Home Hudicial A ordena Gobierno pa para e retiro di directiva di Lotto pendiente...

A ordena Gobierno pa para e retiro di directiva di Lotto pendiente un caso mas profundo

107
0
SHARE
- Advertisement -

Hues ta contra sistema tradicional di nombramento politico

ORANJESTAD (AAN): Diaranzon mainta Corte den Promer Instancia a dicta sentencia den e caso sumario cu e directiva di Fundacion Lotto pa Deporte a cuminsa contra Gobierno y Minister Dangui Oduber.

Esaki ta relaciona cu e hecho cu e minister dia 3 Januari 2018 a duna nan retiro y tabata planea pa nombra e directive nobo. E directiva a bay Corte pa un medida di orden caminda Hues a dicidi di ta wanta e nombramento cu mester a sosode 10 Januari 2018, pendiente resultado di e caso.

HUES CONTRA NOMBRAMENTO POLITICO:

DIARIO a haya copia di e sentencia consistiendo di 9 pagina, caminda por ripara cu Hues kier a manda un señal bon cla cu mester stop cu e sistema tradicional di nombramento politico.

Normalmente ta asina cu ora un Gobierno nobo sinta, tur esnan cu a keda nombra pa e Gobierno lo mester bay cu e Gobierno. Hues ta haya cu no mester wak e color politico di e persona sino su cualidad pa eherce e trabao cu e tin cu haci.

Cu e pensamento aki, Hues a cuestiona e forma con minister kier a kita e directiva y nombra un nobo. Hues ta haya cu e minister mester sigui reglanan y no por yega kita hende manera e ta haya ta bon pa motibonan politico.

DIARIO ta publica e pensamento di Hues riba e caso.

EVALUACION:

Hues a rechaza e protesta conta e hecho cu e directiva den Corte a presenta un parti extra cu ta relaciona cu e nombramentonan di Gobierno pa cu e directive nobo di 10 Januari 2018. Hues a bisa cu aunke e directiva a bin cu esaki laat, e ta haya cu e demanda di e directiva pa para e retiro di 3 di Januari 2018 y e nombramento di 10 Januari 2018 ta cay den e mesun linea. Hues a mustra tambe cu di parti di Gobierno no por a mustra con esaki lo bay afecta nan den nan defense.

Hues ta comparti e punto di bista di Gobierno cu e demanda di directiva di Lotto contra minister mester worde declara no admisibel. Hues a mustra cu e minister ta forma parti di e gobernacion cu na su turno ta representa Gobierno.

Hues a rechaza e ponencia di Gobierno cu e directiva no tin motibo di urgencia cu su demanda. Hues a bisa cu e ponencia di Gobierno ta incomprendibel. Ta evidente cu un fundacion cu ta hay’e confronta cu retiro di su directiva, tin propio interes.

Hues a cuestiona e hecho cu Gobierno kier retira e directiva di Lotto pasobra segun tradicion, ora di cambio di Gobierno cu tin otro signatura politico, esnan nombra pa e Gobierno anterior mester bay.

Hues a remarca cu notable ta cu aki no ta mira e cualidad di e miembronan di directiva sino nan color politico. Hues no ta comparti e pensamento aki. Hues ta haya cu no pasobra nan a haya nombramento politico kiermen cu cada vez cu Gobierno cambia, nan mester worde kita.

Hues a sigui bisa cu Gobierno a bisa cu minister ta haci uso di su autoridad di kita e miembronan di directiva, manera ta para den e statutonan di e fundacion Lotto pa Deporte. Hues ta haya cu e autoridad aki mester cumpli cu reglanan cu tin pa cu kitamento di personanan.

Hues a mustra cu e minister ta usa un argumento politico pa hustifica e retiro mientras cu e no a convence su mes, si e lo por crea un bon relacion di trabao cu e directiva.

Na opinion di Hues, dos biaha e directiva a bay pa reuni cu e minister esta dia 27 November 2017 y 18 December 2017 pa crea un relacion di cooperacion di traha pero e minister no a reacciona riba esakinan. Esaki ta mustra cu Gobierno tabata dicidi caba pa kita nan pasobra asina ta haci tur ora cu cambia di gobernacion.

Hues ta bisa cu e ta spera di a mustra cu esaki no ta un argumento pa kita e directiva y cu mester mira hustamente e interes di Fundacion Lotto pa Deporte y no solamente e interes di Gobierno.

Hues tambe a rechaza e ponencia cu Gobierno no tin confianza den e directiva pasobra e directiva a tuma decisionnan cu e Gobierno actual ta haya cu no tabata bon. Hues ta haya cu ta e Gobierno anterior y e directiva a tuma e decisionnan ey.

Hues ta mustra cu tur ariba menciona ta trece cun’e cu lo por spera cu den un caso mas profundo di e directiva contra Gobierno, e decisionnan di e minister y Gobierno lo worde rechaza. Hues ta haya cu e demanda di e directiva ta na su lugar. Hues a pone un periodo manera pa cumpli cu e caso mas profundo.

DECISION:

Hues su decision ta cu e ta declara e directiva no admisibel den su demanda contra minister.

Hues a ordena Gobierno pa para e decisionnan di retiro di 3 Januari 2018 te ora cu den e caso mas profundo, Corte tuma decision. Hues a pone condicion cu e caso mas profundo mester tuma lugar dentro di 4 siman despues di e sentencia.

 

- Advertisement -

DUNA COMENTARIO

Please enter your comment!
Please enter your name here