Home Gobierno Esnan cu a haya carta dia 29 December ta esnan cu a...

Esnan cu a haya carta dia 29 December ta esnan cu a worde acomoda ilegalmente den Departamentonan di Gobierno

525
0
SHARE
- Advertisement -

ORANJESTAD (AAN): Prome Ministro Evelyn Wever-Croes, aclariando insinuacionnan den e ultimo dianan den diferente medionan di comunicacion y di ex prome minister tocante personanan cu a haya carta dia 29 di december ultimo, Prome Minister Señora Evelyn Wever-Croes ta duna di conoce cu aki ta trata di personanan cu tabata traha pa bureau di minister cu ta worde yama coordinador. Hendenan cu tabata traha na oficina di Minister y no den otro departamentonan di Gobierno.

E mandatario ta bisa cu e palabracion semper tabata cu ora un Gobierno sinta, e ta bin cu su personal y ora e baha e ta bay back cu su personal. Den e caso recien, Gabinete Mike Eman no a bay cu tur su personal y a purba di acomoda mas di 100 persona di su personal na diferente departamentonan di Gobierno pa haci nan ambtenaar ultimo momento.

Prome Minister a enfatisa cu e decisionnan aki a worde tuma durante e periodo demisionario of durante e periodo di “afscheidsbeleid”. Ambos tin ley y hurisprudencia cu ta indica cu e decisionnan aki no ta valido. Pa cua motibo e decisionnan aki a worde revoca of coregi. E personanan aki a worde tuma den servicio “voor de duur van het kabinet” es decir mientras e gabinete tey. Esaki kiermeen cu ora cu e gabinete a caba, nan mester a bay tambe.

Esnan cu Mike Eman a purba di haci ambtenaar na e ultimo momento cu no a bay segun procedura unda no tabatin vacatura habri y sin cu nan a solicita pa e puesto, esakinan a worde revoca y tur a worde informa debidamente.

Prome Minister Evelyn Wever-Croes ta enfatisa cu Gabinete Wever-Croes ta atende cu e tema financiero na un manera transparente. Y e decisionnan cu Mike Eman a tuma pa pusha e hendenan aki como ambtenaar ta contra ley y contra consehonan di CAFT. Decisionnan cu a hiba Aruba den kiebro y den e problemanan financiero cu nos tin. Y Gabinete Wever-Croes a bin pa soluciona e problemanan financiero cu pais Aruba tin.

Na final di dia, Prome Minister ta bisa cu nos tur mester puntra nos mes si ta husto pa Aruba paga mas belasting, mas gasto, mas peso pasobra Mike Eman tabata kier a acomoda su coordinadornan. Esaki no ta husto. Al igual tur esnan cu a bin cu Gabinete Wever-Croes sa cu nan mester bay cu nos. Di mes manera e hendenan di Mike Eman tabata sa cu nan mester bay cu Mike Eman sinembargo na ultimo toch a purba fix algo pa nan pero no a haci esaki segun ley.

Prome Minister Sra Evelyn Wever-Croes a bisa enfaticamente cu esun responsabel di esaki no ta Evelyn Wever-Croes sino Mike Eman mes kende cierto momento tabatin como 500 coordinador y pa mas o menos 200 di nan el a logra fix nan bon pasobra esakinan a keda un caminda den gobierno. Pero esnan cu Mike Eman no tabata kier a regla pa nan na tempo, ta esunnan cu a haya carta y awo a haya nan den problema pa via di Mike Eman.

Esaki no ta nada agradabel pa nan. Sinembargo Gobierno di Aruba a duna nan un luna mas di pago. Algun di e hendenan aki no a ni presenta na pia di trabao ainda pero si nan a cobra pa 3 luna caba. Pero cu ser humano central den mente, toch Gobierno di Aruba a dicidi di duna nan un luna mas di pago.

Y tur hefe di departamento a worde avisa tambe cu si nan ta kere cu e personanan aki tin cu keda y tin un vacatura y presupuesto p’e, pa cuminsa cu e procedura legal pa asina duna un chens na e hendenan aki cu un trabao den nan departamento.

Prome Minister ta bisa cu no ta husto cu ora cu Mike Eman a bay el a laga su hendenan atras, un grupo di coordinador, pa Gabinete Wever-Croes traha cu nan siendo cu ta Mike Eman mes a bin cu e regla y palabracion aki cu bo ta bin cu bo coordinadornan, y bo ta bay back cu nan.

- Advertisement -

DUNA COMENTARIO

Please enter your comment!
Please enter your name here