Home Comentario Kico a pasa na 2017 y kico por spera den 2018 na...

Kico a pasa na 2017 y kico por spera den 2018 na nivel internacional

14
0
SHARE
- Advertisement -

Gregorio Wolff

E acontecimentonan cualnan e ultimo añanan y igualmente na 2017  a domina noticianan na mundo ta: Guera na Syria, quera na Afhanistan, guera na Irak, guera na Libya, situación na Venezuela, na Iran, na Ukraine y na otro paisnan.

Na 2017 a bini acerca e “maneho” di Trump, presidente di USA, unda pa hopi hende mihor cambia e palabra “maneho” den “stupidesnan”. Dor di esaki nos ta haya awe e situación tenso na Korea, na Palestina, na Iran, posición di imigrantenan na Merca y hopi mas.

Loke a domina noticia na 2107 tambe ta e Rusia-Gate na Merca, Publicacion di e Panama-papers saca for di e oficina di Abogado Panameño, Fonsecca.

Siguientemente e sucesonan mas importante di 2017 y kico por spera na2018

Syria

E situación na Syria a domina noticianan internacional, sigur for di 2011.

Pero for di final di 2016 y sigur atrobe durante 2017, ta bisto cu e final di e guera ta yegando, maske ainda tin disputanan grandi cu Al-Qaeda na e provincia Idlib y na Al Ghouta serca di Damasco, cu gruponan solitario di ISIS den e desiertonan na oriente di Syria, cu e Kurdonan na noreste di Syria apoya dor di Merca y na frontera di Libanon y Israel tin gruponan chikito di rebeldenan, kendenan ta ricibi apoyo di Israel y algún sitionan ainda ocupa dor di gruponan di Al-Qaeda.

Pero na e otro 80 pa 90% di teritorionan di Syria libera, poco a poco e bida normal ta cuminsa dal su pasonan.

Bisto tambe, kendenan ta e ganadornan di e guera, manera presidente Assad, Rusia cu Putin, Hezbollah y Iran. E perdedornan ta e rebeldenan  jihadista y nan financiadornan manera Estados Unidos, paisnan di NATO, Saudi Arabia, Qatar, e Emiratonan Arabe. E perdedor mas grandi sigur ta e pueblo di Syria, kende mester a sufri hopi dor di e infiltrantenan di afor y otro rebeldenan nacional jihadista, kendenan ta afilia na e diferente organisacionnan criminal manera Al-Nusra, ISIS y otro gruponan bringando nan Jihad y recibiendo nan apoyo militar y financiero di e paisnan prome menciona.

Poco a poco awor ta Sali e noticianan cu no tabata existi gruponan modera den e gruponan di oposicion contra e gobierno di Syria. Nan tabata yama asina pa por a ricibi armanan directamente for di Merca y paisnan di Nato, paga dor di Saudi Arabia y Qatar pa después pasa e armanan pa e gruponan rebelde dominante manera Al-Qaeda y Isis.

E meta principal di Merca y paisnan di Nato tabata pa baha Assad como presidente di Syria.

Jubilo y aprecio  di paisnan di Nato na e rebeldenan salvahe

Na Mei 2015, e departamento di Inteligencia di ministro di defensa a publica un report ariba e movimiento rebelde anti-Assad, cu tabata ser domina dor di Al-Nusra e organización di

Al-Qaeda. E report a ser traha na 2012 pa e gobierno di Merca, unda a mustra cu tur yudansa, tanto militar y financiero na final di cuenta ta drenta den man di Al-Qaeda.

A pesar di esaki toch Merca y paisnan di Nato a keda duna tur apoyo na e gruponan anti- Assad. E courantnan grandi na Merca manera New York Times, Washinton Post y mas a tarda 6 luna, otro 9 luna y otro un aña pa publica e report aki.

Sabiendo tur esaki for di 2012, e Gobierno di Obama a keda duna tur apoyo militar y financiero na e gruponan rebelde, a sabiendas cu tur apoyo ta bay cay den man di esnan cu a basha e Twin Towers abao 11 september 2001, matando mas di 3 mil Mericano.

E motivo pa cuminsa cu e War on terror.

