Home Economia Indicadornan principal ta mustra crecemento fuerte di nos industria turistico

Indicadornan principal ta mustra crecemento fuerte di nos industria turistico

44
0
SHARE
- Advertisement -

Segun ATA

ORANJESTAD (AAN) – A base continuo Oficina di Turismo di Aruba (A.T.A.) ta registra y analisa e estadisticanan referente nos industria turistico y ta raporta esakinan. Esaki ta permiti pa, ya caba den e prome luna di 2018, por tin y por comparti e resultadonan registra durante 2017.

A continuacion ta elabora riba e cantidad di turista ‘Stay Over’, turista Crucero, Entrada pa Camber Disponibel (RevPAR) y Entrada General di Turismo (Tourism Receipts). A.T.A. ta satisfecho di por bisa cu, no solamente a alcansa, pero a surpasa mayoria di e metanan di crecemento cu a fiha pa aña pasa.

Tourism Receipts / Central Bank of Aruba

Di acuerdo cu Banco Central e asina yama ‘Tourism Receipts’, pa e prome 6 luna di 2017 a contribui cu AWG 1585.6 miyon den nos economia, cu ta un aumento di 4.8% compara cu e mesun temporada na 2016. Segun proyeccionnan A.T.A. tin confiansa cu 2017 por cera cu 5% di crecemento, mirando e tendencia di crecemento den e prome mita di 2017 y mirando con segundo mita di 2017 a progresa. Pa 2018, ta proyecta un crecemento di 2% di e total di Tourism Receipts.

Turismo stay-over

Den transcurso di 2017 Aruba a yama bonbini na un total di 1.070.548 bishitante ‘stay-over’ cual ta 2.9% menos si compara esey cu aña 2016. Si nos exclui e mercado di Venezuela, e ta representa un aumento di 9.1%, unda tur continente unda nos destinacion ta wordo representa a mustra un crecemento.

E cantidad di bishitante procedente for di e continente Norte Americano tawata un total di 742.884, un aumento di 10.7% ekivalente na 72.060 bishitante adicional den 2017.

a loke ta trata Latino America, aña pasa e continente a trece un total di 202.776 bishitante cual ta un bahada di 32.9% (99.233 bishitante menos) compara cu 2016. Esaki ta debi na un ciada di 53.8% for di e Mercado di Venezuela. Si exclui Venezuela ta mira un crecemento di 14.3%.

 

For di Europa a ricibi un total di 90.871 bishitante den transcurso di 2017 y compara cu e aña prome, esaki a subi cu 4.8% cual ta 4.128 turistanan Europeo mas pa nos isla.

 

Como meta pa 2018, Aruba Tourism Authority ta proyecta pa aumenta e total di bishitantenan ‘stay-over’ pa nos isla cu 3.7%.

 

Turismo ‘stay-over’ Norte America (Merca y Canada)

Durante 2017 e mercado Norte Americano a representa un 69.4% di nos Turismo. Merca ta permanece como e mercado turistico principal den 2017 subiendo su ‘market-share’ cu 10.6% ekivalente na 66.953 turista adicional mustrando un crecemento fuerte na 2017.

Pa 2017, Canada a percura pa 47.166 bishitante ‘stay-over’. Despues di retonan economico den 2016, Canada a recupera durante 2017, mustrando un crecemento di 12.1% of 5.107 turista Canades mas cu a bishita nos isla.

 

Turismo ‘stay-over’ Latino America

2017 tabata un aña den cual Latino America a representa 18.9% di nos turismo ‘stay-over’. E e mercado aki a sigui mira e impacto di Venezuela. No obstante diversificacion pa cu otro paisnan a resulta entre den den un crecemento for di mercadonan manera Argentina y Colombia cual a conoce cifranan resaltante di 48.6% y 14.7% di crecemento respectivamente. Cu excepcion di Venezuela, Chile y Ecuador, tur pais den Latino America a aumenta cu e cantidad di bishitantenan pa nos isla durante 2017.

 

Pa 2017 a proyecta cu Aruba lo a ricibi 23% menos di bishitante Venezolano, pero esaki a resulta di ta 53.8%. Lo sigui re-evalua e mercado aki a base di cada cuartal, na 2018.

 

Turismo ‘stay-over’ Europa

E continente Europeo ta representa 8.5% di e total di Turismo pa Aruba. Distancia ta keda hunga un papel importante pa e mercado mas leu di Aruba pero na otro banda por mira cu e turista Europeo ta keda mas anochi na nos isla. Hulanda a trece un total di 37.246 pa nos isla, cu ta un aumento di 2.5% (904 bishitante mas in total). Alemania a trece 5.783 turista cu ta un aumento di 1.109 bishitante mas (23.7%) y Reino Uni a trece 773 bishitante mas pa nos isla, un aumento di 4.2% y un total di 19.201 bishitante pa nos isla.

 

Revenue Per Available Room (RevPar)

Segun estadisticanan suministra door di Aruba Hotel and Tourism Association pa loke ta 2017, e ‘Average Daily Rate’ (ADR) a aumenta cu 4.6% compara cu 2016. Esaki den cifra ta US$ 226.73 na 2016 compara cu US$ 237.22 na 2017. E rendimento pa camber disponibel, e asina yama ‘RevPAR’ a aumenta cu 10.8% di US$ 181.09 na 2016 pa US$ 200.60 na 2017. E averahe di anochinan di camber ocupa a aumenta cu 4.7% compara cu 2016 bayendo di 79.9% di ocupacion pa 84.6% den 2017.

E cantidad di anochinan obtenibel pa camber a aumenta cu 1.1%.

 

Pa aña 2018, Aruba Tourism Authority ta proyecta un crecemento di 0.8% di e RevPar compara cu aña 2017.

 

Turismo Crucero

Esaki ta un mercado cu A.T.A. hunto cu Aruba Ports Authority ta satisfecho di por remarca cu ta conociendo un aumento continuo y stabiel. En total na 2017, Aruba a ricibi 792.403 pasahero crucero for 352 diferente barco cu ta ekivalente na un aumento di 20.8% den cantidad di pasahero compara cu 2016 y 14.7% of 45 barco adicional. (fuente: Aruba Ports Authority)

 

Pa aña 2018 ta proyecta pa aumenta turismo crucero cu 7%.

 

Conclusion

Aruba su turismo exitosamente a surpasa proyeccionan stipula di desaroyo pa cu 2017, esaki riba area di Tourism Receipts, RevPar y Turismo Crucero. Oficina di Turismo ta contento cu esfuerzonan strategico haci hunto cu partnernan manera AAA, APA, AHATA y Gobierno di Aruba ta duna nan fruto.

 

Apesar di reto paden y pafo di nos teritorio, e strategianan di diversificacion ta brinda e flexibilidad di por adapta rapidamente na cambionan den e industria di biahe y economia global. A.T.A. ta sigui prepara y traha duro riba programanan dirigi riba mercadeo di Aruba y riba desaroyo di nos product turistico.

 

- Advertisement -

DUNA COMENTARIO

Please enter your comment!
Please enter your name here