Home Comercio E mihor decision pa caba cu e problema cu Venezuela ta cera...

E mihor decision pa caba cu e problema cu Venezuela ta cera full e waf chikito di Barcadera

350
0
SHARE
- Advertisement -

Sr. Hubert Dirksz, director di Compra NV:

ORANJESTAD (AAN) — Sr. Hubert Dirksz, director di COMPRA NV, tin un contesta hopi radical tocante e solucion na e problema cu Venezuela: “Cera full e waf! E Barcadera chikito unda e barkitonan ta yega. Ta cos di mal calidad so nan ta trece”!, el a expresa.

El a agrega cu ultimo tempo den cada skina di Caya un truck ta para unda nan ta bende producto, sin ningun control, sin paga ni un sorto di belasting, e productonan no ta wordo wanta refrigera, loke nos ta yama cadena di cuido, y no tin ningun autoridad cu bisa nan no por!

El a comenta cu tin hende ta mira esaki como un cultura.

“E no ta un cultura. E cultura bunita di Aruba tabata e tempo di e waf na Playa, cu tabata un sorto di mercado popular.

Esey a wordo kita diez aña pasa pa pone popchinan di palo di Haiti. Anto esaki ta un di e resultadonan di un mal decision, pero nos por bin bek.

Si nos kier baha prijs di fruta y berdura pa pueblo bo mester bin cu un mercado popular atrobe. Tur pais na mundo tine. E unico pais cu no tin un mercado popular pa fruta y berdura ta Aruba”, sr. Dirksz a expresa.

E kiermen, logicamente, un mercado popular fiho pasobra esun di Curacao ta un biaha pa luna so. Un mercado manera esun di Curacao, cu ta locual nos tabata tin den pasado den waf chikito na Oranjestad.

Hulanda, Suriname, cada un tin su mercado popular y hasta Bonaire tin uno chikito. Pero den henter e Reino ta Aruba so no tin, comosifuera nos no mester.

Nos a puntra sr. Dirksz si el a acerca Gobierno tocante e situacion mes, y el a contesta cu si, pero nan no ta dune un siguranza kico ta bay pasa. Incluso a puntra gobierno ta di con no ta cera e waf di Barcadera, pero e contesta ta cu tin hopi factor cu ta hunga un rol, incluso cu Hulanda no kier pa surgi un guera di palabra y di actitud.

“Nos por compronde, pero mientras cu nos no haya un siguranza kico ta bay pasa den futuro, mi ta puntra: Kico lo bay pasa den futuro? Nos kier sigui pasa den e situacion aki? Sigur cu ningun di nos kier esey!” e empresario a menciona.

E ta haya ta lamentable cu na e momentonan aki ningun supermercado por ofrece salada di awacati cu e cliente ta pidi, pasobra tin mas di dos siman cu no tin awacati riba mercado, siendo cu Santo Domingo ta cla pa manda pa nos. Finalmente el a bolbe lanza e pregunta: “Nos kier sigui biba asina?”

 

 

 

 

 

- Advertisement -

DUNA COMENTARIO

Please enter your comment!
Please enter your name here