Home Hudicial 10 aña di prison exigi pa sospechoso cu a tira riba auto...

10 aña di prison exigi pa sospechoso cu a tira riba auto cu pareha aden

66
0
SHARE
- Advertisement -

ORANJESTAD (AAN) – Manera DIARIO a publica, ayera mainta Corte den Promer Instancia a trata e caso penal relaciona cu tiramento cu Ministerio Publico a cuminsa contra e homber J.H. y A.F. Ta asina cu e caso contra A.F. a wordo posponi pasobra Hues ta haya cu mester bin mas claridad riba e whatsapp cu a lesa. E ora a sigui cu e caso contra J.H., kende ta para riba cu e no a tira riba e auto.

Ta asina cu J.H. tambe a sufri herida di tiro. Segun J.H. e heridanan ta di December  2016 y no dia 14 Februari 2017. Fiscal ta haya J.H. culpable di intento di asesinato y a exigi 10 aña di prison. Abogado mr. Bryson a cuestiona e hecho cu Fiscal ta basa su mes riba informacion di whatsapp cu A.F. a pone, siendo cu A.F. no tabata na e lugar di e tiramento y no a mira nada.

E abogado tambe a señala cu e castigo exigi pa Fiscal ta demasiado halto. El a mustra den un caso recien, Corte Superior a confirma e castigo di 8 aña di prison pa un caso similar caminda e acusado ta un residivista.

ACUSACIONNAN

E acusacionnan cu Fiscal a presenta ayera mainta den sala di Corte ta cu e ta acusa A.F. cu riba 14 di Februari 2017 den careda di 2’or di marduga a tira riba e hombernan A. y K. Fiscal ta considera esaki intento di asesinato. Tambe e ta acusa A.F. di tabatin un arma di candela ilegal.

E acusacionnan contra J.H. ta cu riba e mesun 14 Februari 2017, J.H. riba un scooter a bay na un cas den vecindario di Madiki y a tira riba un auto den cual tabata e homber A. cu su amiga P. Esaki a sosode den careda di 11.45 di anochi. Fiscal ta haya cu J.H. a purba mata e homber A. y su amiga P. Fiscal tambe ta acusa J.H. di tabatin un arma ilegal. Ademas Fiscal ta acusa J.H. cu na April 2017 e tabatin 11 gram di marihuana y 11.6 gram di cocaine.

SOSPECHOSO TA NENGA

J.H. a cuminsa na bisa Hues cu hopi hende ta papia cosnan cu no ta berdad. Hues a bisa cu e kier sa kico realmente a pasa. Hues a mustra cu segun e raport di Polis, tur cos a cuminsa cu e tiramento cu a sosode entre e scooter y auto. Polis a bay den Venezuelastraat y a haya e scooter cora riba caminda y dos huls banda di dje. No mucho leu, a haya un peña cu algun bala. Polis a papia cu algun hende tocante e tiramento. Na dado momento un auto a para y un dama P. a bay serca Polis y bisa cu hende cu scooter a pasa na cas y tira riba nan cu tabata den auto. Polis a haya sa cu un hende a bay coy un pistol for di riba caminda despues di e accidente. Despues Polis a haya informacion cu e persona envolvi den e accidente riba scooter lo ta un tal “steroid” y cu e lo a resulta herida di tiro.

J.H. a bisa Hues cu e no yama “steroid”. Hues a sigui bisa cu Polis a bay busca J.H. pasobra un dama lo a yama bisa cu J.H. tabata esun riba e brommer y a tira riba A. y P. Despues A. a sigui su tras y A. a tir’e y herid’e. Polis a bay cas di J.H. y segun e mama di J.H. enberdad el a wordo tira. J.H. a bisa Hues cu el a wordo tira na December 2016 y no Februari 2017.

