Home Gobierno Minister Plenipotenciario ta aclarea rumornan tocante biahanan pa Hulanda

Minister Plenipotenciario ta aclarea rumornan tocante biahanan pa Hulanda

419
0
SHARE
- Advertisement -

ORANJESTAD(AAN)—  Minister Plenipotenciario Guilfred Besaril den conferencia di prensa a contesta e rumornan cu tin cuestionando e biahenan haci pa su persona. El a sugeri pa cierto medionan di prensa tuma contacto cu ne prome cu publica informacion eroneo.

Minister a nenga cu ta 26 biahe a wordo haci, manera rumornan riba social media a indica. E minister a indica cu apenas e gobierno aki tin 7 siman di gobernacion durante cua periodo el a biaha pa Hulanda na dos ocasion pa atende cu su prome responsabilidadnan como Minister Plenipotenciario na Hulanda.

“Mi no a bay Somalia bay lobby pa ningun hende, tampoco mi a bay wak wega di futbol na Sur-Africa. Mi a bay dos biaha Hulanda pa haci mi trabou. Uno ta fin di november caminda cu mi tabatin Koninkrijks Ministerraad pa tende cune, caminda cu e tema tabata nos hermana isla Sint-Maarten.

Y como Ministro Plenipotenciario, tabata mi tarea pa mi ta eynan, pa asina aki vocifera opinion di pais Aruba den un caso asina delicado y pa asina aki nos extende e man amigo cu Sint-Maarten.”

Den e dos reunion cu Minister a atende na Hulanda, a toca e tema di suma importancia, e deadline di CFT. Minister a splica cu mester a recorda CFT cu e gobierno di Gabinete Wever-Croes no tabatin ni un luna cu a tuma over e batuta pa locual ta gobernacion. A wordo pidi pa duna e espacio necesario pa asina aki e trabou por wordo haci manera debe ser.

Minister a indica cu Sr. Juan David Irausquin y su famia ainda ta na Hulanda. Den december a tuma e decision humano pa asina permiti Sr. Irausquin pa keda algun dia mas eynan y duna su famia espacio pa haya un otro lugar mientras tanto. Pa e motibo aki Minister Besaril a dicidi di keda Aruba, te ora cu tur cos ta bon regla. Como un gobernante responsabel Minister Besaril a splica cu el a scapa pais Aruba di cierto gastonan door di a opta pa a keda Aruba mientras famia Irausquin ainda no a move.

“Awor aki cu nos ta yegando un punto unda cu mi por bay Hulanda na un manera drechi, na un manera cu mi tin tur cos organisa.” Awor Minister Besaril por subi avion y por bay cumpli cu su tareanan na Hulanda. Dos pa tres biaha pa aña e minister a priminti di regresa Aruba. Motibo di esaki ta cu Minister Besaril tin un tarea pa cumpli cu ne cu e hobennan cu ta bay dicidi dentro di poco pa bay sigui nan estudio na Hulanda.

 

- Advertisement -

DUNA COMENTARIO

Please enter your comment!
Please enter your name here