Home Economia Lo trata Ley di Restauracion Economico den consulta cu instancianan concerni

Lo trata Ley di Restauracion Economico den consulta cu instancianan concerni

39
0
SHARE
- Advertisement -

Pa percura pa crecemento nos economia:

ORANJESTAD (AAN) –Minister mr. Andin Bikker, a referi den conferencia di prensa na e Ley di Restauracion Economico, cu pronto lo wordo trata den consulta cu instancianan relevante y concerni, di nos comunidad.

E ley aki a wordo poni riba programa di gobernacion cu tin como meta pa reactiva Aruba su economia cual, segun mr. Bikker, tin dos aña cu a keda stagna.

Esaki pa motibo cu bao di e gabinete anterior Aruba su economia na lugar di crece el a keda riba un linea negativo.

“A base di esey, nos como un gobierno responsable ta bay activa e economia”, Bikker a acentua.

E mandatario a bolbe referi na un plan cu na Hulanda a funciona perfectamente y cu a wordo implementa na 2011, cu ta e Ley di Crisis di Restauracion Economico.

Pa introduci e ley aki, na Hulanda nan a analiza e procesonan cu innecesariamente ta tarda demasiado of cu ta tranca e economia.

“Akinan mi persona a haci un analisis y nos a bin cu un propuesta, basicamente unda cu nos ta bay agiliza cierto procesonan”, Minister Bikker a indica.

Por ehemplo, el a sigui splica, tin centenares di bouwvergunning cu no ta sali cu e rapidez cu nan mester wordo otorga; tambe ora un persona pidi un verkavelingsplan pa parcela un pida tereno pa construi cas of edificio, of pa haya un permiso di establecimento, e ta tarda largo y asina aki tin diferente leynan cual proceso ta tarda.

E mandatario a menciona cu tin companianan NV, cu mester warda minimo dos siman pa djis aproba e nomber.

“Y nos, den un mundo cibernetico, cu internet, etc., nos economia ta concuri mundialmente cu diferente otro economia similar denos nos islanan ruman, etc., y nos mester bin na un manera pa reactiva nos economia y pesey nos a bin cu e ley di restauracion economico”, Minister Bikker a reitera.

E dignatario a señala cu den e simannan cu ta bin, a base di e democracia nobo y consultativo cu gobierno ta promove, lo tin consulta cu, por ehemplo, Camara di Comercio, ATIA, Orden di Abogado, Asociacion di Notario, entre otro instancianan den nos comunidad, pa nan tambe por duna input y recomendacionnan pa loke ta trata e esencia di e ley menciona.

“E ta un ley cu ta bay haci cambionan chikito pero significativo den diferente ley pa agiliza e proceso cu ta strobando e crecemento economico, pa asina conhuntamente nos por yega na un crecemento cu lo bay crea cuponan nobo di trabao di cual gobierno y pueblo lo beneficia di dje. Esaki ta un paso concreto cu nos ta tumando den e prome cien dianan di gobernacion, hunto cu otro pasonan pa pueblo por sinti e diferencia di e gobierno aki cu diligente y responsablemente, ta asumiendo e retonan y preocupacionnan cu nos pueblo y nos pais ta enfrentando”, e dignatario a conclui.

- Advertisement -

DUNA COMENTARIO

Please enter your comment!
Please enter your name here