Home General Minister a stop permiso di Coney Island pa 48 ora pa investiga...

Minister a stop permiso di Coney Island pa 48 ora pa investiga accidente di mucha

161
0
SHARE
- Advertisement -

ORANJESTAD (AAN): Tabata Diasabra anochi 9:30 pm, cu autoridad a haya informacion via Centro di Alarma, cu un mucha homber di 9 aña di edad a sali cay for di e slip grandi “Taboca” cu tin na Interpark Coney Island.

Mesora un unidad di Polis a wordo manda na e lugar.  Agentenan a yega y a papia cu e dama di inicial G.M., kende a splica cu su yiu homber di inicial B.P. a bay riba e slip di Taboca y na final a bin cay duro riba su chan-chan.

Polis a skirbi den nan rapport, cu e Taboca slip aki ta uno cu bo mester bay riba dje drumi.  Pa asina bo slip bay abao, debi cu e tin un bahada estilo ola.

E mama a declara na Polis, cu su yiu sinembargo na mitar caminda a sigui slip den posicion ‘sinta’, y debi na esey el a wordo lanza den halto debi na e olanan aki.  Unavez cu el a yega abao, e mucha a keda drumi riba suela y gritando di dolor na su lomba.

Un docter cu tabata bishitando e Coneyisland tambe a bay duna prome asistencia na e mucha.

Polis a papia cu e trahador di inicial J.D., kende a bisa cu nan a indica e mucha homber B.P. cu e mester keda den posicion drumi di halto te abao.

Pero e mucha homber a cuminza bay abao drumi, pero na mitar caminda el a bira y bay sinta sigui slip.  Debi na esaki el a bay halto ora di pasa riba e ola, bay halto y cay bek duro riba e slip.

Paramediconan a bay cu e mucha rumbo pa Hospital, unda a haci test cune y a resulta cu tin nada grave.  Nan a dune algun remedi pa recept, y e mucha a bay cas como 1 ora despues.  E mucha mes a baha di auto y drenta cas riba su propio forza.

MINISTRO:

Minister di Husticia mr. Andin Bikker den consulta cu Minister encarga cu DTI, Sr. Otmar Oduber a yega na e decision pa stop e permiso di Coney Island pa 48 ora. E decision aki a wordo tuma, pa motibo cu diasabra anochi un mucha cu a bay slip, pa un motibo of otro a cay duro riba e slip.

Debi na e caida, e mucha no por a move su curpa. Cu ambulance a transporte mesora pa hospital. Despues di e incidente lamentabel aki Minister Bikker a inicia un investigacion pa sa kico exactamente a pasa cu e mucha por a cay for di e slip diasabra anochi.

Lo bay haci investigacion na slip cu e mucha a cay for di dje pa mira si e ta safe pa pone atrobe den uzo.

Un otro exigencia den e investigacion ta riba e personal cu ta yuda e bishitantenan pa subi den un di e aparatonan aki. E personal mester sa bon con pa traha cu e makinaria pero tambe duna bon servicio y mantene siguridad di esunnan cu ta subi un di e atraccionnan. Bida di un persona ta hopi importante. Minister Bikker kende a pone su mes na altura di loke a pasa diasabra anochi, a dicidi di tuma un decision serio y decisivo pa cera Coney Island no solamente parcialmente pero full. Cada mashin y cada personal lo bay pasa den un investigacion pa asina por sigura cu Coney Island di tur manera ta safe, specialmente pa e muchanan cu no ta tene nan mes na instruccion di e personal. Hopi biaha e muchanan ta para of haci wega peligroso cu nan no mester haci ora nan ta subi un di e makinarianan aki.

Despues di 48 ora cu Minister Bikker haya e rapport  di e investigacion for di DTI y KPA, lo evalua si lo bolbe duna e permiso na Coney Island pa e por sigui cu su servicio di entretene grandi y chikito.

Na Pagina 19 di DIARIO di awe, por lesa mas di un entrevista cu e Mama y tata di e mucha, y con nan mes a keda asombra cu autoridad a cera e Coney Island.

- Advertisement -

DUNA COMENTARIO

Please enter your comment!
Please enter your name here