Home Politica CAFT a frega e cifranan financiero devastador bao di e nanishi di...

CAFT a frega e cifranan financiero devastador bao di e nanishi di Fraccion di AVP

357
0
SHARE
- Advertisement -

Segun MEP:

ORANJESTAD   (AAN):  Segun Fraccion di MEP, despues cu henter comunidad a tuma nota di e relato devastador di CAFT riba e situacion financiero desastroso cu Gabinete Eman a laga atras y cu un biaha mas e dobel seis di AVP a horca, no ta keda e fraccion di AVP y tur esnan cu ta defende e partido aki ciegamente nada otro mas di hinca nan cara di berguensa den tera, cuminsa samina nan consenshi y realisa den ki desaster y ruina financiero nan a hinca nos pais aden durante e ultimo 8 añanan.

Goochelmento cu cifra

Sinembargo tur locual partido AVP a haci durante nan 8 aña di malgobernacion no ta nada nobo, ya cu e barbaridadnan aki nan a comete tambe den nan gobernacionnan anterior, manera por ehempel na 2001, caminda nan a manipula y goochel grandemente cu cifranan financiero, bisando entre otro cu nos pais supuestamente lo tabatin un Surplus di 1.5 miyon florin na 2001 y un Surplus di 5.7 miyon florin na 2002. Sinembargo ora cu e gobierno di MEP na 2001 mediante un Comision Financiero a laga investiga nos finansa publico, a bin resulta cu pais Aruba tabatin un deficit di -167.8 miyon florin den e presupuesto di 2001 y den e presupuesto di 2002, un otro deficit di -206.3 miyon florin cu AVP a laga atras. Y e gobierno di MEP di e tempo ey mester a traha hopi duro y haci hopi sacrificio pa trece nos finansa publico bek riba pia.

Nad’un cambia pa AVP

Awor na aña 2018, CAFT a haci su analisisnan y a resulta cu na 2017 pais Aruba lo no conoce un deficit di -25 miyon florin y tampoco lo bay tin un surplus di 25 miyon florin na 2018 manera cu tur dia e fraccion di AVP hunto cu nan defensornan di maldad ta propaganda. Echo ta cu CAFT mes a declara cu na 2017 pais Aruba lo tin un deficit di -130 miyon florin y pa 2018 esaki lo bay ta -275 miyon florin. Tur e cifranan espantoso aki a ser frega bao di nanishi di e 4 parlamentarionan di fraccion di AVP cu tambe tabata den reunion di e Comision Financiero di Parlamento hunto cu CAFT diabierna ultimo. Pero kico nos por a mira? Durante e reunion di CAFT tur e 4 parlamentarionan aki di AVP a bira mudo, no a bisa nada pa defende nan gobernacion di AVP y ta parce cu campana a guli nan lenga por completo.

Berguensa a coy nan curpa

Siguramente berguensa lo a coy nan curpa y nan lo a pidi pa tera habri nan dilanti den e reunion cu CAFT. Ta straño si cu un Richard Arends cu ta pretende di ta e gran experto riba tereno financiero tampoco a hiba palabra y ta warda te ora pa e siman aki habri pa e bay den conferencia di prensa y cuminsa lansa su mentira y manipulacionnan di custumber, pero den e reunion cu CAFT e tabata manera un pushi mondi, keto keto!

Awor cu CAFT a papia idioma cla y cu tur cifra di otro instancianan manera Banco Central, Controlaria General, IMF cu prueba a mustra riba e echo cu AVP a desgracia e pais aki financieramente, lo ta na su lugar pa henter partido AVP realisa cu nan credibilidad den pueblo a baha drasticamente y a cay te na suela y cu a yega e momento tambe pa nan recapacita, stop di sigui manipula y venena mente di pueblo bisando cu nan a hiba un maneho financiero saludabel y solido. Finalmente, un conseho na AVP: “Boso para un banda y wak con e gobernacion actual lo bolbe salba e pais aki poniendo orden den henter e desorden financiero cu boso a laga atras na final di 2017”.

 

- Advertisement -

DUNA COMENTARIO

Please enter your comment!
Please enter your name here