Home Parlamento E metanan di Nacionnan Uni ta coresponde cu e filosofia di MEP...

E metanan di Nacionnan Uni ta coresponde cu e filosofia di MEP pa pone e ser humano central

3
0
SHARE
- Advertisement -

Parlamentario Setty Christiaans-Yarzagaray:

ORANJESTAD (AAN): Durante e conferencia di prensa di fraccion di MEP, parlamentario Setty Christiaans-Yarzagaray a elabora riba e topico SDG (Sustainable Development Goals) cu ta parti di e metanan di Nacionnan Uni, unda mas cu 150 pais a firma un acuerdo pa bin cu un set di 17 meta y cu tin e proposito pa logra un desaroyo sostenibel na 2030.

Conferencia di ECLAC:

Señora Christiaans-Yarzagaray a trece padilanti cu e siman aki mes tin e conferencia di ECLAC (Economic Commission for Latin America) organiza na Aruba, caminda e organizacion aki ta asisti Aruba y tin e obhetivo pa pone nos pais den e bon direccion y p’asina nos por logra cumpli cu e metanan di Nacionnan Uni.

Algun di e metanan aki ta cu lo no mester existi pobreza ni hamber mas den un pais y tambe cu e calidad di bida di e ser humano mester worde bon sirbi. Pa un pais esaki ta e conexion cu mester existi entre e ser humano, naturaleza y e parti economico. Tur e metanan aki ta cuadra cu e filosofia di MEP na unda cu nos partido tambe ta pone e hende central.

Diversificacion di economia:

Señora Christiaans-Yarzagaray kier wak con nos como pais por aporta pa logra e metanan aki ya cu nan ta cuadra cu nos obhetivonan. Tambe  el a trece padilanti e situacion cu a surgi recientemente entre Aruba y Venezuela, caminda nos pais ta ser afecta tanto riba e parti turistico como economico.

Pero señora Christiaans-Yarzagaray ta mira henter e parti aki tambe como un oportunidad, ya cu esaki lo conduci na diversificacion di nos economia y ta stimula creaccion di mas industrianan chikito.

Pa duna ehempel, e sector di agricultura, caminda cu un escasez na fruta y berdura ta un estimulo pa nos mes produci e productonan aki. Tur esaki ta parti di e metanan di SDG caminda nan ta  purba stimula paisnan pa produci nan propio cuminda. Pues un oportunidad unico ta yegando na nos tambe pa ban cuminsa stimula, crea, diversifica y fortifica nos economia.

Coleccion di datonan:

Finalmente el a trece padilanti cu e reunion di ECLAC di e siman aki ta mas tanto enfoca riba datonan, esta con e coleccion y sistema di datonan ta na Aruba. Nacionnan Uni ta pensa cu mester por controla e coleccion di datonan y p’asina tin un bista si tur pais ta canando den e mesun direccion.

Ta e intencion di señora Christiaans-Yarzagaray pa bin cu un comision extraordinario den parlamento pa cu e tema aki. Lo duna e atencion necesario y aporta mas tanto posibel pa cumpli cu e metanan aki tambe.

- Advertisement -

DUNA COMENTARIO

Please enter your comment!
Please enter your name here