Home Deporte Un biaha mas lo tin e flamante torneo Copa Zabataya

Un biaha mas lo tin e flamante torneo Copa Zabataya

4
0
SHARE
- Advertisement -

ORANJESTAD (AAN)  E famoso rumshop na Moko conoci den boca di pueblo manera “E lugar caminda abo no ta wak ‘nan’, pero ‘nan’ si ta wak bo”, un biaha mas lo organiza e flamante torneo “Copa Zabataya!” ariba dia di Betico benidero, 25 di januari.

Un biaha mas La Roca Rumshop ta tene su clasico torneo di biljart na honor na un gran baluarte di La Roca, sr. Hector “Zabataya” Ruiz, e.f.m. Manera ya ta custumber ultimo añanan, e formato di e torneo ta di team di doubles, caminda cada team di dos persona lo wordo forma a base di decision di lot! Ken lo ta bo patna? Un trabuco of un batacaso? Esaki shonnan lo ta den man di señora Fortuna!

E diahuebs aki ta priminti un biaha mas di ta un exito rotundo! Ta bay tin e famoso “snacks nan pa mañan”, e “tropenbier” cu ta keda un sorpresa cada biaha bo habrie, y e “pasapalonan di ayera” cortesia di e “Harvey Weinstein” di Moko, esta e propietario Roly “enamoration” Ruiz! Pa esnan cu gusta un BBQ crioyo, ta bay tin nada menos e famosisimo “BBQ di Irene”! Segun ultimo noticia cu a drenta, musica lo ta den man di e famoso DJ di añanan 80, nada menos cu Gordon Disco, acompaña p’e conocido percusionistanan “in house” di La Roca, mihor conoci como “The Distortion Desordofication Boys”!

Kico mas tin? Aha! Aki ta caminda e rabo di porco lo bay krul diahuebs benidero! Pa esnan cu kier sa full relato di nan antepasadonan, ta bay tin session special cu nada menos cu Dr. Phil, e FBI guy di “the free savanah”, kende keto bay ta den “F&B”, aunke cu e significado di e “F” y e “B” a cambia desde cu el a bay cu pension! Tambe, despues di hopi deliberacion, propietario di La Roca a dicidi di permiti hungadornan di “B-Class” participa, pa asina acomoda algun hungador di Calabas y vecindario. Un otro “novum” cu lo tey e aña aki ta e “showdown” den ahedrez! Lo ta bay tin dos tipo di borchi y set di ahedrez pa escohe….p’esnan bakia tin e tradicional set cu 4 cabay, y p’esnan nobato lo tin e “house set” cu ta usa 4 burico!!

Ken lo ta e duo triunfador? Cos ta hot! Juni “Kilowatt” ta ariba un racha di victoria! Dr. Bibi ta cortando mane chirurg! “Lucky Viviano” ta den un slump! E djaka di caña “Kid Palmbeach” ta loer manera cayman! “Digital” Dennis ta bezig ta “scan” tur angulo, “Don Carlos” kier gana “back to back”, Juni “Seltzer” su “bank shot” ta monster ultimo tempo, “The Rock” a caba di sorpresa weekend cu a pasa, “The Dominicanesse Kid” keto bay no a kibra un koppi, y “Kid Jungle” keto bay por tumba ken cu ta!! Asina’ki tin varios mas cu dia di Betico benidero por sorpresa un y tur! Actividadnan lo cuminsa desde 1’or di merdia! Dia di Betico shonnan no perde e clasico torneo crioyo di tur aña, “Copa Zabataya!” na La Roca!!

 

++++++

- Advertisement -

DUNA COMENTARIO

Please enter your comment!
Please enter your name here