Home Gobierno CAft tin confianza den e vision financiero di Gabinete Wever-Croes

CAft tin confianza den e vision financiero di Gabinete Wever-Croes

199
0
SHARE
- Advertisement -

ORANJESTAD (AAN): Diabierna mainta, Gobierno di Aruba a reuni cu Colegio di Supervision Financiero, CAft.

Prensente den e reunion aki tabata e Presidente di e comision, sr. Raymond Gradus, señora Sybilla M Dekker, sr. Robert Croes, secretario sr. Manus Twisk, Sandrien de Klerk y Geert Jansen. Durante e reunion CAft un biaha mas ta confirma cu e estado financiero cu Gobierno di AVP a laga Aruba aden ta desastroso y hopi difisil.

Prome Minister Evelyn Wever-Croes a keda satisfecho cu e reunionnan cu CAft  y a bisa:  “Durante di e reunionnan cu a tuma luga den e ultimo dos dianan, CAft a confirma cu e estado financiero cu Gobierno Nobo a haya gobernacion aden tabata desastroso.

CAft a elabora riba e raportahe di e di tres cuartal di 2017 cu ta casi na e final di Gabinete Mike Eman teniendo cuenta cu nan a sinta un paar di siman despues di e di tres cuartal. For di aki caba por a nota deficitnan gigantesco na unda cu CAft for di aki caba a duna indicacion cu e normanan segun ley lo no worde alcansa”.

Prome Minister a duna di conoce cu CAft ta indica cu nan tin e speranza y confianza den e vision di e gobernacion nobo y cu Gobierno actual lo trece Aruba back riba e caminda corecto di e presupuesto balansa.

E mandatario ta bisa cu e reunionnan tabata hopi elabora riba hopi detayenan financiero. Gobierno a splica CAft cu ta trahando un trayecto financiero con pa saca Aruba for di e problemanan financiero. Y a enfatisa cu esaki ta un trayecto realistico basa riba cifranan realistico.

“CAft a keda hopi contento y gradicido pasobra pa hopi tempo nan no tabata ricibi cifranan realistico y esaki nan tabata pone den nan raportnan tambe”, Prome Minister a bisa.

Prome Minister Evelyn Wever-Creos ta duna di conoce cu esakinan tabata dianan di bon reunionnan cu a termina den bon direccion considerando e hecho cu apesar cu CAft sa cu e situacion financiero cu AVP a laga Aruba aden ta hopi malo, CAft tin confianza den e Gobierno nobo aki y su vision financiero.

- Advertisement -

DUNA COMENTARIO

Please enter your comment!
Please enter your name here