Home General Asina hopi restaurant y tienda di paña ta keda habri na Aruba...

Asina hopi restaurant y tienda di paña ta keda habri na Aruba y nan ta pertenece na stranhero

375
0
SHARE
- Advertisement -

Reaccion ta mustra…

ORANJESTAD (AAN): Den ultimo añanan, Aruba a haya asina hopi Bar nobo, asina hopi Restaurant nobo, asina hopi Boutique nobo di paña, cu hasta a bira dificil pa ‘memoriza’ e nombernan.

Tin asina hopi negoshi nobo, cu ora nan menciona nomber, bo ta cuminza grawata bo cabez pasobra bo no sa unda e ta situa.

Asina hopi negoshi ta habriendo na Aruba, y lo mas tristo?  Casi tur ta pertenece na stranheronan.  E Arubiano mes casi ta kedando atras y no ta habriendo negoshi mas.

Ta parce cu ta “Permiso di Negoshi” riba e isla aki a wordo bendi na baratiyo.

Asina facil a bira pa habri negoshi na Aruba pa stranheronan goza di dje.  Fuera di esey, lo lamentable ta cu hopi di nos mesun hendenan ta bende nan mes como strooman pa “vergunningnan of negoshinan di “cheapsale permission”.

Pa hopi aña caba Arubianonan no por haya permisonan pa lanta negoshi sin cu nan tin cu pasa den un caminda di cruz, pero for di exterior ta yen di hende ta haya negoshi y si mira bon, ta Arubiano ta esnan cu ta e strooman.

Y awor por a mira con e isla aki a haya mas y mas tienda di bende paña, negoshi di bende cuminda, tanto den edificio of den truck/garoshi riba caya.  Y tur ta di hende di afo.

“Ya Aruba ta satura di tanto Restaurant, tanto Boutique, tanto di Groceries…  E momento a yega pa nos uni y cuminza defende Arubianonan,” un comerciante local a indica den un entrevista cu DIARIO.

“E stranheronan ta habriendo mas y mas tienda, y otro banda bo ta mira con nos como Arubianonan ta cerando nos negoshinan,” el a bisa.  Si bo mira rond tambe, por nota cuanto minimarket a habri. “Nos a bira un One-Supermarket-Island,” e comerciante a agrega.

Awor cu Aruba a haya un Gobierno nobo, hopi hende tin confianza cu e cambio aki lo por bay yuda e comerciantenan di Aruba.

“Gobierno nobo aki ta duna nos un speranza grandi, y e speranza tey cu gobernantenan por tene cuenta cu Aruba no ta un pais grandi!  E ta un isla chikito, y si e lugar sigui yena cu negoshi… despues ta kico lo resta pa e Arubiano?  E tin di cera negoshi, y con e ta bay cria su famia?”  Aki el a subraya: “Aruba ta pa Arubiano prome!”

Momento a yega pa Gobierno cuminza sigura cu comerciantenan Arubiano ta haya e sosten pa por sigui.  No tin ningun control ta worde haci di instancianan gubernamental, e.o. di departamento economico y di impuesto etc. pa investiga kendenan ta doño di e cantidad di Bar & Restaurant riba e isla, yen di Bar & Restaurant latino, yen di pacus cu ta habri un tras di otro cu Arubiano como capa como gerente mientras e doñonan ta comerciantenan y companianan di exterior, of hendenan cu no tin permiso di negoshi y cu ta biba aki bao di “un of otro permiso como capa”.

Ningun instancia no ta investiga pa haya sa di unda e “gerentenan Arubiano (strooman) a haya tanto placa diripiente pa habri negoshi of con nan por a yega na tanto placa diripiente.

Hopi negoshi di latino tabata worde comenta di tin oficinanan di abogado cu ta inscribi como doño pa tapa pa e doñonan di berdad tras di e negoshi berdadero.

E “one happy Island”, a cambia bira; “One happy Restaurant Island”, “One happy Bar Island”, “One happy Supermarket Island”, “One happy Minimarket Island”,  “One happy Snacktruck island” .

- Advertisement -

DUNA COMENTARIO

Please enter your comment!
Please enter your name here