ORANJESTAD (AAN): Recientemente a tuma lugar un conferencia di prensa, unda cu director di ATA Ronella Tjin A Sjoe a presenta e resultadonan di turismo di 2017 y locual por wordo spera pa 2018.
E director di ATA a splica cu na 2016 tabata tin algun reto pa nos turismo, cu ta inclui e hecho cu na comienzo di 2016 e winter den parti Noord oost di Merca tabata leve.
Esaki a pone cu menos di nan a dicidi di bay Aruba.
Banda di esaki e dificultadnan na pais Venezuela a continua.
Algo cu tabata un reto tambe na 2016 tabata e virus di Zika cu a afecta Caribe, incluyendo Aruba.
Segun Tjin A Sjoe, ora cu bo wak e resultadonan di turismo pa 2017, bo por bisa cu turismo di Aruba por lo general a sobresali, no obstante e retonan cu tabata tin.
“E retonan ta inclui un continuacion di e situacion na Venezuela, pero e horcannan cu a afecta Caribe na 2017, a duna beneficio na Aruba na final di aña”.
“Esaki, mientras cu ya turismo na e momento ey tabata indicando resultadonan fuerte pa e aña ey”.
Esaki segun Tjin A Sjoe, kende a sigui bisa cu si tira un bista riba e 4 metanan cardinal pa turismo di Aruba, pa loke ta 3 di e metanan aki, e resultadonan ta mustra cu a surpasa locual a wordo stipula pa aña 2017.
“Si nos tira un bista pa loke ta 4 di e indicadornan aki y nos enfoca riba esunnan cu ta duna nos un refleho di con ingreso y rendimento di turismo pa pais Aruba a desaroya, nos por mira cu e dos indicadornan aki a surpasa e metanan stipula”.
Esaki segun e director di ATA, kende a sigui bisa cu Banco Central a mustra cu te cu mitad di aña pasa, e cantidad di asina yama ‘repeat guests’ a aumenta cu 4.8%, compara cu 2016.
El a sigui bisa cu ATA ta proyecta cu e aña lo cera tambe conforme e tendencia cu a wordo mira pa comienzo di e aña.
E meta tabata pa logra un crecemento di 1%, pues e hecho cu e crecemento tabata di 4.8% ta un hopi bon logro pa nos isla.
Pa loke ta e otro indicador cu ta e rendimento pa camber, e meta stipula hunto cu AHATA tabata di un crecemento di 3.5% compara cu 2016, mientras cu a cera e aña cu un crecemento di 10.6%.
“Por mira cu e rendimento di camber registra aki na Aruba aña pasa, tabata esun mas fuerte den Caribe pa e aña”, segun e director di ATA, kende a sigui bisa cu e total di crecemento di turista di barco crusero pa aña pasa tabata uno di 20.8%.
Asina a surpasa e meta stipula di 5% di crecemento.
Un otro indicador, esta esnan cu a bishita Aruba cu avion, tabata tin un meta aña pasa di logra un crecemento di 1%, mientras cu a cera e aña cu un bahada di 2.9%.
Locual sigur a hasi un impacto riba esaki, ta e situacion na Venezuela, segun Tjin A Sjoe.
Turismo for di Merca di otro banda a aumenta cu 10.7%, mientras cu turistanan for di tur otro destinacion na Europa y Latino America sin conta Venezuela tambe a aumenta.
