Home Social Minister Rudy Lampe a cuminsa bida nobo y awor tin un pareha

Minister Rudy Lampe a cuminsa bida nobo y awor tin un pareha

337
0
SHARE
- Advertisement -

ORANJESTAD(AAN): Hopi te awe ainda ta yame Pader Lampe, probablemente pa respet, pa cariño of kisas pasobra nan no ta consciente cu Misa Catolico a expulsa Dr. Rudy Lampe como sacerdote for di hopi aña pasa caba. Den fin di siman, pa nan Resumen di Aña, e matutino Extra di Corsou a dedica tres pagina na un entrevista exclusivo cu Minister Dr. Rudy Lampe.

Den e entrevista na final, el a duna Extra un primicia, indicando cu awor si e ta los di pasado, los di su bida sacerdotal y ta cuminsa un bida nobo, el a haya un pareha Mexicana y ta formalisando su relacion den e dianan aki.

Esunnan cu ta sigui Prensa di Corsou a keda sorprendi pa e anuncio aki, pasobra no obstante e hecho cu Lampe a scoge pa politica, toch hopi hende ta sigui mire como Pastor y como tal no por casa y/of tin un pareha.

Dr. Rudy Lampe a conta Extra na Curaçao, cu el a lamenta masha e decision di Obispado di Willemstad, pa a expulse di e forma aki, aplicando e castigo di mas pisa cu ta existi den religion Catolico. E ta bisa cu na Aruba el a yega di tende di casonan di Pastor cu a comete pedofilia, otro cu a malversa como 100 mil Florin di misa, nan a pidi pordon y a djis sigui cu nan funcion.

Den caso di Dr. Rudy Lampe, kende a studia teologia y como tal ta docente na scol tambe, el a haya un expulsion ‘masha pisa’, cu ta encera cu e no por haci misa mas y riba dje, a prohibi’e di drenta of traha na cualkier scol Catolico.

Na aña 2013, ora Papa Francisco a asumi e puesto Papal, el a haci un intento mas pa nan habri su caso. Misa Catolico a dicidi na aña 1983 cu no ta permiti pa Pastornan ta involucra den politica, di ningun forma.

Na Aruba, Diosesis di Willemstad, bao unda Aruba ta resorta, a pidi Lampe pa scoge un di dos y ora el a opta pa no laga politica, a expulse di titulo sacerdotal.

A purba apela e decision, pero nada.

Papa Francisco a medio habri un porta pe, pero tabata depende di conseho di Obispo di Willemstad. Y aki ta unda Monseñor Luis Antonio Secco di Corsou a duna un conseho negativo, haciendo tambe cu a cera su caso pa semper y cerando porta pa nunca mas e bira un Pastor. E Obispo den su conseho na Vaticano a bisa cu e no ta sinti cu Rudy Lampe no a demostra señal di conversion ni tampoco arepentimento.

E decision aki sin duda tabata un sla duro, no solamente pasobra e no por lesa bijbel mas den misa, no mag parti sant’ hostia, no por haci misa, ni nada, tambe a prohibi’e di drenta schoolnan Catolico. El a conta e corant di Corsou cu ta di su salario di docente na Universidadnan dunando teologia e tabata biba, pues e nunca a cobra salario di Pastor ni for di Gobierno di Aruba y ni for di Obispado. Cu e no por a eherce su trabao mas como docente, a resulta den un sla financiero duro pe.

BIDA NOBO:

Pero awor, mirando cu Pastor e no por bira nunca mas, el a dicidi pa cambia su bida. E mester crea un identidad nobo pa kita for di e imagen cu e ta un Pastor. Den su palabra el a considera cu e mester laga los di pasado, los di e bida di Pastor y crea un bida completamente nobo. Entretanto el a conoce un pareha Mexicana, cu kende e ta hibando un relacion.

El a duna e primicia cu den e dianan aki di fiesta, el a cera un “geregistreerd partnerschap” cu su pareha, como solidaridad pa esunnan cu no por casa.

E mandatario a prefera di no divulga nomber di su pareha ainda ni tampoco duna fecha cu e lo drenta e relacion oficial via Notario.

CARERA POLITICO:

Dr. Rudy Lampe a inicia su carera politico participando na eleccion pa prome bes na aña 2005 y e tempo ey a logra no menos di 2.334 riba su nomber. Esey tabata su salida record y nunca mas el a logra sobrepasa e logro ey. Den eleccion di aña 2009 el a cay den voto te na 1360 voto individual.

E trend di caida a sigui den eleccion di aña 2013 unda el a produci 613 voto pa su mes. Den e ultimo eleccion cu RED a logra crece atrobe, e mes a logra menos voto atrobe, solamente 466 voto riba su nomber.

Ironia di bida ta cu tempo Rudy Lampe a haya 2.334 el a bira Parlamentario y awe cu el a haya solamente 466 voto, el a bira Minister di Enseñansa. E votegetter di RED e eleccion aki tabata Ricardo Croes cu 3359 voto riba su nomber.

 

- Advertisement -

DUNA COMENTARIO

Please enter your comment!
Please enter your name here