Home Social Awe ta net 40 aña di Centro di Bario Playa Pabao

Awe ta net 40 aña di Centro di Bario Playa Pabao

21
0
SHARE
- Advertisement -

ORANJESTAD (AAN): Dia 23 di februari 1978, ta exactamente 40 aña pasa cu Centro di Bario di Playa Pabao a worde funda. Un centro cu e ultimo 40 aña a demonstra su derecho di  existencia.

Ta mas cu logico, pa na e momentonan aki nos recorda  Sr. Watty Vos, kende a tuma e initiativa di a forma e prome directiva y a funda nos fundacion. Mi mes a worde eligi como comisario durante e di dos reunion di directiva. Durante e reunion  señora Gisela Schotborg+ y sr Tolin Chirino+ tambe a worde acepta pa forma parti di e directiva.

Segun presidente, Dennis Kenneth Burke, reunion tabata tuma lugar na oficina di Osticeba y tin biaha hasta te   1’ or di madruga. Danki na sr. Edgar Boekhoudt, cabesante di Sint Franciscus College, nos por a haci uzo di un klas pa reuni y tambe pa organiza nos actividadnan. Sint Franciscus College tabata nos centro. Aki a lanta diferente comision e.o. comision: di hubentud, di damas y di deporte y comision di revista cu a percura pa nos promer revista a mira lus.

Cu varios comision tabata lanta manera padestul no solamente tabata nificia e trabao duro di e directiva, pero e necesidadnan di e bario pa actividad riba tereno social, cultural, deportivo y educativo. Pues, e trabao di pionero a bay relativamente facil, danki na e habitantenan di Playa Pabao mes. Unda nos a pidi ayudo nos tabata haya.

E actividanan cu a worde orgainsa tabata anochi di cine, seso-sport, torneo di futbol, diferente charla, paseo cu nos grandinan, celebracion di dia di mama y hopi mas.

Segun Burke, cu awe nan ta celebra 40 aña tambe ta danki na diferente directiva cu den ora liber a traha na bienestar di nan bario. Mi no kier cuminsa menciona nomber, pasobra mi sa cu lo mi lubida algun. Si mi ta gradici tur miembro y exmiembro di directiva y di e diferente comisionnan pa e trabao cu nan a haci pa nos centro.

Trabao cu como boluntario bo no ta warda riba un danki pero cu bo ta haciele cu amor pa bo bario. Ademas mi mester menciona e otro instancianan, cu a duna aporte grandi na nos centro esta Gobierno(nan), CEDE-ARUBA, ATHA, UNOCA,  Lotto pa Deporte y Aruba Way Foundation.

Pues mi ta considera e trabao cu a worde despleha durante e ultimo 40 añanan hopi valioso pa nos bario. Tur hende cu na un of otro forma a yuda por ta orguyoso di esaki. Un biaha mas masha danki.

Y awor kico mas? Durante ultimo aña tabatin diferente cambio na nos centro. A crea hopi facilidad y a organiza hopi actividad. Ta deseo di e directiva actual, pa mas habitante haci uzo di nos centro. Pa bo centro bo no mester warda riba iniciativa di directiva. Abo mes por bin cu propio iniciativa y nos lo duna e aporte y espacio pa aporta na bo bario.

Nos ta falta algun comision  no solamente pa facilita e tarea di directiva, sino tambe pa bin cu iniciativa nobo. Comision di hubentud, comision di deporte y comision pa duna informacion ta algun cu mi a desea di por lanta.

Solamente e comision di e 60+ ta actualmente activo. E comision aki  ta haciendo un trabao sublime. Un danki ta bay na nos hobennan cu ta orgainsa nos plan vacaccional y ta yuda na tur actividad. Tur cos ta bayendo den bon direccion y siete aña pasa nos a renova y amplia nos centro.

Mi ta termina felicitando e bario di pabou cu e 40 añanan di logro y lo mi topa boso na nos actividadnan e aña aki.

Playa Pabao pabien y ban sigui traha na bienestar di nos bario. Nos tey pa facilita bo.

Y manera himno di Centro di bario Playa Pabao ta bisa:

E amor di su hendenan, nan comprensión y dedicacion ta e forza di Playa Pabao. Playa Pabao te na fin di mundo.

- Advertisement -

DUNA COMENTARIO

Please enter your comment!
Please enter your name here