Home Hudicial A bolbe pospone caso di asesinato na Jaburibari

A bolbe pospone caso di asesinato na Jaburibari

245
0
SHARE
- Advertisement -

Hues a rechaza peticion di abogado pa laga sospechoso liber

ORANJESTAD (AAN): E sospechoso di inicial M.G. di Canada, acusa cu internacional y premedita a tuma bida di e homber Quach Asiatico/Canades na Jaburibari riba 1 Mei 2017 recien a bolbe presenta den Corte despues cu na October 2017 a caso a keda posponi. Un biaha mas e caso a keda posponi.

Esaki ta e caso cu algun rato despues a conduci na detencion, ora cu esnan supuestamente envolvi a bolter cu nan auto na Hato na final di un persecusion policial.

Ta asina cu e Canades su abogado mr. Faarup dia 20 October 2017 cu e caso a bin dilanti, a pidi pa scucha testigonan. Hues a bay pensa un rato y a bolbe y a dicidi cu 4 di e testigonan cu a duna declaracion contra M.T.G. lo worde scucha como testigo. Hues a bisa cu e hecho cu e sospechoso M.G. no a duna declaracion no ta haci otro. Hues ta haya cu tin indicacion contra M.G. y pesey e ta rechaza e peticion di mr. Faarup pa lag’e liber.

Hues a bisa cu e lo manda e caso back pa Hues Comisario pa scucha e testigonan. Lo mester bay pidi autoridadnan Americano pa scucha e personanan aki. A keda dicidi cu Februari 2018 lo bay trata e caso.

AINDA NO A SCUCHA TESTIGONAN:

A resulta cu ainda Fiscal no a keda cla pa scucha e testigonan. A splica cu mester a haci peticion internacional pero no a logra. Awor si e peticion via Ministerio Publico a bay pa autoridadnan na Canada.

Pesey e caso a worde pospone atrobe. Fiscal a propone dia 18 Mei 2018. Hues a bisa cu teniendo cuenta cu e peticion lo bay dura algun luna.

ABOGADO A PIDI PA LAGA SOSPECHOSO LIBER:

Abogado mr. Faarup a pidi pa pospone e detencion di M.G. pendiente e caso. E abogado a mustra cu na Juli 2017, tabatin e discusion entre abogado y Fiscal pa busca prueba di tiro ariba man di algun personanan cu tabata hunto cu M.G. Na Augustus 2017 Hues a ordena Fiscal pa haci esaki. Dia 20 October 2017 tabatin discussion riba scucha testigonan.

Na opinion di abogado, desde October 2017 mester a busca e testigonan aki. Awor nos ta na Februari 2018 y ainda nada. No ta culpa di M.G. cu ta dura asina hopi. El a remarca cu den e asunto di prueba di tiro, tambe a sosode riba un estado mas laat cu a tranca e caso.

E abogado ta haya cu pa motibo di proceso cu ta tarda y a pidi Hues pa laga M.G. liber pendiente di e caso. E abogado a bisa cu el a conseha e sospechoso pa no papia pasobra esaki lo tin consecuencia cu e por worde mata. Na opinion di mr. Faarup, tin dos sospechoso mas cu tambe tabatin e arma di candela den nan man.

Na November 2017, di resultado di NFI Hulanda, por constata cu un di e sospechosonan tin mas prueba di tiro riba su man compara cu M.G. Tin indicacionnan cu tabatin problema entre e sospechoso E. cu e victima. Segun e abogado, e pregunta ta, si ainda tin motibo di peso cu M.G. ta e culpable. E abogado ta haya cu mester tin mas motibo di peso contra E. cu tin mas prueba di tiro riba su man.

El a mustra cu e hombernan K. y J. lo ta mustra dede riba M.G. siendo cu nan a papia cu otro y K. ta esun cu a bay Polis a bisa cu tabatin un asalto arma y su amigo a worde tira. Despues e ta papia cu J. y nan ta bisa cu ta M.G. E abogado a bisa Hues cu e ta kere cu lo tin sospecho cu ta un otro a tira. A haya e arma na apartamento di un di nan scondi tras di toilette.

E abogado a bisa Hues cu M.G. lo ta dispuesto pa entrega su pasaporte pa no tin e peliger cu e ta huy. Tambe e ta dispuesto pa paga un suma como deposito manera ley ta exigi. El a mustra riba e caso di asesinato den Rancho, caminda Fiscal a exigi 15 aña pa e sospechoso J. pero Hues despues a declara e sospechoso liber pasobra no tin pruebanan. E pruebanan cu Fiscal a usa ta a base di declaracionnan cu ta resulta dudoso. E abogado a mustra riba esaki pasobra e ta sinti cu mesun cos ta bay pasa cu su cliente.

SOSPECHOSO TIN MIEDO:

E sospechoso M.G. a bisa Hues cu el a simplemente haci uso di su derecho di keda keto. E ta haya cu tin sospechoso a worde laga liber. E ta kere cu ayudo di abogado lo bin claridad den e caso aki. El a bisa Hues cu e no a tira y no kier a haci nada malo cu e victima.

El a bisa cu si e bay duna declaracion, e lo bay punta dede riba otro y esey lo pone su famia na Canada na peliger. E sospechoso a bisa Hues cu autoridad na Aruba no conoce su cultura na Canada cu si e bay papia e por pone bida di su famia na peliger. Pesey el a tuma e decision di keda keto y tin fe den su abogado cu lo trece claridad. E ta kere cu e berdad ta sali na cla.

FISCAL TA REACCIONA:

Fiscal a reacciona cu e ta contra pa laga M.G. liber. El a mustra cu for di October 2017 a dicidi di busca asistencia di autoridad di Canada. Esaki riba peticion di abogado pa scucha testigonan. Fiscal a mustra cu tin un testigo cu a mira cu M.G. a tira. Un otro ta bisa cu el a tende cu tabatin discussion y cu M.G. ta esun cu a tira.

El a remarca cu M.G. no kier duna declaracion mientras cu dos ta mustra riba dje. Fiscal a bisa cu e no tin nada contra derecho di silencio pero esey ta traha contra M.G. El a bisa cu por bien ta cu e testigonan lo tabata banda di esun cu a tira y a haya prueba riba nan man. Na opinion di Fiscal, e cantidad di polvora di tiro riba man no ta importante. E no ta haya cu mester laga M.G. liber.

Abogado mr. Faarup a remarca cu especialmente e prueba di polvora ta mustra claramente cu dos testigo no tabatin muestra riba nan man y ta mustra cu nan no tabata cerca. Sinembargo e sospechoso K. cu tin asina hopi indicacion riba dje, ta motibo di duda y pa laga M.G. liber pendiente di e caso.

Hues a bisa cu e ta bay studia e puntonan y lo dicidi durante dia si lo laga liber of no.

DIARIO a tuma contacto cu abogado mr. Faarup kende a duna di conoce cu Hues a rechaza e peticion. E abogado a bisa cu e tin pensa di apela e decision aki.

 

- Advertisement -

DUNA COMENTARIO

Please enter your comment!
Please enter your name here