Home Parlamento MEP ta bisa cu Richard Arends a pega cu e mesun malesa...

MEP ta bisa cu Richard Arends a pega cu e mesun malesa di su lider Mike di lansa mentira y manipula

38
0
SHARE
- Advertisement -

ORANJESTAD (AAN): Segun MEP, un di e politiconan di AVP cu tambe a pega cu e mesun malesa di Mike Eman, esta di manipula, gaña y insinua ta e parlamentario Richard Arends, kende durante e ultimo simannan ta creando e impresion cu e tambe a cuminsa halucina y ta mira pitufo tur rond di dje.

Asina por a lesa den su ultimo comunicado cu e gobierno actual a retira mas cu 200 mama y tata di famia y den su ignorancia sr. Arends ta yama esaki persecucion politico. Partido MEP ta enfatisa un biaha mas cu e gobierno di MEP-POR-RED a actua segun propio decision di e ex-Prome Minister Mike Eman na 2013, esta cu tur e batayon di coordinadornan cu a bin cu e ministernan ta bay hunto cu e ministernan!

Gastonan di personal:

Alavez tur e coordinadornan cu den pura a worde hinca den tur e departamentonan di gobierno, sin cu tabata tin vacatura na e departamentonan aki, mester por sa tambe cu no tin placa aloca riba presupuesto pa por paga nan fin di luna. Echo ta cu ningun otro persona cu no ta Richard Arends mes cu mester por sa tambe cu ta e propio Gabinete Eman a priminti CAFT cu nan lo percura pa reduci e gastonan di personal cu 5% tur aña. Awor e pregunta na sr. Arends ta, con abo ta kere cu bo gobierno lo por a cumpli cu e reduccion di 5% di gastonan di personal aki,  si ta bo gobierno mes kier a yena y stiwa e aparato gubernamental cu mas di 200 compinchi/coordinador cu partijdiploma den un solo tiro?

Reparatietoeslag:

Tambe den su comunicado sr. Arends a pronostica cu e gobierno actual lo bay elimina varios beneficio cu AVP a duna pueblo durante e ultimo 8 añanan. Aki tambe e ta tira para bisando entre otro cu e gobierno nobo lo bay elimina reparatietoeslag, pago di schoolgeld y e aumento duna na pensionadonan.

Ningun di e insinuacionnan aki ta cuadra cu realidad ya cu esakinan por sali solamente for di mente di un hende cu ta mira pitufo. Ta berdad cu e reparatietoeslag pa e trahado y pensionadonan a ser introduci pa AVP. Pero ta asina tambe cu ta e gobierno di AVP mes a haya su mes obliga di introduci e toeslagnan aki  ya cu durante 8 aña nan no a aumenta e salario minimo ni e pensioen di viehez den forma substancial p’asina combati e aumento drastico di costo di bida.

Masacre na Ambtenaarnan:

Un otro mentira di sr. Arends ta cu durante 8 aña e gobernacion di MEP a vries placa di vacacion di e ambtenaarnan. Increibel, esaki ta muestra palpabel cu mas abao den e pos di mentira sr. Arends no por a bay ya cu Gabinete Oduber semper a paga e placa di vacacion completamente durante 2002 pa 2009.

Pero locual sr. Arends si mester bay splica e ambtenaarnan ta, con su gobierno a masacra nan cu medidanan cruel: 1. A aumenta e edad di pensioen te 65 aña, 2. A introduci franchise, 3. A introduci e middelloonregeling, 4. A reduci e duurtetoeslag y 5. A reduci e porcentahe di acumulacion di pensioen. Cu tur e medidanan cruel aki, tur ambtenaar lo bay drasticamente atras den nan entrada ora nan baha cu pensioen.

Bashi Premie y Gelijk Bedrag:

E zwiep di medidanan di AVP ta worde sinti caba door di e ambtenaarnan cu a baha cu pensioen entrante januari 2015, caminda e gobierno di AVP a percura pa elimina e Bashi Premie y Gelijk Bedrag di e pensionadonan cu ta suma na 4000 Florin pa aña. Un acto cruel cu tin hopi di e pensionadonan hopi disgusta, rabia y ta odia tur dia e gobierno cu Richard Arends a sostene ciegamente. Pero no ta Richard Arends mes tabata na 2014 e consehero principal di Gabinete Eman cu a conseha pa introduci tur e medidanan cruel aki riba lomba di e ambtenaarnan/pensionadonan por medio di e NPR 2014?

Pues ta mas cu bisto awor cu Richard Arends kier aparenta como e bon mucha homber den e fraccion actual di AVP, pero pueblo mes por mira cu poco poco e ta mustrando su berdadero cara di mentiroso y manipulador.

 

- Advertisement -

DUNA COMENTARIO

Please enter your comment!
Please enter your name here