Home General Famia a keda asombra y no ta compronde pakico a cera Coney...

Famia a keda asombra y no ta compronde pakico a cera Coney Island

1072
0
SHARE
- Advertisement -

ORANJESTAD(AAN): Na Coney Island tabata tin un incidente diasabra cu a capta basta atencion riba rednan social. Esaki ta momento cu un mucha homber a accidenta y cual motibo e mester a bay hospital.

Diadomingo merdia, polis a notifica cu Coney Island no ta habri pa motibo di e accidente cu a tuma luga y ta importante pa DTI bay haci un inspeccion.

Mirando henter e desaroyo rond di rednan social y informacionnan cu tabata sali riba rednan social relaciona cu Coney Island, comentarionan pro of contra, etc., tabata tin importante pa por haya tambe e famia cu tabata tey. E mama mes a reacciona riba rednan social.

Asina a logra yega na dje tambe pa por tende con a bay cu su yiu y kico a pasa.

DIARIO tabata cu famia Brito-Garcia pa busca drechi di nan yiu.

E tata, sr. Brito a conta kico a pasa cu su famia y su yiunan, hunto cu algun famia mas di nan. Cos a bay asina leu cu riba Diadomingo Coney Island no a habri. E famia a keda asombra cu e infome ey.

Nan a splica cu Diasabra nan a bay Interpark Coney Island. E mucha a bay subi den e slip cu yama Taboca.  E ta djis un slip masha gusta pa e muchanan y el a coy un speed duro y dado momento el a bay halto y cay bek riba su parti patras.

El a haya un golpi, por imagina pa e velocidad. E ora el a keda drumi, como cu el a haya hopi dolor, no kier a lant’e. A prefera di yama ambulance. Pa suerte of casualidad tabata tin un dokter eynan. A haci tur e ehercisio, move pia, controle. Ora cu el a controle, el a bisa cu ta un golpi, pero si kier warda ambulance, pa no lante.

Tabata tin miedo cu el a afecta e lomba. A warda e ambulance y ora el a yega, a bay hospital. Prome cu esey ambulance a haci e mesun ehercisio cu e dokter a haci. Si kier bay saca un potret na hospital, e tata a bisa cu si, pa check berdad cu e no a haya nada.

Tur cos a sali bon na hospital. Banda di 10’or nan a keda cla caba na Hospital. El a haya remedi y na caminda pa cas el a drumi den auto, te cu el a baha su so riba pia y bay drumi te mainta y e ta hopi bon.

Tur cos a bay bon:

Riba Diadomingo e mucha a lanta normal. E tin un tiki dolor ainda, pasobra ta un golpi cu el a haya parti patras. E no tabata tin nada di haber cu mashin a daña. Ta ora el a baha e slip, el a haya e golpi. Personal di Coney Island mes a yama ambulance y polis.

E mucha ta sinti su mes y el a pasa bon, te ora cu e accidente a sosode. El a conta cu pa subi, el a subi prome biaha, tabata na e slip unda el a dal.

E mucha kiermeen e kier bay bek Coney Island!  El a bisa cu e ta bay back Coney Island. Si mañan e habri, e tey back. E tabata hunto cu su mayornan, su ruman y un primo di dje. Tabata prome biaha cu el a bay.

Reaccion:

E mama a reacciona riba Facebook, riba e comentarionan cu a worde gepost. E kier a skirbi e berdad di loke a pasa. E mucha a haya un golpi, pero no ta nada otro pa hende spanta y no bay mas e luga, of te na unda cu nan a yega cu a cera e luga. Pa e mama, di berdad cu ta un luga cu e muchanan por disfruta sin ningun problema. Cada hende, adulto, por wak bon si ta laga e mucha si of no, depende con sigur nan mes ta sinti. E mama ta sinti cu e luga ta unda nan por disfruta hopi.

Riba Diasabra, e luga tabata yen. Mester a drenta paden den fila, pero e tabata bayendo hopi bon. Lamentablemente a haya e accidente, pero ta algo cu por pasa. Accidente por pasa na cualkier caminda.

E mama a sigui splica cu no tabata tin ningun fayo na ningun mashin. Ta djis e slip, cual ta e prome wega cu a bay.

Na Hospital e famia tabata hunto. Debi cu nan tabata tristo cu e famia tin cu bay, a lag’e cu un tanta, pa nan sigui disfruta di e parke. E mama a bay cu e mucha, pa double check cu tur cos tabata bon cun’e. E otro famianan a keda trankil, te ora cu nan a cansa di subi riba e atraccionnan.

Bida normal:

Ora cu e yiu sinti su mes miho, e ora nan lo bay back Coney Island. E mucha no a disfruta di e parke mes y sigur lo bay back. E mucha lo bay school normal tambe, pasobra realmente e tin su dolor, pero ta algo normal di un golpi. Nada otro pa no bay school y no sigui cu su bida normal. Tur cos a sali bon.

 

- Advertisement -

DUNA COMENTARIO

Please enter your comment!
Please enter your name here