ORANJESTAD (AAN): Celebrando e aña natalicio di nos Libertador sr. Gilberto Françios “Betico Croes”, Gobierno di Aruba tin un dia special prepara pa pueblo henter celebra na grandi Dia di Betico.
E comision encarga cu e evento bou direccion di John John FLemming, a prepara e Programa Protocolar pa e parti mainta y Ceremonia Cultural pa e parti anochi.
For di 9’or di mainta lo tin presentacion di Musica di Duo Harpa y Guitara, yegada di invitadonan, yegada di Mandatarionan y yegada di Su Excelencia Gobernador di Aruba señor Alfonso Boekhoudt y su distinguido esposa.
E Himno di Aruba lo worde interpreta pa coro Melange bao guia di señora Maybeline Arends-Croes y e bandera di Aruba lo worde hisa pa miembronan di Schouting Aruba.
Despues lo tin ofrenda floral di parti Parlamento di Aruba, Gobierno di Aruba, Famia Croes y Fundacion Betico Croes. Promer Minister di Aruba Su Excelencia Sra Evelyn Wever-Croes lo hiba su discurso pa tur esnan presente.
Lo sigui cu declamacion pa e hoben Rafael Garcia ganador di Arte di Palabra, presentacion di Coro y Grupo di Baile The Chaz Dancers, bao instruccion di señora Chastity Kock-Hodge. Tambe riba e programa protocolar parti mainta lo tin desvelo, di parti Minister di Finanzas, Asuntonan di Economia y Cultura y Minister di Infrastructura y Medio Ambiente, di un plakaat conmemorativo pa asina completa e renovacion di Plaza Libertador Betico Croes cu a inicia na 2015.
Lo clausura e parti protocolario cu himno di Aruba y lo tin oportunidad pa saluda mandtario y famia presente. Comision Celebracion Dianan Nacional y Gobierno di Aruba ta invita e pueblo pa asisti na e ceremonia protocolario riba Dia di Betico.
