Home Gobierno Aruba ta enfrentando retonan gigantesco pero uni lo sali mas fuerte di...

Aruba ta enfrentando retonan gigantesco pero uni lo sali mas fuerte di esaki

60
0
SHARE
- Advertisement -

Prome Minister mr. Evelyn Wever-Croes:

ORANJESTAD (AAN) – Den contexto di e prome cien dianan di gobernacion di Gabinete Wever-Croes, Prome Minister mr. Evelyn Wever-Croes a señala cu gobierno ta trahando tambe den e vision pa futuro. Esaki a base di innovacion.

E retonan di cada dia, tin biaha, ta trece cune cu atencion por bay completamente na paga candela, pero como gobierno su tarea ta pa tin e vision pa futuro y stipula esaki hunto cu tur e ministerionan di su gabinete conhuntamente cu sector priva.

“E no ta secreto cu e muchanan cu ta bayendo scol awendia, aworaki, mayoria ta bay haci trabaonan cu no ta existi na e momentonan aki ainda.

“Y si nos di Aruba no prepara pe e desaroyo aki ta pasa bay y nos no por probecha di dje ni desaroya hunto cune” e dama a subraya.

El a agrega cu mirando esaki gobierno a cuminza apunta señora Valery Croes como Chef Innovation Officer. E tin na su encargo prepara e maneho profesional riba tereno di innovacion. El a reitera cu esaki ta bay conhuntamente cu sector priva pa ambos fiha e metanan cu nan kier logra.

“Na fin di dia loke nos kier ta pa Aruba ta prepara y pa nos hobennan por carga e economia di Aruba tambe den futuro”, e dama a subraya.

El a expresa cu e cien prome dianan di gobernacion aki a wordo categoriza mas bien pa trece ordo den e caos cu nan a hereda, pero banda di esaki nan ta hende cu ta bisa kico ta haci y ta haci loke nan ta bisa.

“Nos a bisa cu nos ta pone ser humano central y nos ta hacie. Nos a bisa cu nos ta trece trankilidad financiero bek y nos ta haciendo esey. Nos a bisa cu nos ta bay restablece confianza y credibilidad den nos pais, y nos ta haciendo esey tambe. Nos a bisa cu nos ta bay traha a base di bon gobernacion y transparencia y nos ta haciendo esey. E prome dianan aki tambe ta wordo marca pa un union y cooperacion grandi den e coalicion. E determinacion conhunto di cada un pa trece bienestar den nos comunidad. Y cu honestidad y transparencia, nos lo sa di gana e confianza bek den comunidad, tanto den nos ciudadanonan como den e comunidad internacional”, e dama a reitera.

Prome Minister a expresa cu nos pais ta sintiendo e cambionan cu tin, apesar cu e ta enfrentando retonan gigantesco, pero cu uni por vence nan y sali mas fuerte den di esaki.

- Advertisement -

DUNA COMENTARIO

Please enter your comment!
Please enter your name here