Home Comercio Camara di Comercio a reaccion riba anuncio di aumento di salario

Camara di Comercio a reaccion riba anuncio di aumento di salario

228
0
SHARE
- Advertisement -

ORANJESTAD (AAN): Presidente di KvK, Sr. Ernst J. E. Mohamed a duna reaccion di e instancia pa loke ta trata anuncio di Minister di Labor riba un aumento di salario minimo. E ta bisa cu esaki lo tin su consecuencia pa comercio y economia.

E punto di bista riba aumento di salario minimo di Minister Croes, KvK tin un solo punto di bista, nan kier conseha e Minister pa haci un estudio prome cu e tuma e decision aki, y tambe pa informa nan riba fecha cu e ta planea pa trece esaki dilanti; e suma cu esaki ta encera y si el a investiga e consecuencianan di e medida aki.

Sr. Mohamed ta enfatiza cu KvK no ta contra un aumento di salario minimo, al contrario, nan ta kere cu tur hende merece pa biba bon na Aruba, pero pa haci esaki, e poder di compra mester tey! Y si nan ta tuma un medida cu no a wordo investiga, sin tene cuenta cu su consecuencianan, esaki por perhudica economia en general.

Camara di Comercio ta un organo di conseho pa Minister di economia, pero tambe pa gobierno y nan kier puntra nan, si prome cu nan haci algo asina aki, pakico nan no ta wak den nan mesun cas pa baha e gastonan di gobierno, prome cu aumenta salario minimo. Por ehempel, wak  costonan di awa y coriente, transporte y invoerrechten, ki efecto nan tin riba e salario di un persona cu ta cobra salario minimo.

Sr. Mohamed a indica cu mas empleado di Citgo ta bay keda sin trabao, y e impacto cu esaki tin riba nos economia, cu no lo bay ta esun cu ta deseable. E ora eynan tur parti den nos comercio tin cu cuminsa premira y mester cuminsa wak kico nan ta haci pa compensa loke nan ta perdiendo. Es mas, si wak bon, gobierno mester wordo mira y wordo maneha como un negoshi.

Tur CEO cu ta drenta un negoshi, prome cos cu nan ta haci, ta baha nan gastonan. Si un negoshi ta perdiendo placa, kico nan ta haci, nan ta wak na unda por baha gasto y normalmente ta empleadonan, nan ta kita. No ta bisa cu awor aki mester kita tur empleado, pero si bo ta cuminsa wak den bo mesun seno, ken ta overtollig, ken no ta contribui y unda bo por ta mas eficiente, e ora eynan bo ta baha bo gasto, bo ta haci cu bo situacion ta bira mas rendable y si bo situacion ta mas rendable, e ora comercio ta bira mas rendable.

E financiamento door di sector priva pa sector publico, ta bira inalcansabel. E gastonan ta bira mucho halto y nos comerciantenan, a lo largo, na no por mantene esaki mas!

Tambe locual cu kier KvK ta enfatiza ta cu pa Minister consulta Raad van Advies, SER, ATIA, Camara di Comercio y AHATA cu gratuitamente lo sinta cu e Minister, pa traha hunto riba un plan con por haci esaki un ‘win-win’ situation. Con por wak, si bo kier tuma un medida aki, haci un movecion asina aki, haci’e cu e por bisa cu tur hende por tin beneficio di dje.

A lo largo, si bo ta bay hisa salario minimo y comercio dicidi hisa prijs, manera nos a bisa aña pasa, ta unda e spiraal aki ta bay keda. Si bo ta bay haci esey, tin cu haci’e unda cu e comerciantenan no lo bay hisa nan prijs. Esey ta e meta di Camara di Comercio.

 

 

 

 

 

- Advertisement -

DUNA COMENTARIO

Please enter your comment!
Please enter your name here