Home Hudicial Hues a declara Fiscal no admisibel den su caso pa ladronicia cu...

Hues a declara Fiscal no admisibel den su caso pa ladronicia cu violencia

139
0
SHARE
- Advertisement -

Den un caso

ORANJESTAD  (AAN) – Fiscal ayera mainta no a gusta cu Hues a declara no admisibel e caso penal cu el a cuminsa contra e homber M.

Fiscal a bisa Hues cu e ta bay apela e sentencia. Ta asina cu aña pasa e mesun Fiscal a cuminsa un caso di actonan inmoral contra e mesun homber M. y Hues a declara M. liber. Fiscal a bin cu un otro caso pero atrobe e no ta logra.

  DOS CASO CONTRA E MESUN PERSONA:

DIARIO por a compronde cu e Fiscal, despues di aña pasa a faya den su caso penal contra e mesun homber M. caminda el a pidi 3 aña di prison di cual 1 aña ta condicional, awor a cuminsa un caso di ladronicia cu violencia. Den e caso aki tambe Fiscal no a logra. Tur dos caso ta relaciona cu un dama Hulandes.

Den combersacion cu abogado mr. Illes, kende a defende e homber M., el a splica cu a base di ley bo no por usa e mesun argumentonan di acusacion un biaha atrobe contra e mesun persona.

Aña pasa October 2017, Fiscal a cuminsa un caso penal contra e homber M. caminda el a acusa e sospechoso pa actonan inmoral. Fiscal a bisa Hues cu promer ta papia di actonan inmoral pero despues N. a bisa cu el a bay pa horta y tabatin violencia.

Fiscal a bisa cu e no a persigui M. pa e ladronicia cu violencia sino actonan inmoral. Fiscal a bisa cu despues ainda e lo por persigui M. pa e ladronicia cu violencia.

Fiscal a exigi 3 aña di prison di cual 1 aña ta condicional pasobra e ta haya cu M. a mishi cu e pechonan di un dama Hulandes y lo tabata drumi sunu banda di e dama aki den su camber.

Aña pasa mr. Illes a bisa Hues cu e ta haya absurdo e exigencia di Fiscal y cu no tin ningun prueba di actonan inmoral y tampoco cu M. lo tabata drumi sunu banda di e dama. El a pidi Hues pa declara M. liber.

Na November 2018 sentencia a cay caminda Hues a declara e sospechoso M. liber pasobra na opinion di Hues no tin prueba.

Hues a bisa cu e acusacion contra N. ta cu intencional el a haci actonan inmoral cu e dama. Hues ta haya cu no a keda legalmente proba cu intencional N. a haci actonan inmoral cu e dama. Hues tambe a bisa cu no por prueba tampoco cu N. lo tabata drumi sunu banda di e dama Hulandes.

DIARIO a kere cu Fiscal lo a apela e sentencia, pero esey no a sosode.

   FISCAL DECLARA NO ADMISIBEL:

Ta asina cu Fiscal a dicidi di cuminsa un otro caso penal contra e mesun M. E biaha aki Fiscal a dicidi di usa e acusacion di ladronicia cu violencia. El a acusa M. cu riba 27 Februari 2017 a haci ladronicia cu violencia riba e mesun dama Hulandes, cu promer Fiscal a acusa M. di a mishi cu su pechonan. E violencia ta encera cu M. a bay riba e dama y a chok’e y a bis’e: “Tell her it’s okay, tell her to leave”. Esey ta dirigi na e amiga di e dama cu tabata keda den e mesun apartamento y lo a scucha desorden y a bay na e camber pa wak kico lo tabata pasando.

Notabel ta cu atrobe Fiscal ta exigi 3 aña di prison pa M. pero sin e parti condicional.

Abogado mr. Illes a reclama Hues cu Fiscal na October 2017 caba a persigui M. pa e mesun delito y actonan inmoral y a scoge pa sigui cu actonan inmoral. E ta haya cu Fiscal no a bin cu nada nobo sino ta ripiti e mesun acusacion. E ta haya cu mester declara Fiscal no admisibel.

Hues despues di evaluacion a bisa cu e abogado mr. Illes tin razon y a declara Fiscal no admisibel den su caso contra e homber M.

   FISCAL TA APELA:

Ta asina cu Fiscal no a keda nada contento cu e decision di Hues. El a bisa Hues e ora ey cu e lo apela e sentencia. Esaki ta duna e impresion cu Fiscal ta manera dicidido cu e kier castiga e homber M. con cu para y pesey a bisa cu e ta apela. Esey ta nifica cu e aña aki por spera tratamento di e caso aki den Corte Superior.

 

- Advertisement -

DUNA COMENTARIO

Please enter your comment!
Please enter your name here