Home Hudicial 7 luna di prison exigi pa homber acusa di kier a causa...

7 luna di prison exigi pa homber acusa di kier a causa herida severo na un dama

75
0
SHARE
- Advertisement -

ORANJESTAD   (AAN) – E homber Colombiano biba na Aruba O.B.V., a scucha Fiscal exigi 12 luna di prison di cual 5 luna ta condicional pa a purba cu causa herida severo na un dama.

E acusacion cu Fiscal a presenta den Corte contra O.B.V. ta cu riba 22 Juli 2017, el a purba mata e dama R.B. Comete maltrata severo cu e dama. Mas subsidiario purba haci maltrato severo. Mas subsidiario maltrato premedita.

PAÑA CU AMONIAC

Hues a puntra e sospechoso O.B.V. si ta berdad e acusacion. O.B.V. a admiti di a haci un error grandi di maltrata e dama, cu kende e tabata casa. Hues kier sa kico a pasa e dia ey. O.B.V. a bisa cu e dia ey el a bay e cas di e dama R.B. Un dia promer el a bay bebe ora el a tende cu su wela a fayece. E dia ey R.B. a baha O.B.V. na un standplaats pa e bay cas di su tata. Sinembargo O.B.V. a bay sigui bebe y a bay bek cas di R.B. A haya discussion cu R.B. y na dado momento el a bay den cushina y a pasa man pa boter di Amoniac. Segun O.B.V., e kier a haci un chansa y a basha Amoniac den un paña y pusha esaki den e dama R.B. su cara y bis’e pa hole. Despues a pasa cosnan cu O.B.V. no kier papia mas y a bisa Hues cu e ta prefera su abogado papia pasobra e ta haci’e dolor.

Hues a mustra cu e dama a bisa cu nan a divorcia y diferente biaha el a yama Polis pa O.B.V. cu ta bay na e cas y causa problema. Na 2012 a kima su cas y O.B.V.  a bay sera y e dama a bay Merca. Despues di 2 aña el a tende cu O.B.V. a haya un partner y el a bolbe. Ta asina cu constantemente O.B.V. ora e ta bou influencia, ta bay serca e dama pa keda drumi na e cas. Dia 22 Juli 2017, O.B.V. a presenta den oranan di marduga pa keda na e cas. E dama a hib’e parada di bus y e dama a bay misa. Despues O.B.V. a presenta na e cas atardi. El a pidi e dama pa keda cas drumi pero e dama a nenga. Despues el a permiti O.B.V. bay baño. E momento ey e dama tabata papiando na cel cu tata di O.B.V. Despues O.B.V. a bise bay wak y a pone e paña cu amoniac na boca y nanishi. Tabatin luchamento formal. O.B.V. a hasta hinca dede den boca y garganta di e dama pa e no hala rosea. E dama a morde su dede y e dama a saca sanger. El a core sali for di e cas bay serca bisiña pa ayudo y nan a hibe hospital.

E tata di O.B.V. a scucha tur cos. E tata a bisa Polis cu nan tin miedo di O.B.V. kende ta bira hopi violento ora e ta bay influencia di droga. A haci investigacion forence den e cas caminda a constata varios mancha di sanger na muraya. Tambe cuchiu na sanger. Den baño a haya un paña y a manda esaki NFI Hulanda pa determina kico ta e likido. Na Augustus 2017 e dama a yama Polis bisa cu el a haya un boter di Amonica riba cashi y a resulta cu esaki tabata e liquido cu O.B.V. a usa. A bay saca potret di esaki y a confisca esaki.

NFI a determina cu e paña tabatin Amoniac den dje. Amoniac ta toxico pa hende si guli’e. Pero si pone riba paña y pone riba cara di un persona, e por tin efectonan malo pa e persona. Dokter cu a analisa e dama a constata cu el a sufri irritacion den garganta.

Hues a mustra cu O.B.V. tin carchi di castigo y e ta adicto na cocaine. Condena den pasado pa violencia. Na 2011 el a wordo condena pa menaza di e dama. Na 2015 el a wordo condena pa cende candela. Aña pasa na Januari el a wordo condena pa menaza.

Hues a sigui bisa cu e raport di Reclasering ta mustra cu diferente biaha O.B.V. a sigui tratamento di rehabilitacion pero e no a cada esaki. Tampoco O.B.V. a sigui curso di controla aggression manera el a wordo ordena pa haci. Reclasering a pidi pa O.B.V. cay bou guia di Reclasering y mester sigui curso di controla agresion.

Psycologo ta haya cu e sospechoso ta responsabel pa su actonan. Na opinion di psycologo e chens tey cu e lo bolbe haci’e y e mester sigui curso pa control agresion. Tambe Reclasering ta mustra cu O.B.V. mester rehabilita tambe di droga.

EXIGENCIA DI FISCAL

Fiscal a bisa cu e ta haya O.B.V. culpable di intento di maltrato severo y no intento di mata. El a pidi Hues pa declara O.B.V. liber di intento di mata. Esaki door cu el a usa Amoniac na cara di e dama. Na opinion di Fiscal, si a keda mas largo cu e paña na cara di e victima, lo por tabatin consecuencianan mas serio. E victima a lucha fuerte pa los. E victima a cuminsa saca sanger y a core sali for di e cas. Tin testigonan esta bisiña y e tata di e sospechoso cu a mustra cu e dama a wordo maltrata. Tanto Reclasering como psycologo ta mustra cu e sospechoso mester controla su emocionnan. Fiscal a bisa cu e ta spera cu awor di berdad e sospechoso ta dispuesto di sigui curso pa controla su emocionnan. En principio Fiscal ta haya cu e sospechoso a sinta suficiente castigo. Pero mirando cu O.B.V. kier ayudo, el a exigi 12 luna di prison di cual 5 luna ta condicional cu un tempo di prueba di 2 aña, bou guia di Reclasering. Fiscal a bisa cu O.B.V. lo mester sigui tur instruccion esta rehabilita di droga y e curso di control di agresion. Fiscal a bisa cu e castigo cu el a exigi ta nifica cu O.B.V. no ta keda mucho mas den KIA.

ABOGADO

Mr. Heinze a bisa Hues cu tin problema entre pareha y e dia ey a surgi discussion. E raport di dokter ta mustra cu e victima a sufri irritacion. Ta door di O.B.V. su adiccion di droga y uso di alcohol, e ta actua di e manera aki. El a sigui diferente tratamento rehabilitacion pero a cay afor pasobra e no kier sigui. No tabata e sospechoso su intension pa haci daño na dama.

Hues a sera tratamento di e caso y a bisa 2 Maart 2018 pa 8.15 or, lo tin sentencia.

 

- Advertisement -

DUNA COMENTARIO

Please enter your comment!
Please enter your name here