Home Gobierno Citgo ta ranca e plug por lo pronto pa refineria na San...

Citgo ta ranca e plug por lo pronto pa refineria na San Nicolas

366
0
SHARE
- Advertisement -

ORANJESTAD (AAN): Nubianan scur tabata colga Diamars riba Aruba, y no solamente di awacero, sino di noticia no hopi alentador.

Gobierno di Aruba a ricibi e noticia desagradabel cu Citgo ta para proyecto di rehabilitacion di refineria.  E excusa ta, cu esaki ta debi na sancion cu Merca a impone riba Venezuela. Prome Minister Evelyn Wever-Croes den su prome reaccion a bisa cu apesar cu esaki no tabata algo inespera, toch e ta un noticia cu a yena Gobierno cu hopi preocupacion.

Citgo a usa e palabra di ‘slow down’, pero tur hende ta mire como un paro completo.  Pasobra no tin ningun indicacion cu e sancion Mericano lo bay kita den futuro cercano.

Diamars mainta Gobierno di Aruba a reuni cu ehecutivonan di CITGO na unda nan a informa Gobierno cu debi na e sancionnan cu Merca a impone riba Venezuela, pa CITGO Aruba ta birando dificil y por bisa te hasta practicamente imposibel pa haya financiamento pa por cumpli cu e contract di rehabilitacion di e refineria pa esaki habri back.

E decision aki ta debi na e impase cu tin entre e Gobierno Mericano y Gobierno Venezolano, cua Aruba no tin arte ni parte den dje. Sinembargo ta debilita e posibilidad pa e refineria habri back. CITGO no sa ainda con largo esaki lo dura y cuanto tempo nan tin mester pa e impase aki worde soluciona pero tin e speranza cu esaki tuma luga pronto, sinembargo CITGO no por a duna Gobierno ningun siguridad.

Prome Minister a expresa cu e noticia aki naturalmente ta yena Gobierno cu duele y a causa un preocupacion enorme. El a bisa cu esakinan ta desaroyonan cu Gobierno no tin control riba nan, sinembargo e consecuencianan ta bin cay den scochi di Gobierno cu lo tin mester di bay atende cu e situacion aki.

E mandatario ta bisa cu mirando e desaroyo aki, mas y mas Gobierno di Aruba ta confirma cu e decision cu Gobierno a tuma pa no inclui e reapertura di e Refineria den presupuesto pa e aña aki tabata corecto.

Tambe Prome Minister a enfatisa cu mas y mas esaki ta confirma tambe cu desde aña pasa cu Gobierno a informa comunidad cu debi cu e retraso di e reapertura di e Refineria mester adapta e presupuesto, tabata decisionnan corecto pa tuma.

Plannan di Gobierno ta sigui pa revisa e contrato pa mira unda Aruba por ta mara na e contract aki ainda y ta spera tambe cu CITGO ta sali for di e situacion aki pronto pa asina Gobierno tuma e decision riba e futuro di e Refineria.

Prome Minister Evelyn Wever-Croes a duna di conoce cu na e momentonan aki Gobierno di Aruba ta evaluando kico ta e siguiente pasonan pa tuma y ta keda monitoria e situacion pa asina e miho decisionnan worde tuma den bienestar di e pueblo di Aruba.

- Advertisement -

DUNA COMENTARIO

Please enter your comment!
Please enter your name here