Home Turismo ATA Hulanda a luci cu su presentacion na Winter Wonderland 2018

ATA Hulanda a luci cu su presentacion na Winter Wonderland 2018

27
0
SHARE
- Advertisement -

ORANJESTAD (AAN): Recientemente Oficina di Turismo (A.T.A.) Hulanda a forma parti di e evento ‘Winter Wonderland’ organiza pa e compania di aviacion Koninklijke Luchtmaatschappij (KLM), como un di su patrocinadornan grandi.

Na un manera hopi creativo, Oficina di Turismo Aruba na Hulanda a sa di crea un espacio special pa promociona Aruba. Nos clima y cultura a sa di causa un bon impresion cerca tur bishitante, brindando hopi oportunidad pa mercadea Aruba como destino di vacacion.

Na a comberti e parti paden di un ‘iglo’ den un zona tropical cu un bar caminda invitadonan por a disfruta di un dushi ‘Aruba Ariba’ rondona pa imagennan bunita di nos isla, mientras dos bailarina den disfraznan di carnaval tabata yama tur esnan presente bonbini cu nan sonrisa y halando hopi atencion durante e evento. Te hasta e propio CEO di KLM, Sr. Pieter Elbers no por a resisti e oportunidad di saca su potret den esfera unico aki.

E aña aki Winter Wonderland tabata parti den dos seccion caminda e prome, esta riba diahuebs anochi, tabata un B2B cu e miho agentenan di biahe invita. Riba diasabra anochi e evento tabata habri pa biaheronan frecuente cu a disfruta di e set up spectacular di Aruba paden di Hangar 10 na Schiphol. Den e hangar, y specialmente pa dianan aki, tabatin tambe un avion di KLM cu invitadonan por a cana den dje. Y pa hacie ainda mas diferente segun e tema, a pidi un y tur invita, pa bisti paña di ski.

Oficina di Turismo Aruba na Hulanda ta contento di por a forma parti di e evento aki cu a sa di trece hunto un grupo grandi pero bon selecta di biaheronan potencial pa nos isla, ademas di agentenan di biahe cu por sigui expande e mercado turistico for di Europa. Pa aña 2017, Europa a trece un total di 90.871 bishitante pa nos isla, di cual 37.246 tabata procedente di Hulanda.

Aki por mira potret di e forma con Aruba a promove su mes na Winter Wonderland 2018.

- Advertisement -

DUNA COMENTARIO

Please enter your comment!
Please enter your name here