Home Hudicial Mayan tin sentencia pa homber sospecha di a haci asalto arma na...

Mayan tin sentencia pa homber sospecha di a haci asalto arma na oficina di transfer placa

73
0
SHARE
- Advertisement -

ORANJESTAD (AAN): Mayan e sospechoso homber E.d C. mester presenta dilanti Hues pa scucha su sentencia. Luna pasa tratamento di e caso a tuma lugar caminda e sospechoso E.d C. ta para riba cu e ta inocente y cu e realidad ta cu e tabata un victima di e asalto arma.

Fiscal no ta kere esaki y ta haya cu E.d C. ta complice y a exigi 5 aña di prison. Fiscal a mustra cu el a tene na cuenta cu anterior E.d C. a haya condena di 4 aña di prison pa un caso di asalto arma.

ASALTO ARMA:

E asalto arma a sosode dia 16 Juni 2017 na un oficina di transfer placa den Socotorolaan.

Luna pasa durante tratamento di e caso, Hues a bisa cu e señora P., empleada na e lugar di manda placa na Socotorolaan, a bisa cu dos homber desconoci a drenta. Un a drenta promer y despues un color scur. E homber color scur a drenta y a bay sinta di biaha riba un stoel banda di e lessenaar. E promer kende ta E.d C. segun P., a ranca su 2 cellular for di man. Hues a bisa cu riba video el a mira E.d C. a pasa tras di e señora P. y coy e cellular. Segun E.d C., el a haci esaki door cu e asaltante a bisa esey.

Hues a remarca cu e señora P. no a bisa cu e asaltante no a bisa pa coopera sino lo tira nan. E señora tambe a bisa cu E.d C. a saca un arma pone riba dje.

Hues a remarca cu riba e video di seguridad no ta mira nada di esey. Tambe e señora a bisa cu E.d C. a push’e pa e bay cu e homber color scur den un otro cuarto. E señora a bisa tambe cu anterior E.d C. a bin y puntra pa un product y despues a bay. E señora a bisa cu e homber color scur a pone arma na su cabez y bisa pa habri e caha fuerte. E señora no por a habri e caha fuerte door cu e tabata hopi nervioso. El a bisa cu ambos tabata papia Spaño y E.d C. tabata coba den e oficina ora cu e tabata hunto cu e otro asaltante na e caha fuerte. Segun e señora nan a bay cu 7500 Florin. Ta asina cu riba e video di seguridad por mira tur cos pero no ta scucha e papiamento.

Hues a mustra cu Recherche a analisa e video di seguridad y ta constata cu pafor di e oficina, E.d C. tabata cana dilanti y e homber color scur tabata su tras. Segun E.d C., e no tabata sa mes cu e homber tabata cana su tras. Mientras cu E.d C. tabata papia cu e señora, e homber color scur a saca un arma y sinta na e lesenaar. A mira E.d C. pasa patras di e lessenaar y bay kita cellular for di e señora. Riba video Recherche a mira con E.d C. a coy placanan riba lesenaar y hinca den un tas. El a coy e tas hinca na su paña y cana bay den direccion di e porta. E momento ey un cliente a yega y e asaltante a sali y E.d C. a laga e cliente pasa y a bay cu e asaltante. Hues a puntra pakico E.d C. a bay. Segun E.d C. e asaltante a bis’e pa bay. El a bisa Hues cu si e no a bay, e asaltante a tira nan mata.

Hues a mustra cu Recherche ta haya cu ningun momento E.d C. a actua nervioso y ningun momento el a worde menaza.

Hues a remarca cu E.d C. na 2012 a haci un atraco arma cu violencia y na 2014 el a worde condena na 4 aña di prison. Segun E.d C. e tempo ey el a worde inhusto castiga.

EXIGENCIA DI FISCAL

Fiscal a bisa cu E.d C. kier laga mustra cu e tabata na e lugar ora cu e asalto arma pasa pero no a haci nada. Fiscal no kere esey. Na opinion di Fiscal, E.d C. tambe tabata envolvi. El a mustra cu anterior e sospechoso E.d C. a bay na e lugar pero segun e sospechoso el a bay pa busca un apartamento. E empleada a bisa cu e sospechoso a bay puntra pa un producto. E ta haya cu e empleada y e imagennan di video ta mustra bon cla cu ta E.d C. tabata na e lugar. Fiscal ta haya cu E.d C. a actua manera complice caminda el a pusha e señora pa bay cu e otro asaltante y a coy placa hinca den un tas y bay hunto cu e otro asaltante.

Fiscal a bisa cu e ta comparti punto di bista di Hues, pakico e sospechoso ta bay cu e asaltante cu ya caba ta pafor di e lugar. Fiscal a conclui cu E.d C. ta complice di e asalto arma. El a bisa cu pa cu e castigo e ta tene cuenta cu E.d C. no ta desconci pa husticia. Na 2014 caba el a worde condena na 4 aña pa asalto arma. E ta haya cu mester impone castigo mas pisa y a exigi 5 aña di prison.

DEFENSA DI ABOGADO

Abogado mr. v.d.Biezen a bisa Hues cu E.d C. tabata presente na e lugar. E pregunta ta si e tabata envolvi den e asalto arma of no. E.d C. ta para riba cu e no tabata envolvi den e asalto arma. E señora P. ta bisa cu E.d C. a saca arma pero esey no ta corecto.

E abogado a remarca, con a para cu e asaltante cu tabata arma? E ta haya cu e investigacion no ta completo. El a remarca cu tin imagennan di video ora cu e asaltante a drenta pero no tin imagen ora el a bay. E abogado ta haya cu esaki ta importante pa tin claridad kico a pasa realmente. El a pidi pa declara E.d C. liber.

Fiscal a bisa cu no por haya e otro asaltante. No sa si e ta na Aruba of el a bay. El a bisa tambe cu e no ta haya cu e investigacion ta incompleto.

E.d C. ta haya e exigencia di Fiscal ta inhusto. El a remarca cu e no a duna declaracion na Recherche pasobra nan ta corupto.

Hues a bisa cu e ta bay studia e caso y mayan E.d C. lo haya sa kico ta Hues su decision. DIARIO lo informa lectornan di e decision di Hues.

 

- Advertisement -

DUNA COMENTARIO

Please enter your comment!
Please enter your name here