Tambe a Sali na cla awe e cantidad di jubilonan y aprecionan pa e jihadistanan durante e  periodo di  2012 pa 2015. Hopi di e think-tanknan mericano tabata aprecia con e jihadistanan domina dor di Al-Qaeda, tabata hiba nan luchanan, munstrando cu ponemento di bomnan banda di caminda y e bomnan suicidio tabata accionnan hopi bon y hustifica pa bringa e gobierno di Syria, guía pa Assad. Un aprecio pa accionnan salvahe di e rebeldenan y acerca nan tabata yamanan e rebeldenan “modera”.

Otro ehempel ta loke a sosode na juli 2016, e grupo jihadi, ‘Nour al-Din al-Zinki Movement’,  financia y apoya cu arma dor di USA,  a gara un mucha Palestino Abdullah Issa,  un joben cu  problema mental y kende a dwaal  na Aleppo. E grupo Jihad a acuse di ta un spion di Assad y via un video ariba You Tube nan a mustra nan acto di barbaridad,  con nan a corta su cabes afor. Vocero di State Department  Toner a admiti cu nan ta financia e grupo y cu nan ta bay investiga e asunto

 

Lucha pa libera Idlib y Al Ghouta cerca di Damasco   ta na caminda.

Después cu gobierno di Syria cu ayudo di Rusia, Iran y Hezbollah na december 2016 a libera di e jihadistanan, e ciudad mas grandi di Syria,Aleppo,  a sigui mas victorianan, e.o na sudeste di Syria  pa e gobierno di Syria na 2017.

Solamente un territorio grandi, na e provincia Idlib, ta bao mando di Al-Nusra Front (Al Qaeda), awor cu  e nomber JFS (Jabhat Fateh al-Sham), despues cu JFS a liquida otro gruponan jihad, kendenan no kier lucha bao su commando.

Na e momentonan aki Gobierno di Syria cu su aliadonan ta drentando territorio di e jihadistanan pa saca nan for di Idlib. Igualmente esaki ta e caso na Al Ghouta, un region cerca di Damasco, e capital di Syria.

Cu conquista di e dos partinan prome menciona, por bisa cu Syria ta liber di rebeldenan jihadista. Maske aki y aya lo keda por lo pronto enfrentamentonan cu gruponan chikito, estilo guerilla.

 

SDF

Na parti nordeste, e trupanan di Merca cu su Proxy (un organización cu ta actua den su nomber) SDF (Syrian Democratic Forces), hunto cu banda di 2 mil salda di Merca ta mantene un parti grandi di Syria na nordeste ocupa, después cu nan a corre cu ISIS for nan capital Raqqa. SDF ta un grupo di guereronan financia y apoya cu arma dor di Merca, cual ta consisti di specialmente Kurdonan kendenan tin lasonan fuerte cu PKK (Partido di Trahadornan Kurdo), cual ta e organización di Kurdonan na Turkia cu ta  bringando pa independencia di Kurdistan.

Akinan un controversia grandi ta Bisto, SDF ta un grupo di guereronan financia y apoya cu arma dor di Merca, un organización cu lasonan fuerte cu PKK, mientras, PKK ta un organización ariba e lista Mericano  di organisacionnan terrorista. SDF ta ricibi hopi arma di Merca y ta pasa nan di contrabanda pa PKK na Turkia pa bringa e gobierno di Turkia.

Turkia cu ta miembro di Nato, cuanto biaha ta acusa Merca di ta yuda gruponan terorista pa bringa Turkia.

 

Despues di e exodus di ISIS for di Raqqa, hopi a kere cu Merca lo bandona Syria y e guereronan di SDF lo por join e ehercito di Syria, ya cu no tin enemistad entre nan.

Na final di november, e presidente di SDC (Syrian Democratic Council), e brasa politico di SDF a declara cu e quereronan di SDF lo drenta e ehercito di Gobierno di Syria.

 

Tin basta cosnan straño a y ta pasando.

Semper Pentagon a bisa cu e trupanan di Merca ta bandona Syria na momento cu ISIS wordo derota, pero ainda e trupanan t’ey, mientrastanto e Ministro di guera di Merca James “Mad Dog” Mattis a declara cu  e trupanan di Merca +  2000 lo keda na Syria, pa si acaso ISIS 2.0 sali di nobo na nordeste.  Su defensa ta cu UN (Nacionnan Uni) a duna Merca e aprobación pa bringa ISIS na Syria.

