ORANJESTAD (AAN): Segun Rocco Tjon di MEP, como pais bo mester ta compliant cu tratado, ley, normanan internacional pa loke ta bo instituto correccional.
Si bo ta cumpli cu tur e aspectonan riba cual nan ta audit bo, por ehempel e actividadnan cu tin pa detenido pa asina nan por integra back exitoso den comunidad, pero tambe maneho di personal y e infrastructura pa asina por brinda mihor condicionnan di trabao pa e personal.
E costonan mara na maneho di un instituto correccional ta enorme. Debi na e hecho cu no tin recurso suficiente, hopi biaha no por ta compliant cu entre otro tratadonan y si viola e tratadonan, den cual derechonan humano ta worde prescribi, e por bira un asunto di Reino.
Esaki ta e motibo pakico siman atras a pone e topico aki riba agenda durante IPKO. Sr. Tjon, lider di e delegacion Arubano, ta di opinion cu mester bin cu un solucion duradero pa nos instituto correccional. Un insituto correccionall sano lo contribui na baha recidivismo y gastonan di operacion di e instituto.
Aplicando e pilarnan di sostenibilidad, esta aspecto di (1)hende (2) medio ambiente (3) economia; den un contexto di un instituto correccional, lo yega na un solucion duradero pa KIA.
Ademas tambe lo wak su efecto back den nos comunidad riba tur aspecto di sostenibilidad. Manera por ehempel menos recidivismo, detenidonan cu ta integra exitosamente y ta aporta na nos economia y menos gasto den e aparato hudicial.
