Home Gobierno Progreso y prosperidad pa e ser humano lo ta central den vision...

Progreso y prosperidad pa e ser humano lo ta central den vision di gobierno

11
0
SHARE
- Advertisement -

Prome Minister Evelyn Wever-Croes:

ORANJESTAD (AAN): Den su discurso na canalnan di televicion, radio emisoranan y riba medionan social prome cu a drenta e aña nobo, Prome Minister di Pais Aruba, Señora Evelyn Wever-Croes a duna un reflexion riba aña 2017 y a elabora riba e plan di gobernacion di Gabinete Wever-Croes. Prome Minister a bisa lo siguiente:

“2017 tabata un aña den cual nos a mira hopi cambio. Un campaña electoral diferente, cu a enfoca mas riba e contenido di programanan. Un resultado di eleccion cu a condusi na un coalicion pa prome biaha den 20 aña. Un proceso di formacion den cual e interes di e partidonan no tabata na prome luga, sino e interes di pueblo di Aruba. Un union entre tres partido hopi diferente, pero cu un meta comun: bienestar di e ser humano.

Nos gobierno nobo mesora a worde confronta cu e crisis financiero. Una bes e cifranan real no por a worde scondi mas, e realidad a bira conoci di deficitnan adicional grandi. Nos kier cumpli cu compromiso y palabracionnan haci riba tereno financiero. Sinembargo, nos a compromete cu nos lo presenta un plan den cual lo pone Aruba riba e caminda corecto di un presupuesto balansa, pero e biaha aki a base di cifranan realistico y un plan realistico.

Nos compromiso ta pa sanea e situacion financiero di nos pais, pero den esaki nos no por neglisha e ser humano mas. Apenas algun dia den gobernacion, nos a worde confronta cu un otro crisis, e crisis social, cu a desemboca den morto cruel di dos angelito, Rishandroh y Eugene, victima di abuso di mucha. Un caso lamentable cu a sacodi henter nos pais y Reino.

Desde e momento aki e enfasis di atencion na Aruba a cambia. Si ainda tabata tin hende ta duda, desde e dia aki tur hende ta di acuerdo cu e problemanan social no ta simplemente problema mas, sino un explosion social y nos no por warda ni un momento mas pa atende cu esaki. Nos gobierno diligentemente bou dirigencia di Minister di Asuntonan social, a atende cu e tema, y pa mustra e seriedad di e asunto un comision a worde institui bou di dirigencia di Minister President, pa bin cu un plan di emergencia cu lo worde ehecuta cu prioridad.

Cu e gobierno nobo, por a nota mesora e bientonan di cambio, den tur skina. E ser humano a haya atencion. Orden y respet ta worde implementa. Speranza y confianza ta worde fomenta. E bientonan di cambio cu ta crea e fundeshi pa e vision di gobierno pa 2018.

Y apesar cu e retonan financiero ta sigui exigi atencion, nos gobierno den 2018 lo sa di trece un balansa entre finanzas publico sano, y pone e ser humano central.

Ademas e atencion lo ta dirigi riba bon gobernacion y integridad. Un ministerio nobo cu ta resorta bou di Minister President lo ta encarga pa bin cu e Camara di Integridad, y pa fomenta integridad y bon gobernacion den tur area di gobernacion. Nos institutonan halto di estado lo worde fortifica y Parlamento lo worde independisa pa asina cumpli miho cu e tarea di controla gobierno.

E situacion financiero lo worde sanea basa riba un plan financiero bon defini y realistico, den cual lo reduci e deficit, y mes momento crea espacio pa desaroyo economico, pa inversionnan y pa cumpli cu e meta principal: pone e ser humano central back.

Aruba lo bira atrobe un luga sigur pa biba. E problemanan social lo worde atendi cu nan, y soluciona mas tanto posibel y esnan mas vulnerable lo haya atencion. Nos muchanan lo haya proteccion atrobe. Nos hobennan lo haya sosten y perspectiva atrobe y nos grandinan lo haya e cuido digno cu nan merece.

E cuido di salud lo haya atencion. Tempo di espera lo worde corta y e cuido lo worde treci mas cerca di e pacient.

Enseñansa lo worde innova y lo worde dirigi den crea mas oportunidad pa nos studiantenan. Mas graduado y menos “dropouts”.

Costo di bida lo worde reduci, y lo introduci miho control di prijsnan.

Nos medio ambiente lo worde protehi y e problema di sushi lo worde soluciona.

Y di e forma aki lo trece progreso, prosperidad y abundancia den cada hogar na Aruba.

Mi kier gradisi cada ciudadano di pais Aruba pa bo sosten.

Ohala cu 2018 por trece hopi bendicion pa cada hogar, y cu nos como pueblo por uni mas. Cu UNION nos pueblo a logra cosnan grandi, y cu UNION nos lo logra cosnan grandi pa Aruba.

Cu e aña nobo por trece hopi paz, harmonia y felicidad pa cada un di boso, y pa Aruba, cu e aña nobo trece bienestar y progreso pa tur. Un Feliz y Prospero aña 2018 pa henter e pueblo di Aruba”.

 

- Advertisement -

DUNA COMENTARIO

Please enter your comment!
Please enter your name here