Mientras Syria ta bisa cu legalmente un país por manda trupa of ocupa un país cu solamente dos motivo. Uno cu un decisión di Conseho di Seguridad di UN, di dos cu un  peticion di e país, reconoci dor UN. Syria no a pidi Merca pa manda trupa, ni tin un decisión di Conseho di Seguridad di UN. Syria constantemente ta pidi Merca pa saca su trupanan for di Syria.

 

Fin di guera na Syria lo trece otro guera cu Iran?   

A Sali na cla algún dia pasa, dor di BBC y algún querero di SDF, cu e ultimo trupanan di ISIS na Raqqa, banda di 2000 jihadista, bon di salud y banda di 1000 jihadista herida, a bandona Raqqa,algún dia prome cu Raqqa a ser libera, den busnan cu tur nan pertenencianan cu destino desconoci dor di un deal cu Mericanonan y Coalicion di paisnan Europeo di Nato.

E vocero di e coalición di paisnan di Nato na Syria Colonel Ryan Dillon, a bisa cu e deal no ta secreto y Washington a acepta e deal.

Hopi ta pensa di otro deal ya cu Merca, después di a invadi Afhanistan,Irak Libya y Syria, awor nan pensamento di guera ta ariba Iran. Nan gran amigonan na medio-oriente Israel y Saudi Arabia ta bushando Trump pa actua contra Iran y Merca sa cu Isis, Al-Qaeda tambe semper a mira Iran como nan enemigo.

Pues pa 2018 por spera algún sorpresa, pero un cos ta sigur, e fin di guera na Syria ta yegando su fin, esaki ya tabata bisto na final di 2016 ora e ciudad mas grandi di Syria  Aleppo a wordo libera for di e gara di Jihadistanan dor di Gobierno di Syria, apoya pa Rusia, Iran y Hezbollah.

Manera mi a splica na inicio cu e ganadornan di e guera aki y e perdedornan ta conoci,  mientras Turkia cu inicialmente a apoya e jihadistanan, awor ta otro banda di mesa.

Hopi oportunista!!

 

Venezuela ta sigui den pantaya.

E situación na Venezuela ta sigui di ta malísimo.

E boycot di Merca, cu su sancionnan, prijs di petroli abao,  hunto cu esaki e corrupción na Venezuela mes ta haci e situación mas pio.

Na final di 2015, Oposicion a gana elección pa parlamento di Venezuela, pero nan a maluza nan poder dor di hiba un política cu e único meta pa baha presidente Maduro , durante 2016 y 2017, sin logra, pero treciendo e país na rant di un guera civil

 

E política di oposición a resulta den un fracaso, mientras Maduro uzando tur su armanan ta controlando e país.

Venezuela tin un structura estatal político parecido na Merca y Francia, unda e presidente eligi pa pueblo  tin basta poder y pa baha e presidente ta hopi difícil, no imposibel.

Oposicion su único meta te poco dia pasa, tabata pa baha Maduro como presidente, pero nan a fracasa dor di no por a acumula e firmanan legal necesario pa tene e referendum na 2016 y e accionnan ariba caya a faya, causando confrontacionnan cu Gobierno  cu a laga hopi morto y herido.

 

Meimei di aña pasa, Gobierno di Presidente Maduro, después cu parlamento no kier dialoga ni coopera cu Gobierno, a instituí e Asamblea di Constituyente Nacional, cual den un referendum a ricibi e aprobación di pueblo.

Na Oktober tabatin elección pa gobernadornan di estado y PSUV (Partido Socialista Unido de Venezuela) a gana den 19 di e 23 estadonan Venezolano.

Na december tabatin elecciónnan municipal (na Hulandes verkiezingen voor gemeenteraden).

Parti di oposicion a boycotia e elección aki y PSUV a bira e ganador grandi den e elección aki.

Un cos bisto ta cu e candidatonan di oposición mas radical contra Gobierno a fracasa den nan intento pa ser eligi y esnan eligi den e elección perdi pa oposición ta personanan no-radical.

 

Oposicion awor kier negocia solucionnan cu Gobierno na Venezuela

E president nobo di parlamento (oposicion) Omar Barboza den un entrevista siman pasa den  2018, a declara un cambio grandi den e postura di oposición y tambe den parlamento.

Awor nan kier yega na solucionnan negocia cu gobierno, cual posición a trece división atrobe bao di oposición. Barboza a pidi su legisladornan pa percura pa tin elecion liber y fair den e próximo elección pa presidente. Esaki después cu na 2018 den un referéndum y dos  eleccion oposición a ricibi slanan duro.

