Home Salud Tratamento necesario pa un victima di accidente ta wordo cubri pa AZV

Tratamento necesario pa un victima di accidente ta wordo cubri pa AZV

156
0
SHARE
- Advertisement -

Segun director Anko Ringeling

ORANJESTAD   (AAN): E caso di Kyrenne Croes a conmove nos comunidad. Kyrenne ta un hoben kende a haya un accidente hopi grave aña pasa y  dokternan no tabata tin speransa di bida pe, pero famianan a sa di wanta duro, y e gana di biba di e hoben mama aki di 25 aña a haci cu el a sa di sali padilanti, pero asina mes mester di e tratamento y terapia necesario pa e por recupera y pa esey, e tin cu hay’e na Colombia.

Pero lamentablemente AZV no tabata riba e mesun liña cu e famianan. Y a haci cu a busca diferente manera pa recauda e fondonan necesario pa asina nan por logra e meta proponi

Durante un conferencia di prensa cu AZV, director Anko Ringeling, a splica di nan banda cu den pasado a duna e informacion riba kico ta wordo cubri door di AZV. pero tin cierto discusionnan, y ta bon pa keda ripiti esakinan.

Manera ta conoci, entre otro den e pakete cu ta basta amplio cu AZV ta cubriendo, esta dokter di cas, fisioterapista, hospital, specialista, etc. un di e cosnan cu ta para den ley, specialmente pa e ayudo y cuido di specialistanan ta cu ta cubri e servicionan di e specialista, tratamento di specialista y ley ta bisa, manera cu ta usual den e profesion concerni. Den e disciplina concerni.

Esey ta netamente un motibo pa proteha e pashent. Si un procedura no ta usual ainda cerca e specialistanan, bo ta core cierto riesgo, segun Ringeling. Den paisnan mas grandi cu nos, tin asociacionnan di e profesional. Tin hospitalnan academico cu ta haci investigacion, tur e recursonan cu nos aki na Aruba no tin.

Den e paisnan ey, na dado momento nan tin mecanismonan pa bisa cu tal procedura, tal tratamento ta responsabel y e ora eynan e ta wordo acepta door di e profesion of e disciplina concerni. Aceptabel den e sentido cu ta suficiente sigur pa pashentnan cu efectonan no desea no ta cori. E ora ey un tratamento asina ta wordo acepta door di e profesion y asina e ta bira tambe un procedimento, un tratamento cu ta wordo cubri door di e seguro.

Ringeling ta sigui splica cu e pregunta cu si un cos ta usual den e disciplina, no den tur pais ta e mesun importante, relevante. E ta relevante den paisnan cu tin sistema parecido na esun di nos. Locual AZV ta cubriendo, ta pa henter nos poblacion. Si e ta conta pa un pashent, un asegurado, e ta conta pa tur.

Otro paisnan, entre otro Merca, ta otro. Eynan no tin un sistema colectivo. Nan no mester contesta e pregunta si algo ta wordo cubri den e pakete colectivo, pasobra nan no tin e sistema colectivo. E sistema colectivo, manera cu nan tin na Reino Uni, na Canada. Nan tur tin mecanismonan pa dicidi si un tratamento ta cay bao di e cubrimento di e seguro colectivo.

Mescos cu cerca AZV. Como cu Aruba no tin e recursonan manera cu paisnan mas grandi tin, pa por delinea esey, AZV ta orienta su mes mas tanto riba Hulanda. Na Hulanda tin diferente mecanismo cu ta dicidi si un tratamento, specialmente un tratamento nobo of un remedi nobo, si esey ta bay wordo cubri door di nan sistema colectivo, e ora ta orienta riba esey. Es decir, si un procedura ta comun y coriente na Hulanda cu ta wordo cubri pa nan sistema colectivo, AZV tambe ta haci’e akinan.

Esey ta un criteria cu Ley ta bisa cu ta mantene, ora cu mester contesta pregunta si un cierto tratamento, si e ta wordo cubri pa AZV.

Un otro pregunta cu hopi biaha ta wordo haci, specialmente rond di discusion di Kyrenne Croes, ta ora un persona mester di tratamento medico, pasobra el a haya su mes den un accidente di trafico, AZV ta cubri esey, esey ta cierto.

Segun Ringeling, e solo hecho cu tabata un accidente di trafico, no ta pone cu no ta cubri’e. Ta cubri’e, pero ta cobra bek te asina leu cu por for di e seguro di e pashent of di e tercer parti cu a ocasiona e accidente.

E no ta asina, si ta un accidente di trafico cu automaticamente AZV ta bisa cu no ta cubri. AZV ta cubri tur e tratamento medico cu ta necesario pa e victima, e pashent e momento ey y despues ta bay wak con ta cobra bek parti di e gastonan cu AZV tabata tin, cu por cobra esey bek cerca e companianan di seguro.

Den pasado a duna informacion, ta cu a sosode regularmente, no dje tanto caso, pero toch de bes en cuando ta sosode, cu un persona ta bay den exterior riba su mes, cu vakantie, of cualkier otro motibo y algo ta sosode eynan cu e mester di ayudo, cu gastonan basta grandi. Den un caso cu un persona a bay riba su mes, ley di AZV ta bisa cu AZV no ta cubri esey. AZV ta cubri solamente tratamento den exterior, si tin aprobacion adelanta.

Den periodonan di vakantie, AZV ta pone aviso den corant, pa alerta e hendenan cu si bay cu vakantie, cera un seguro di biahe, pasobra si algo sosode, AZV no ta cubri esey. E ley ta bisa esey

Finalmente Ringeling a comenta riba un aspecto cu ta relevante pa e caso di Kyrenne Croes y mas caso cu tin. Un di e servicionan, cuido cu AZV ta cubri, segun ley, ta locual cu nan ta yama ziekenhuiszorg. Si mester di ayudo den hospital, e ora ey AZV ta cubri e estadia den hospital y tur e tratamentonan cu ta necesario den hospital. Cierto tipo di tratamento no ta wordo duna den hospital.

Netamente e tipo di tratamento cu un parti di dje cu Kyrenne Croes mester, cu ta tratamento di reactivering of revalidatie. Esey no ta tuma luga den hospital. Hospital ta un luga cu cierto riesgo. E no ta un luga pa estadia di hopi tempo. Na e momento cu ta responsabel pa un hende bay na un otro luga of na su cas, mas pronto bo tin cu haci esey tambe pasobra hospital ta carga cierto riesgo cun’e, segun e director di AZV.

E tipo di tratamento, terapianan, manera reactivering y revalidatie normalmente ta tumando luga den locual nan ta yama un Verpleeghuis. Un tipo di instituto parecido na loke cu nos conoce aki na Aruba, como SABA. Un verpleeghuis cu tin su specialistanan, cu por duna e terapia di reactivering cu revalidatie, Ringeling a splica.

 

- Advertisement -

DUNA COMENTARIO

Please enter your comment!
Please enter your name here