Home Turismo A.T.A. trahando riba mercado latinoamericano

A.T.A. trahando riba mercado latinoamericano

11
0
SHARE
- Advertisement -

ORANJESTAD (AAN) – Un delegacion di Oficina di Turismo Aruba (A.T.A.), tabata recientemente na Bogota, Colombia pa cumpli cu un agenda amplio di reunion y otro encuentronan importante.

Algun di e topiconan principal cu a bin riba mesa ta e esfuerzonan di mercadeo cu ta fomenta turismo for di e continente aki pa nos isla, pero tambe reunion cu Avianca pa asina evalua un potencial aumento di vuelo y conexion for di diferente pais di e region.

E grupo di ehecutivonan di turismo encabesa pa CEO, Sra. Ronella Tjin Asjoe-Croes, a sinta den sesionnan extenso cu esnan encarga cu e region y cu cada mercado.

Alavez esnan encarga cu ‘advertising’ y relacionnan publico pa e region tambe tabata presente. Asina a revisa e accionnan tuma y nan resultado, como por ehempel, di e campaña #necesitasaruba. Como parti di e maneho di A.T.A., regularmente ta reuni pa coordina e plannan pa futuro inmediato y tambe riba termino largo.

E aña aki, oficina di A.T.A. Colombia ta celebrando su di 35 aña di presencia y promocion di Aruba. Pa celebra e aniversario significativo aki tin prepara varios campaña y actividad. Un evento importante sigur ta e participacion di Aruba den ‘ANATO’ y aki lo lansa varios campaña pa celebra e 35 aniversario aki.

Adicionalmente A.T.A. ta keda cu bista riba, entre otro, influencers di social media pa asina adapta na e tendencianan nobo di mercado. Strategianan pa compensa e perdida di e fluho di turista for di Venezuela a wordo presenta pa cada mercado, intensificando asina locual mester captura di mercadonan clave manera Argentina, Brazil, Chile y Colombia.

Pa loke ta e reunion cu Avianca, e aerolinea Colombiano ta conta cu un di e rednan di conexion mas grandi den e continente y, como tal, ta un aliado grandi pa Aruba su turismo. Despues cu durante varios luna den 2017 e compania a pasa den dificultad pa welga di pilotonan cu hopi cancelacion di vuelo como consecuencia, A.T.A. ta contento di tuma nota cu e operacionnan ta normalisando y te hasta ta papia di mas vuelo pa Aruba. Di parti di Avianca nan ta satisfecho cu e autoridadnan Arubiano y ta wak dilanti pa traha hunto den diferente promocion.

Den 2017 e region Suramerica a representa pa e turismo di Aruba un 18.9% di e cantidad total di bishitantenan. E mercado ta stabilisando satisfactoriamente despues di mester a enfrenta retonan di mercado Venezolano pa e situacion politico.

Aña pasa nos isla a ricibi 202.776 turista Latinoamericano di cual 74.686 a bin Aruba pa prome biahe. E fluho aki ta principalmente di Colombia, Brazil, Argentina y Chile. Pa 2018 A.T.A. ta premira resultadonan positivo como resultado di e diferente factornan cu ta traha riba dje, entre otro, mercadeo y conexion aereo.

- Advertisement -

DUNA COMENTARIO

Please enter your comment!
Please enter your name here