E ta sigui bisa cu e mayoría di pueblo kier solucionnan negocia pa Sali for di e crisis cu Venezuela ta aden. E a pone accento cu tur cos mester bay pacificamente.

Eleccion reciente a laga oposición hopi desilusiona y tambe hopi dividi. Sigur ariba e tema pa negocia cu gobierno y busca solucionnan pacifico, 180 grado di loke a sosode na 2016 y 2017. Hopi ta bisa cu oposición a siña su les.

 

Gobierno di Venezuela den un mihor posición.

Na e momentonan aki tin negociacionnan na republica Dominicano entre Gobierno Venezolano y oposicion.

Sigur Gobierno di Venezuela tambe kier yega na solucionnan cu oposición, pa purba na alivia e situación malo pa e pueblo di Venezuela.

Un punto positivo pa Venezuela y pa e reapertura di e refineria na Aruba ta cu e prijs di petroli ariba nivel mundial ta subiendo.

Pa hemisferio America e ta bayendo den dirección di $65 pa barril y na Europa pa $70.

Hopi ta bisa cu e prijs lo bay staciona su mes banda di $80.

 

Posicion di Merca

E posición di Merca regardando Venezuela dia pa dia ta birando mas radical cu mas boicot económico  y mas sancionnan.

Regime Change in Venezuela ta e único meta di Merca for 1999 pa Venezuela.

Regime Change lo nifica awe cu ta pone un oposición sin apoyo popular, sin plan di maneho  pa economía y tampoco ariba otro terenonan, na mando na Venezuela. Tur cos ta mustra cu e pueblo den  e ultimo dos eleccionnan, a pesar di un situación malísimo toch ta vota chavismo. Manera ta ser bisa ‘survive bao un gobierno sin ningún plan y apoya pa Merca lo ta peor’.

E cuido medico gratis a pesar cu tin scarcedad grandi di remedi, e educación liber te na universidad, e miyonnan di casnan construi pa esnan di menos recurso y hopi otro medidanan popular di chavismo, ta den mente di hopi Venezolano.

Na fin di aña 2017,State Department a laga sa cu nan a bolbe aproba un miyon dollar pa oposición hiba su lucha. E miyon dollar ta pasa via un think-tank cu e meta pa mete den asuntonan interno di Venezuela.

Tin un miedo ta colga den laira, ya cu tur indicación ta mustra cu Chavismo ta bay gana elección presidencial atrobe e aña aki. Pues nacionalmente na Venezuela  e “Regime Change”, tanto alaba pa merca no ta bay sosode. Di afor so Regime Change por bini.

Trump a bisa poco tempo pasa cu intervención militar di Merca tambe por bira un posibilidad. Mesora hopi gobiernonan di Latino-America y na mundo a bisa Trump pa saca e idea loco ey for di su cabes.  Pero manera mi a mención mas dilati e maneho di Trump ta carga cu ‘Stupidesnan”.

 

Honduras

Na e pais aki e candidato presidencial di Gobierno despues di ta perdi mahos den conteo, Gobierno a para e conteo, despues di algún dia a sigui cu e conteo pero poco a poco e resultado a bay na favor di e candidato di Gobierno, e derechista Juan Orlando Hernandez.

E candidato di Pueblo di un coalición di Centro-Iskierda Salvador Nasralla y su hendenan no  a bay di acuerdo cu e maniobranan di Gobierno y a subi caya masalmente gritando fraude y a pidi pa anula e elección y tene di nobo.

E enfrentamentonan tabata fuerte y varios morto a cay.

Oficialmente e comisión di elección na Honduras a duna un resultado di e elección y a declara Juan Orlando Hernández como e ganador.

 

Otro candidato Pineda, kende conhuntamente cu Salvador Nasralla lo a acumula mas di 50% di voto tambe a pidi pa anula e elección pa motivo di fraude

Otrto evenemento ta e hecho cu polisnan a bay den acción di welga, ya cu nan no kier enfrenta nan pueblo 

Merca a reconoce e resultado, pero OAS, e organisacion di Estadonan Americano a pid pa tene elección di nobo. E situación na Honduras ta sigui tenso.

