Home Parlamento Sevinger ta acusa Minister Oduber di coy placa di Green Corridor pa...

Sevinger ta acusa Minister Oduber di coy placa di Green Corridor pa renoba Bestuurskantoor

298
0
SHARE
- Advertisement -

ORANJESTAD (AAN): Green Corridor  cu ta 99% cla pa worde entrega, no por ta un proyecto di mal calidad, sigur ora cu experto y specialistanan tanto di Hulanda como di Aruba, a controla ehecucion di e proyecto aki for di dia cu a inicia cu trabaonan di construccion.

Parlamentario, ex Minister di Infrastructura sr Benny Sevinger den forma cla y cu documento, a mustra cu Minister di Infrastructura c’un mentalidad vengativo y destructivo, ta papia  di un crisis mientras cu e proyecto pa 99% ta cla caba y falta solamente 1% pa e finalisa y worde entrega na Gobierno.

Sr Sevinger a mustra cu e wega politico di Minister Oduber ta sumamente visibel pa tur hende, caminda na prome luga su persona ta manda bisa Parlamento cu e kier un reunion y ta haya reunion tambe for di Presidente di Parlamento, pa despues bin papia di problemanan di e Green Corridor cu ya ta cosnan cu tur hende tabata sa y cu e compania mester a regla pa asina e proyecto por worde entrega.

Expertonan di DOW hunto cu oficialnan di Rijkswaterstaat a supervisa ehecucion di e proyecto aki y ta expertonan serio y responsabel kendenan a haci un bon trabao y ta di lamenta cu Minister  Oduber ta expone e profesionalnan di e forma baho aki.

Parlamentario  Benny Sevinger tambe a mustra cu pueblo  mester realisa y pone nan mes na altura di e trikinan cu Minister Oduber a bin ta ehecutando cual tur ta na su fabor, pa su ministerio.

Riba presupuesto 2017, Gabinete Mike Eman tabatin e suma di 6 miyon como prome pago pa e proyecto di Green Corridor cu mester a keda cla na luna di october, pero e contratista a manda un carta cu e lo no keda cla na e tempo stipula y cu e lo entrega e proyecto completo na comienso di 2018.

A base di bestek y acuerdo cu e contratista pa cu e proyecto, expertonan di DOW a haci un inventario di loke falta ainda pa termina, hunto cu otro aspectonan di e construccion cu mester cambia of worde drecha y cual a bira e lista di 500 punto cu ex Minister Sevinger tambe a pidi pa worde traha.

Ta un proceso normal a base di e contract cu tin, pues loke Minister Oduber ta haciendo awo ta uzando e lista aki pa duna e impresion cu cosnan ta malo y no ta bon.

Parlamentario Sevinger a mustra cu a base di e carta di e compania cu e lo no por entrega e proyecto na e fecha stipula, Gobierno no a bay over na paga e compania e suma concerni di 6 miyon Florin cu a keda e ora riba presupuesto 2017.

Esaki a pone cu Gobierno a manda pidi conseho y cooperacion di departamentonan concerni, pa uza e suma aki pa otro inversionnan y a logra haya sosten di Conseho di ministronan pa e placa aki worde uza pa entre otro pa pone camindanan di asfalt Sero Janchi, Alto Vista, Jan Flemming. Kas Ariba, Noord, Papilon, Sero Blanco y Bubali y e aprobacion pa haci esaki a drenta dia 27 di october 2017.

Esaki a worde poni den e presupuesto supletorio di 2017 cu a worde trata despues pa Gabinete Wever Croes na final di 2017.

Sinembargo, aki ta caminda Minister Oduber  durante tratamento di e presupuesto supletorio aki, a pidi  su gobierno pa pone un suma di 6 miyon Florin disponibel bou di e pretexto cu e placa aki lo bay pa renobacion di Bestuurskantoor, un proyecto cu no tin nada concreto riba dje y cu ta un monumento nacional cu ta rekeri un otro tipo di proceso prome cu yega na su ehecucion.

“Pues aki por bisa cu e 6 miyon cu Minister Oduber a pidi na Parlamento y a haya aprobacion pa esaki, ta mesun suma cu Gabinete Mike Eman II tabatin pa paga e contratista di e proyecto Green Corridor, pero awor e ta bin Parlamento pa bolbe pidi mas placa, pa asina e bay atende cu e proyecto aki,” Benny Sevinger di fraccion di AVP a mustra.

E legislado a sigui mustra cu e reunion di diamars ultimo a worde yama pa Minister Oduber, e mes a laga su expertonan formula un mocion,   y bisando cu e kier bay mira cual miembro di Parlamento lo vota contra di e mocion aki.

Fraccionnan cu ta sostene Gobierno a guli e pilder aki manda abou y asina Minister Oduber lo por haya otro suma adicional na su disposicion cu cual e por sigui sirbi su interesnan politico cune.

 

- Advertisement -

DUNA COMENTARIO

Please enter your comment!
Please enter your name here