Home Comercio Aumento di salario minimo ta incentiva mas tanto e trahadornan indocumenta

Aumento di salario minimo ta incentiva mas tanto e trahadornan indocumenta

30
0
SHARE
- Advertisement -

Presidente ATIA: ta calcula un grupo di 6 mil hende

ORANJESTAD (AAN) – Den conferencia di prensa cu a tuma lugar den e sede di ATIA, tocante e anuncio di Minister di Labor, cu lo aumenta salario minimo substancialmente, su presidente sr. Ronald van Trigt a expresa cu den nos pais tin otro problemanan social, por ehemplo, den e tema laboral, e personanan cu a haya nan mes confronta cu husticia.

Sr. van Trigt a expresa cu nos tur sa con dificil e ta, pa e personanan aki reintegra den nos mercado laboral. Esaki ta un punto cu ATIA a papia di dje extensamente, no solamente cu gobierno anterior pero tambe cu e gobernantenan actual.

E Presidente di ATIA a subraya cu mester tin un base pa por combersa cu comercio pa wak con nan ta bay adapta su mes pa acepta e personanan aki, den un proceso laboral.

“Pa bo acepta nan nos mester incentivo. Locual mi kier bisa ta cu comercio mester di incentivo pa nos por soluciona e tipo di problemanan social aki, cu mi a menciona y cu ATIA ta preocupa pa nan tambe”, sr. van Trigt a subraya.

El a subraya cu e manera con e tema di aumento di salario a wordo treci dilanti ta comosifuera cu por soluciona e problemanan di un nivel hopi complica na un forma hopi facil. Pero no tin manera pa soluciona problemanan asina complica cu medidanan simple. “E efecto di simplemente subi un salario minimo lo por ta net contrario di locual gobierno, y pa medio di minister di Labor, kier purba di logra”, sr. van Trigt a reitera.

E presidente di ATIA a expresa cu atravez di añanan por constata cu cada biaha cu gobierno anuncia algo pa remedia un situacion, e por ta AZV, BAZV, BBO, of cualkier tipo di e belastingnan aki of e por ta aumento di salario minimo, esaki ta incentiva un grupo cu ta e trahadornan indocumenta na Aruba.

Esaki ta otro problema social cu van Trigt a menciona y ATIA ta calcula cu tin 6 mil trahador indocumenta na Aruba.

“Nos no ta wak nan drumi riba beach of ta haci nan huña. No! E hendenan aki ta participa den nos mercado laboral. Unico cos ta cu nan no ta contribui, of esnan cu ta emplea nan no ta contribui suficientemente of at all, na e primanan y tur otro programanan social cu nos mester pa sostene un pais cu ta viable y tin un economia sano”, sr. van Trigt a remarca.

El a subraya cu tanten cu nos no tin un plan bon documenta, pa wak con nos ta atende cu e trahadornan indocumenta aki, nos ta bay haya nos mes cu mas y mas hende lo bay haci uso di bay traha cu esnan indocumenta.

“Nos tabata tin ehemplonan unda tin construccionnan andando algun luna pasa, na unda nan a haya mas cu 40 of 50 trahador indocumenta, trahando”, e presidente di ATIA a remarca.

Den forma di reiteracion sr. van Trigt ta puntra: “Con nos ta bay soluciona, pa medio di un salario minimo, e tipo di problemanan aki? Pa nos por haci cualkier ahuste pa comercio na e momento aki, e topiconan cu mi a caba di trece dilanti, mester wordo atendi y no na ultimo lugar, esun di personanan indocumenta.

Si nos tin un situacion, y nos tin situacionnan rond di nos cu ta preocupa nos, sigur e situacion di nos pais bisiña cu ta uno preocupante unda cu nos tin cu compronde cu e hendenan ta bay sigui busca sali for di e situacion precario cu nan ta aden y cu ta birando dia pa dia mas serio; pero na Aruba nos tin hopi hende caba y si nos bay sali afo cu nos tin 6 mil trahador indocumenta, nos ta papiando cu 10% di esnan emplea no ta documenta. E ta un forza riba su mes cu ta afectando nos economia enormemente, y ta afecta e instrumentonan cu gobierno mester pa nan crea nan entrada. No por crea un economia creciente tanten nos tin e desbalansa aki den nos economia”, sr. van Trigt a subraya.

- Advertisement -

DUNA COMENTARIO

Please enter your comment!
Please enter your name here