Home Parlamento Tema Venezuela ta den contexto di e tema central “sostenibilidad”

Tema Venezuela ta den contexto di e tema central “sostenibilidad”

14
0
SHARE
- Advertisement -

Presidente di reunionnan di IPKO sr. Rocco Tjon:

ORANJESTAD (AAN) – Parlamentario di fraccion di MEP sr. Rocco Tjon ta presidi e reunionnan di IPKO, cu manera ta conoci Aruba ta su anfitrion e aña aki.

Den entrevista cu nos redaccion, e parlamentario a subraya cu e reunionnan ta hopi interesante y cu nan a scoge como tema central “Sostenibilidad”. Den cuadro di esey, tambe e tema di Venezuela a wordo poni riba agenda.

Esaki ta un tema cu a causa hopi preocupacion na Aruba, y durante e reunion di Dialuna nan a haya un relato extenso for di e departamento concerni, pa asina hunto cu nan coleganan di otro Parlamentonan, por mira como Parlamento, kico e ta bay nifica pa percura pa e seguridad y control wordo fortifica den nos fronteranan.

Parlamentario Tjon a señala cu e tema di Venezuela tambe tin su consecuencianan pa Aruba su Instituto Coreccional (KIA) mirando cu ultimo temponan e detencion di Venezolanonan a aumenta.

E parlamentario a expresa cu pesey e ta contento cu riba peticion di e Comision Auba, di Staten, pa prome biaha e tema di prisonnan sostenible tambe a wordo poni riba agenda, pa asina wak den Reino con ta bay yega a corto plazo, na un Instituto Coreccional sostenible.

Tambe el a señala cu Minister Andin Bikker, Titular di Husticia, a logra di pone e tema aki riba agenda, pa trate den e reunion di Ministernan di Reino cu tambe lo bin.

Tjon a subraya cu e ta kere cu asina lo por yega na un solucion concreto for di tur angulo, esta Parlamento y Gobernacion, pa na final di dia trece cambionan pa Aruba su Instituto Coreccional.

Parlamentario Rocco Tjon a subraya cu como lider di fraccion, na momento cu e señalnan di ciere di frontera pa Aruba for di Gobierno di Venezuela, a wordo manda, el a contacta Minister Presidente y el a haya un relato extenso y di biaha, como miembro di e Comision di Asuntonan di Reino, el a informa tur e parlamentarionan concerni tambe, y otro siman nan lo yama un reunion  cu Minister Presidente pa e duna henter e comision un relato amplio.

Parlamentario Rocco Tjon a subraya cu Minister Presidente a informa nan cu ya caba nan ta bezig cu diferente iniciativa, drecha e lazonan cu Venezuela, pasobra e causa di tur e situacion ta cu, segun informacion, Venezuela na aña 2016 a manda diferente carta na Gobierno di Aruba, y a pidi mas ayudo pa motibo cu nan ta preocupa den sentido cu diferente material manera oro y comestible, tabata wordo exporta for di Venezuela pa nos pais y esey ta ilegal aya.

Segun e parlamentario, nan tin un lista di productonan cu Aruba tabata importa. Minister Presidente a informa cu tin un Comision aworaki cu a wordo lanta, unda cu hunto cu autoridadnan Venezolano ta bay mira con nan por mehora y fortifica e controlnan cu tin na Barcadera. “Esaki ta hopi importante pasobra e ta un problema cu for di hopi tempo caba ta sosode, y aworaki ta bon pa hunto cu tur e Parlamentarionan den Reino yega na un solucion duradero”, el a conclui.

- Advertisement -

DUNA COMENTARIO

Please enter your comment!
Please enter your name here