Home Parlamento Ex Prome Minister Eman sa masha bon cu el a actua na...

Ex Prome Minister Eman sa masha bon cu el a actua na un manera incorecto

343
0
SHARE
- Advertisement -

Segun Rocco Tjon,

ORANJESTAD  (AAN):  Parlamentario di MEP Rocco Tjon durante e conferencia di prensa semanal di e partido geel a papia tocante e cartanan di retiro cu a wordo manda, unda cu oposicion lo ta papia di persecusion politico.

El a indica cu su intencion ta pa splica exactamente con e procedura ta, pa e pueblo stop di wordo engaña.

“Nos ta ripara cu e gabinete saliente no ta respeta departamento y instancianan”.

“Pa loke ta e mas di 200 hende cu a ricibi carta di retiro, si e gabinete anterior a respeta maneho y reglanan existente, nos lo no tabata den e situacion aki”.

Esaki segun Tjon, kende a sigui bisa cu den e expresionnan di ex Prome Minister, el a papia di persecusion politico y cu su gabinete nunca a hasi esaki.

“Mi mester enfatiza cu locual cu e ex mandatario a bisa ta completamente no berdad”.

“Mi tin e asina yama ministrerraad besluit, caminda cu e propio ex Prome Minister ta bisa cu nombracion cu a tuma lugar despues di 25 di September 2009, ora cu gabinete Oduber 4 a bira demisionario no tin poder huridico y ta wordo anula”.

Esaki segun e parlamentario, kende a sigui bisa cu na 2009 Prome Minister Eman a tuma e decision menciona, pasobra e ta un asina yama ‘maneho di despedida’, unda cu hurisprudencia ta mustra cu e periodo demisionario ta e periodo entre 30 cu 90 dia prome cu eleccion.

“Si bo sa esey y bo mes a hasi uso di esey na 2009 pa manda hopi hende cas, pakico awor bo ta tuma e decision di core pone hende den cierto posicionnan?”.

“Esey ta un maneho iresponsabel”, segun Tjon.

El a sigui bisa cu Eman ta bisa cu Bureau Inovatie, Bo Bario y e MFA-nan ta asina importante, pero si ta asina importante, dicon diferente di e ‘dienst-nan’ aki no tin un asina yama ‘instellingsbesluit’.

“Dicon diferente di e diensten aki no a wordo presupuesta?”.

“Si nan ta asina importante, dicon e cosnan aki no a wordo reglamenta?”

Esaki segun Tjon, kende a sigui bisa cu contratonan astronomico pa sumanan hopi grandi di placa si a wordo regla den apenas algun dia.

“Pesey como lider di e fraccion aki mi ta condena e expresionnan di ex Prome Minister Eman y nos no lo tolera cu a base di engañonan ta bay sigui cu e polarizacion aki na Aruba”.

“Nos tin cu bay traha hunto pa hiba Aruba dilanti, caminda cu di berdad nos ta bay pone e ser humano central”, segun Tjon.

- Advertisement -

DUNA COMENTARIO

Please enter your comment!
Please enter your name here