 

Merca cu Trumpismo y Rusia-gate

Den mi relato ariba e resultado di elección presidencial na Merca aña pasa, mi a mustra ariba e emailnan di partido Democrata referiendo na Hillary Clinton y di su hefe di Campaña John Podesta, cualnan a Sali publica dor di Wikileaks na juni 2016. For di e emailnan aki  a Sali  con e partido democrata tabata manipula cu su mesun hendenan y cu prensa, pa Clinton gana e nominación den partido Democrata y despues elección presidencial na Merca. Den e ultimo Clinton a faya y Trump a keda eligi.

E fayo aki a pone cu mester a busca un culpabel (zondebok) pa e derota di Clinton.

Esaki a bira Rusia. Rusia lo a hack e emailnan for di partido demócrata y for di John Podesta.

E ultimo strohalm di e Rusia-Gaternan na final di 2017, tabata e gañamento di Michael Flynn, tocante conbersacionnan cu Embahador di Rusia na Merca.  Flynn tabata e National Security Advisor di Trump, pero después di algún dia, después di e inauguración di Trump na januari 2017, Flynn mester a tuma su retiro ariba e mesun asunto aki, pero referiendo na vice-presidente Pence. E dos combersacionnan cu e embahador di Rusiano tin nada di haber cu Trump, pero mas bien manera nan ta bisa na papiamento, Flynn a tira un boca di palabra na fabor di Israel, durante e dos conbersacionnan cu e embahada di Rusia.

Despues di 18 luna nada concreto ainda, tin ta bisa  cu e rusia-gate lo bira un FBI-gate. Y kende lo bay investiga e investigadornan di Rusia-gate.

 

Trump su politica exterior ta differencia di su retorica di campaña.

Durante campaña Trump tabata agita contra e gueranan na Medio-Oriente.

E a papia di e miyonnan, hasta di triyonnan na dollar cualnan a ser malgasta desde 2001.

Tocante guera na Irak e tabata cla y a bisa cu ta Bush y su hendenan a gaña e pueblo Mericano pa bay guera. Na Afhanistan e a bisa cu mester caba cu e guera.

Awe como presidente di Merca e ta reforsando e gueranan na Medio-Oriente y awor hasta Guera cu Iran ta ser propaganda y prepara.

Banda di 2000 solda mericano ta ainda na Syria. Enbes di yuda stabilisa Syria pa e e no wordo dividi y pa esnan cu a mata banda di 3.000 Mericano ora nan a basha e Twin-Tower abao, keda lew for di gobernación na Syria.

Ta ser bisa cu e militarnan ainda na Syria tin un meta special pa confronta Iran.

Na un base militar di Merca na nordeste di Syria, banda di e ciudad Al-Shaddadah según hendenan cu a Sali for di e región ey, a bisa cu tin un campo di entrenamento for di como 6 luna pasa pa soldanan mericano duna militantenan di ex ISIS, di ex Al-Nusra (Al-Qaeda)  y di otro gruponan rebelde, training militar.

E rebeldenan aki ta forma parti di e organización nobo “New Syrian Army”.

Syria y Rusia ta hopi preocupa  cu e desaroyo aki.

 

E berdad ta cu Iran e enemigo mas grandi Merca awendia, tin basta solda na Syria, ariba peticion di e gobierno di Syria y ta conoci cu na varios ocacion trupanan mericano  a cay den combate cu  militianan shiita aliado di gobernó di Syria, reclamando cu nan ta aliado di Iran.

 

Korea 180101

Después cu tensionnan a lanta asina hopi  y cu Trump a bisa su ministro di asuntonan exterior,Tillerson pa hala aden su proposición pa sinta na mesa y busca solución cu Nort Korea. E tarea primordial di un ministro di asuntonan exterior ta pa aplica diplomacia.

Trump a bisa cu e no ta kere den Diplomacia den e caso di Nort Korea. Toch e dianan aki ta inicia combersacionnan entre Nort Korea y Sur Korea.
Pues e gobierno di Merca, a pesar di no ta kere den diplomacia a bay di acuerdo pa Sur Korea drenta den deliberación cu Nort Koreay y Merca a stop tur ehercicionan militar hunto cu Sur Korea pa algún luna.

Hopi ta bisa cu e posición di Kim Jong Un, presidente di Nort Korea pa papia cu Sur Korea ta pa trece discordia entre Merca y su aliado Sur Korea.

Ban spera cu no y cu e deliberacionnan aki lo bay kita e tensionnan na e parti di mundo aki.

 

 

- Advertisement -

DUNA COMENTARIO

Please enter your comment!
Please enter your name here