneficiario y cu discriminacion ta prohibi pa e ley aki. Esaki ta un ley cu ta conta pa Reino Hulandes, kiermen ta suppose cu pa Curacao tambe ta conta!

 

 

- Advertisement -

DUNA COMENTARIO

Please enter your comment!
Please enter your name here