Home Gobierno Aruba lo termina ta paga 2.5 biaha mas hopi na proyectonan di...

Aruba lo termina ta paga 2.5 biaha mas hopi na proyectonan di PPP

192
0
SHARE
- Advertisement -

Minister President Evelyn Wever-Croes:

ORANJESTAD   (AAN):  E tema financiero ta un reto di cada dia den e gobernacion nobo aki. Esaki ya no ta un secreto pa pueblo y ta un tema cu tin gobierno hopi preocupa desde e prome dia di gobernacion.

Y desde e comienso di Gabinete Wever-Croes, a hiba varios deliberacionnan entre otro cu Hulanda y a pidi Hulanda pa otorga Gobierno espacio pasobra e disaster cu a wordo crea, especialmente despues cu e cifranan real a bira conoci, gobierno a realisa cu esaki no ta un desaster cu por wordo soluciona den un dia. Mas ainda, esaki no ta un problema cu por wordo soluciona den un aña of den dos of tres aña. E problema financiero lo bay tuma su tempo pa wordo soluciona.

Prome Minister Evelyn Wever-Croes ta bisa cu ainda ta fresco den su memoria e prome raport di CAFT na aña 2015/2016 na unda a bisa cu pa Aruba lanta cabes di e desaster cu e gobierno anterior a traha ta bay dura te despues 2020 pa nos lanta cabes. Awo e realidad a cuminsa mira luz di dia, y e palabranan aki ta birando berdad.

Den e cuadro aki, Prome Minister ta enfoca riba e proyectonan di PPP, entre otro Green Corridor, Watty Vos Boulevard, Proyectonan di MFA y construccion di e partinan nobo di Hospital. E instituto di PPP a bin den e tempo ey caminda no mester a tene cuenta cu e gastonan mesora, contrario na DOW cu na momento cu traha careteranan, e gasto ta bin mesora den presupuesto. PPP no ta cay den e presupuesto mesora pero lo bay paga despues.

E prome mandatario di nos pais ta compara esaki cu ora ta bay cumpra muebles na credit, no ta paga e prome luna sino ta cuminsa paga e di dos luna. Pero mester paga. Y awo a yega e momento cu Aruba mester cuminsa paga tur e proyectonan di PPP di e gobierno di Mike Eman.

Prome Minister ta indica cu desde 2017 a cuminsa paga 40.7 miyon florin extra debi na proyectonan di PPP. Aña 2018 mester paga 65.6 miyon. Na 2019 e ta bira 80.5 miyon. Kiermeen e suma ta subi haciendo cu Aruba ta bay paga basta placa na e proyectonan aki. Prome Minister a referi na e raport di Algemene Rekenkamer na unda a indica cu tur loke cu a wordo traha cu PPP, lo termina ta paga 2.5 biaha mas hopi.

E mandatario ta splica esaki haciendo referencia cu un porciento di BBO ta trece aden 60 miyon. Y djis pa paga pa tres proyecto, gobierno mester bay percura pa tin mas placa riba mesa cu un porciento ey di BBO.

Prome Minister Evelyn Wever-Croes ta expresa cu e retonan financiero cu gobierno aki a encontra ta causa sentimento di frustracion y rabia pasobra mester bin drecha algo cu e gobierno anterior a daña enormemente sin tene cuenta cu bienestar di Aruba.

“Sinembargo ta un reto y un desafio cu nos a tuma y como un gobierno responsabel y para den nos sapato, nos lo no core p’e. Nos a bisa cu nos ta bay atende cu e problema aki, y esaki ta locual nos ta haciendo tambe.

Nos no ta bay atende cu e tema aki pa complace cu Hulanda of pa resolve e desaster di AVP. Nos ta atende cu e problema aki pa Aruba, pasobra e pueblo di Aruba mester di dje. Tanten cu nos no tin nos finanza publico na ordo, nos no por sirbi e ciudadano di nos pais manera cu nos ta desea. Pasobra constantemente Aruba ta bay keda cu e menasa si ta bin un KB como tambe si nan ta bay manda mas instruccion y medida riba nos cabes. Di e manera aki ta imposibel cumpli cu e necesidadnan di pueblo. Pesey nos compromiso ta cu nos ta bay atende cu esaki trahando nos plan financiero cu pronto nos lo anuncia’.

Prome Minister ta termina ta bisa cu Gobierno ta den deliberacion cu CAFT. Gobierno ta aprecia e espacio cu Hulanda a duna pa atende cu e tema aki despues cu nan mes a para un banda pa hopi aña y mira con e situacion financiero a deteriora. Awo Hulanda ta duna Gobierno di Aruba espacio pa bin cu un plan realistico, structural y cu realmente ta soluciona e problema.

 

- Advertisement -

DUNA COMENTARIO

Please enter your comment!
Please enter your name here