Entrada di Arubus for di Aruparking a baha di 30 mil pa 8 mil florin pa siman

    307
    0
    SHARE
    - Advertisement -

    ORANJJESTAD (AAN): Aruparking ta un compania cu a wordo lanta pa yuda Arubus haya un entrada extra, cual ta bini di loke e ciudadanonan ta paga pa parkeo. Den combersacion cu Teo Croes, e director di Arubus, el a bisa cu ainda Aruparking no ta funcionando manera debe ser.

    Arubus ta hayando un entrada semanalmente for di e compania aki. Un parti ta bini di e ciudadanonan cu ta paga pa parkeo y e otro ta bini di autonan mal para cu ta wordo getakel. Aworaki tin un ley cu ta bisa cu tur hende mester paga, pero no tin sancion.

    Tin un proposicion di Departamento Huridico cu a wordo manda pa e anterior Prome Minister, pero no a haya contesta. Pa awor, e director a bisa, e situacion ta status quo y di otro banda, e no tin idea ainda kico pensamento di Gobierno nobo ta riba Aruparking. Esaki ta un di e puntonan cu e lo kier discuti cu e Minister riba dje durante nan reunion.

    E falta di entrada di Aruparking aki tambe sigur ta afecta Arubus. Aworaki, Croes a bisa cu nan ta cubriendo nan gastonan net-net. Tin algun gasto atrasa cu a wordo firma door di e anterior Minister cu e compania lo haya, te ora cu e ley di Aruparking keda completamente cla. Pero e suma aki no a wordo ricibi te ainda.

    E situacion cu a surgi ta cu awor e trahadonan di caya mes ta uzando e espacionan blanco y hopi no ta pagando e vaknan geel, cual ta otro parti di entrada cu Aruparking a perde. E ta haci e situacion dificil pa clientenan cu no tin accesibilidad pa caya grandi. A haya varios carta di comerciantenan pidiendo pa pone klem bek.

    Loke cu ta haci awor ta control riba e parkeamento malo, esta autonan parkea riba acera of den vaknan geel, siendo cu no ta paga pa luna, of para na skina. E autonan aki ta wordo getakel.Esaki ta un entrada importante cu a bay perdi. El a baha di 30 mil florin pa siman, pa 15 mil y awo apenas 8 mil florin ta hayando pa siman. Si e suma aki sigui cay, e compania ta bay haye den problema.

    Arubus tin un plan den cual a inclui sugerencianan pa Aruparking tambe. Un di esakinan ta pa varia e tarifanan y un tarifa apart pa autonan di huur.

    Aruparking a bini pa siguridad di peatonnan cu mester cana riba caminda,pasobra autonan ta staciona riba acera. Pero autonan para na skina cu ta stroba bista di chauffeurnan y tambe accesibilidad di clientenan pa caya grandi. Y tambe pa genera fondo pa Arubus, dependiendo menos di Gobierno.

    E suma aki a keda baha y e kitamento di klem a caba cu e intencion di parkeo. E personal awor ta controla solamente riba parkeamento malo y mucho mas nan no por haci, segun Teo Croes. “Nan no por sanciona ningun hende cu no paga.”

    Aworaki tur cos ta depende den ki direccion Gobierno kier bay. Nan mester sinta cu gerencia di Arubus y Hunta di Comisario pa dicidi ki direccion nan kier bay. Si ta bay bek completo, of si ta bin klem of otro tipo di sancion.

    Un di e proposicion ta cu e chauffeur ta wordo sanciona. Si presenta pa pague di biaha, esaki ta costa 50 florin. Si bini te e siguiente dia, e ta bira 75 florin, sino e cobransa ta wordo manda cas. E di dos biaha, si bo no a paga, bo auto ta wordo getakel di biaha, y mester paga e boet tambe. Esaki ta un di e proposicionnan.

    El a finalisa bisando, cu ta urgente pa yega na un decision di kico ta bay pasa cu Aruparking.

     

     

    - Advertisement -

    DUNA COMENTARIO

    Please enter your comment!
    Please enter your name here