MENSAHENAN DI WHATSAPP

Hues a sigui bisa cu A.F. despues a wordo deteni y den mensahenan di whatsapp riba su cel, el a bisa cu “steroid” a wordo tira. Esaki tabata na Februari 2018 y no December 2017. Hues a mustra cu hasta A.F. a pone un potret di J.H.  Hues a puntra J.H., dicon A.F. cu ta su amigo ta bay pone algo asina. Segun J.H. e no a wordo tira na Februari 2017 y nan no sa cu el a wordo tira. Hues a sigui bisa cu A.F. tambe a pone cu J.H. a bay riba scooter tira riba e auto na e cas y nan a bay su tras y J.H. a dal contra un auto y A. a tir’e. Tambe A.F. a bisa cu J.H. no kier a bay hospital.

Hues a puntra J.H. si e tabata core e scooter. J.H. a bisa cu e no tabata core e scooter. E helm el a yega di bisti, pero no ta corda na unda. E helm aki tabata banda di e scooter di accidente. Hues a remarca cu ta straño cu net despues di e tiramento, A.F. ta manda e mensahenan y e tabata rabia pasobra a tira J.H.

Hues a bisa J.H. cu lo ta mihor pa papia e berdad. J.H. a bisa cu e ta mantene su declaracion haci na Polis.

POLIS A BAY CU COSNAN

J.H. a bisa Hues cu dia di su detencion Polis a confisca cadena di oro, 1000 florin y pieza di brommer. Hues a remarca cu no tin nada di esey den e raport di Polis. Fiscal a bisa cu e tampoco no tin nada. Abogado mr. Bryson a remarca cu tabatin un razia na e cas y Polis a bay cu e ruman homber di J.H. y a coy diferente cos den beslag. Hues a bisa cu lo mester traha carta pa Fiscal ordena pa debolbe e cosnan bek. Si esaki no sosode e ora ey lo bay haci investigacion.

EXIGENCIA DI FISCAL

Fiscal a mustra cu chofer di e auto den cual e scooter a dal, a bisa cu despues di e accidente e motiociclista a lanta y core drenta mondi y un auto cu tabata sigui su tras a los tres tiro.

Segun Fiscal, investigacion ta mustra cu a tira riba e auto Toyota y tabatin diferente impacto di bala. A haya huls di balanan riba caya. Tambe a haya balanan y un peña. Investigacion ta mustra cu aunke cu e balanan tabata di diferente caliber, nan por wordo tira cu e mesun arma.

Instituto Forence di Hulanda (NFI) a haci investigacion caminda e homber B.A. a wordo haya culpable pa intento di mata J.H. y a wordo condena na 7 aña di prison. E lo a tira riba e scooter. Fiscal a mustra cu Recherche a papia cu mama di J.H. kende a bisa cu su yiu a wordo tira pero e yiu no kier bay hospital. Riba cel di A.F. a haya mensahenan cu ta mustra cu “steroid” a wordo tira. El a hasta manda potret. Tambe A.F. lo a mustra cu ta “steroid” a bay tira riba A. y P. A surgi un persecusion y A. a tira J.H. y J.H. no kier bay hospital.

Na opinion di Fiscal, a base di investigacion di NFI y declaracion di testigonan por conclui cu ta J.H. a tira riba e auto y despues a wordo tira. Fiscal ta considera esaki un intento di asesinato. El a mustra cu e castigo maximo pa esaki ta 20 aña. Fiscal ta haya cu J.H.(22) a haci su mes culpable di un caso hopi serio y den Corte e no kier responsabiliza su mes siendo cu tin diferente prueba contra dje. El a exigi 10 aña di prison, kitando e tempo cu J.H. ta sera den KIA.

Hues, despues di a scucha e defense di abogado mr. Bryson a sera tratamento di e caso y a bisa cu dia 16 Maart 2018 lo tin sentencia.

Den un otro articulo, DIARIO ta publica e defensa di mr. Bryson.

 

- Advertisement -

DUNA COMENTARIO

Please enter your comment!
Please enter your name here